Read wanga ESITA 3 Bible Online

ESITA 3 - wanga bible

ESITA 3

¹Olunyuma lwamakhuwa ako, omuruchi Ahasuwero yemekha Hamani omusiani wa Hamedatsa owoluyia lwa Agagi, okhuba omukhongo wabemilisi bandi boosi.

²Omuruchi yalachilisia abakhalabanibe boosi mbu, bamuhelesinjie Hamani oluyali nibamusikamila nende okhwinamia emirwe imbeliwe. Boosi bakhola bario, nebutswa Moridekai yaloba okhuhaana oluyali khu Hamani.

³Mana abakhalabani bandi bomuruchi nibareeba Moridekai bari, “Mbushiina okhayile lilako liomuruchi?”

⁴Nibateema okhumusaaya buli inyanga mbu yenamile Hamani, naye naloba. Moridekai yali nababooleele mbu, ye nomuyahudi, kho shianyala okhwinamila Hamani tawe. Nabo nibaboolela Hamani amakhuwa ako okhulola naba nanyala okhufuchilila obukhayi bwa Moridekai obwo.

⁵Ne olwa Hamani yamanyilisia mbu Moridekai alobile okhumwinamila, yasinyikha muno.

⁶Olwa Hamani yamanyilisia mbu, Moridekai nomuyahudi, shikamuhela okhusasia Moridekai yenyene ta, habula yerechekha mbu, okhuula amulule Abayahudi boosi mushialo shioburuchi bwomuruchi Ahasuwero.

⁷Mumuyika kwekhumi nakhabili kwoburuchi bwa Ahasuwero, mumwesi kwambeli, nikwo omwesi kwa Nisani, Hamani yalachilisia mbu ikha ikhupwe (eyilangwa mbu, Purimu) okhumanya omwesi nende inyanga yokhumulula Abayahudi. Mana ikha niyikwila inyanga yekhumi nakhataru yomwesi kwekhumi nakhabili, nikwo omwesi kwa Adari.

⁸Mana Hamani naboolela omuruchi Ahasuwero ari, “Baliho abandu abasalaana mushialo shiosi shioburuchibwo, bali mubuli olukongo. Amalako kabwe kahukhaane nende akabandu bandi boosi, kata shibalondanga amalakoko iwe omuruchi ta; khulweshio shikakhoyeele iwe omuruchi okhubeesimilisia tawe.

⁹Omuruchi, nochama lachilisia mbu, boosi pe beerwe. Nokhola orio, esuubisia mbu, ndalahana ifeetsa eyihela tsikilo ebikhumila ebikhumi bitaru namakhumi kane (340,000) mwibishilo liomuruchi khulwa okhwikhoonyelwa mwihangalio.”

¹⁰Kho omuruchi narusia omukasa khumukhonokwe nahelesia Hamani omusiani wa Hamedatsa owoluyia lwa Agagi, owali omusuku wa Abayahudi.

¹¹Ne naboolela Hamani ari, “Amapesa nende abandu abo bali mumakhonoko, obakholele aka wenya okhubakholela.”

¹²Mana omwesi kwambeli nikuli ekhumi nakhataru, Hamani yalanga abahandichi bomuruchi nabalachilisia mbu, bahandiche koosi aka ababoolela, mana kakalulwe mutsinimi tsiosi nende mumahandiko koosi akekhonyelungwa mushialo eshio shiosi. Ibarwa eyo yahandichilwa abemilisi bomutsingongo boosi, mana niyihandikwa muliira liomuruchi Ahasuwero khandi niyirebwakhwo eshibalikhoshie shioburuchi.

¹³Mana abarume nibarumwa okhuyila tsibarwa mungongo tsiosi tsioburuchi. Tsibarwa etsio tsialachilisia okhumulula, okhwira nende okhusishia Abayahudi boosi; abaana nende abakofu, abakhasi nende abaana abatoro, khunyanga ndala, eyali inyanga yekhumi nakhataru eyomumwesi kwa Adari. Mana khandi bayaaye emiandu chiabwe chiosi pe.

¹⁴Amakhuwa ako kalachilisibwa okhulandasibwa mu buli olukongo, mbu abandu boosi berecheshele inyanga eyo.

¹⁵Abarume abo batsia bwangu okhulondana nelilako liomuruchi elo, mana lilako elo nilitswana mwitookho likhongo lia Susa. Omuruchi nende Hamani bekhala hasi okhunywa nende okhwikhoya nebutswa abomwitookho lia Susa batiilwa noburi.