Read wanga ESITA 2 Bible Online

ESITA 2 - wanga bible

ESITA 2

¹Olunyuma lwamakhuwa ako, liruma liomuruchi nilimalile okhututuha, omuruchi yatsiililila okhupaara khumakhuwa ka Vashiti yali nakholile nende aka ye yali nalachilisiye okhulondana nende Vashiti.

²Mana abakhalabani bomuruchi nibamuboolela bari, “Lekha bakhukhaabile abakhaana abashili abashisila khandi abelikondo lilayi.

³Nochama waahule abakhongo mutsingongo tsielihangalio liosi, bakhung'asie halala abakhaana abashili abashisila abelikondo lilayi boosi munzu yabakhasi eyili mwitookho elia Susa. Abakhaana abo bareebwe hasi wobulindi bwa Hegai, omukhalabani omulate ousinjilile abakhasi bomuruchi, abakhoonye okhusiiya likondo liabwe obulayi.

⁴Mana iwe omuruchi obukule omukhaana oulakhuchamisia abe omukhayewo mushilenje shia Vashiti.” Likhuwa lino liachamisia omuruchi; mana nakhola ario.

⁵Ne, yaliho omuyahudi undi owali niyamenya mwitookho lia Susa, owalangwa mbu, Moridekai, omusiani wa Yairi, wa Shimei wa Kishi, owomuluyia lwa Benjamini.

⁶Moridekai yali niyahuyibwa okhurula Yerusalemu halala nende abahambe nende Yekonia omuruchi wa Yuda, boosi bahuyibwa nende Nebukadineza omuruchi wa Babeli nibayilwa mubuhambe.

⁷Moridekai yali niyamwoola omukhaana Hadasa, niye Esita. Esita yali omwana wa samwana Moridekai oundi. Shiyali nende samwana kata nyina ta. Kho Moridekai yali niyamubukula mbu abe omwanawe omukhaana. Esita yali omukhaana owelikondo lilayi khandi oweshiiso.

⁸Olwa omuruchi Ahasuwero yali nakhupile omulome mbu abakhaana ababuukha abashisila bareerwe, abakhaana abanji bakhung'asibwa hasi wobulesi bwa Hegai mu itookho yomuruchi mwitookho lia Susa. Esita yesi yareerwa mu itookho eyo.

⁹Esita yamuchamisia Hegai muno, mana Hegai namukoosia. Kho Hegai namuhelesia bwangu amafurake akokhwibakha nende ebiokhulia ebiahule. Khandi namura mubwikhalo obulayi po munzu yabakhasi. Ebweneyo, yamuhelesia abakhaana abalobole musaafu abokhumukhalabanila.

¹⁰Esita shiyali nabuulile oluyialwe kata abeekhobe ta; okhuba Moridekai yali namukayile mbu alebuulakhwo mbu nomuyahudi tawe.

¹¹Kho Moridekai yachendanga buli inyanga imbeli wolwanyi lweinzu yabakhasi eyo, okhumanyilisia shinga Esita atsiilililanga.

¹²Ne okhusiaha khwelikondo okhwabakhaana khwa buli lwosi khwamalanga omuyika mulala, mbu emiesi chisasaba okhwisiaha nende amafura ka Manemaane, nemiesi chindi chisasaba okhwisiaha nende emisaala chieshing'ari nende amafura kabakhasi bebakhanga. Olunyuma lwomuyika mulala okhuhwa, buli omukhaana yarerungwa khu inyangaye imbeli womuruchi Ahasuwero.

¹³Khunyanga eyo, omukhaana owatsitsanga imbeli womuruchi okhurula munzu yabakhasi, yefwalanga nende okhwisiiya shinga yali niyenyile omwene.

¹⁴Yatsitsanga womuruchi mungoloobe, ne achelela inyanga yilondakhwo nibushiele. Nacheleele, yayilungwa munzu yindi eyabakhasi mubulindi bwa Shaashigazi owali omukhalabani omulate owomuruchi, owalindanga abakhasi ababikha. Omukhaana oyo khandi shiyakalukhanga womuruchi ta, okhurusiakhwo omuruchi naba nachamisibwe ninaye mana amulanje khulwa eliiralie.

¹⁵Olwa inyanga yoola eya Esita okhutsia okhwinjila ewomuruchi, Esita omukhaana wa Abihaili omusiani wabwe samwana Moridekai owali niyamubukula abe omukhaanawe; yachamisia abo boosi abamulola. Ne olwa ebise bia Esita biola, shiyasabakhwo eshindu shiosi ta, habula yefwala nende okhwisiiya butswa shinga Hegai omulate womuruchi khandi omulindi wabakhasi yamulachilisia.

¹⁶Mana mumuyika kwamusaafu kwoburuchi bwa Ahasuwero, nikwo omwesi kwamumwesi kwekhumi, Tabetsi, Esita yareerwa womuruchi Ahasuwero mu itookhoye.

¹⁷Naye omuruchi naheela Esita okhushila abakhaana abo boosi; yakoosibwa nende okhuchamwa muno okhushila abashisila bashie boosi. Mana omuruchi nara olusimbi lwoburuchi khumurwekwe, namukhola okhuba omukhayewe mushilenje shia Vashiti.

¹⁸Mana omuruchi nakhola lisabo likhongo eliokhuheelesia Esita oluyali. Omuruchi yabenjisia abeemilisi nende abakhalabanibe boosi. Khandi nalachilisia mbu abandu boosi mutsingongotsie tsiosi bahuluushe, nahaana ebihaanwa shinga abaruchi bahaananga.

¹⁹Mana olwa abakhaana abashisila bakhung'ana olwakhabili munzu yindi, Moridekai yali niyaloboolwe nende omuruchi okhuba omwimilisi.

²⁰Naye Esita, yali nashili okhwibuula mbu nomuyahudi, Moridekai yali niyamulachilisia mbu alebuulakhwo tawe. Esita yahulilanga Moridekai butswa shinga olwa yamuhulilanga nashili omwana.

²¹Mutsinyanga etsio, olwa Moridekai yali niyaloboolwe okhuba omwimilisi weitookho, Bigitsani nende Tereshi, abali abakhalabani abalate abomuruchi abalindanga habwinjililo, basinyikha muno, ne nibakhaaba okhumwiira omuruchi Ahasuwero.

²²Naye Moridekai namanya likhuwa elio mana naboolela Esita. Naye Esita naboolela omuruchi.

²³Olwa banoonelesia amakhuwa ako, banyoola mbu kali akatoto; kho abakhalabani abo niberwa khulwa okhwachikhwa khumusaala. Omuruchi nalachilisia mbu kano kahandikwe imbeliwe mushitabu shiamakhuwa kokhwitsulilwa.