Read wanga ESITA 4 Bible Online

ESITA 4 - wanga bible

ESITA 4

¹Olwa Moridekai yamanya koosi akali nikekholeshe, yarandula tsingubotsie, niyefwala tsingubo tsiamakunia khandi niyepuuka likoshe khumurwe. Mana natsia nabira hakari welitookho nakhupanga tsimbungu niyeekhuula obululu.

²Niyoola mushilibwa shielitookho, nebutswa shiyafuchililwa okhwinjila itookho womuruchi ta, okhuba abulaho owafuchililungwa okhwinjila itookho nafwalile tsingubo tsiamakunia.

³Buli mulukongo lwa lilako liomuruchi lioola nende okhutswanibwa, Abayahudi bakhupa tsimbungu, nibekhuula, nibalila nende okhwiyima ebiokhulia khulwa okhusaaya. Obunji khubo befwala tsingubo tsiamakunia khandi nibakalakala mwikoshe.

⁴Ne olwa abakhalabani ba Esita abeshikhasi nende abalate betsa nibamuboolela aka Moridekai yali nakholanga, yabeelela muno. Narumila Moridekai tsingubo tsindayi tsiokhwifwala, kho mbu yefwalule tsingubo tsiamakunia, nebutswa Moridekai yaloba okhutsibukula.

⁵Mana Esita nalanga Hatsakhi, mulala khubakhalabani abalate bomuruchi, owa omuruchi yali niyahula okhukhalabanila Esita. Namuruma mbu atsie Moridekai amuboolele eshichila nakhola ario.

⁶Kho Hatsakhi narula natsia okhulola Moridekai mulwanyi, hashilibwa shiokhwinjila itookho.

⁷Moridekai naboolela Hatsakhi koosi akali nikekholeshe, khandi namuboolela eshichelo shia amapesa eshia Hamani yali nasuubisiye okhura mwibishilo liomuruchi khulwa okhwira Abayahudi boosi.

⁸Khandi nahelesia Hatsakhi ibarwa yelilako eliali nilitswanibwe mwitookho lia Susa, eliokhwiirwa okhwa Abayahudi. Moridekai namuboolela Hatsakhi mbu ayilile Esita ibarwa eyo, amwinoosilie amakhuwa ako shinga kali mana khandi amuboolele atsie khumuruchi amusaaye nende okhumusaba mbu alolele Abayahudi eshisa.

⁹Mana Hatsakhi natsia naboolela Esita aka Moridekai yali namubooleele.

¹⁰Esita naboolela Hatsakhi mbu atsie aboolele Moridekai ari,

¹¹“Abakhalabani bomuruchi nende abandu bomutsingongo tsiomuruchi boosi bamanya mbu, omundu yesi, abe omusaatsa noho omukhasi, owinjila mulwanyi lwomukari lweitookho nalalaanjilwe ta, liliho butswa lilako elala mbu, okhuula yeerwe. Nebutswa, omuruchi naba nachinguula indabushiye yeitsahaabu khulwa okhuhonia obulamu bwomundu oyo, omwenoyo shiaba aleerwa ta. Tsinyanga amakhumi kataru tsihwele omuruchi nashili okhunanga.”

¹²Ne olwa Moridekai yanyoola amakalusio okhurula khu Esita,

¹³yamurumila likalusio lino naboola ari; “Shiolapaara mbu iwe olahonokokha okhushila Abayahudi bandi boosi shichila mbu, oli itookho womuruchi tawe.

¹⁴Noba noholeela tsi khubise shinga bino, obuhabini nende obuhonia bwa Abayahudi bularula habundu undi. Nebutswa iwe nende abeshilibwa shienywe mulasikha. Ne shikamanyishe ta, haundi amakhuwa kano niko akachila iwe noba omukhaye womuruchi.”

¹⁵Mana Esita narumila Moridekai amakalusio ari,

¹⁶“Tsia okhung'asie Abayahudi boosi mwitookho lia Susa, mana mwiyime okhulia nimusaayila, mulaliakhwo kata okhunywakhwo eshindu shiosi khulwa tsinyanga tsitaru, eshilo nende eshiteere tawe. Nasi siesi nende abakhalabani banje abeshikhasi khulakhola khurio. Tsinyanga tsitaru etsio nitsihwele, ndalatsia imbeli womuruchi, kata lilako nililafuchilila ta. Nimba nifwa khulwa okhukhola kano, kho lekha efwe.”

¹⁷Kho Moridekai natsia nakhola koosi shinga Esita yali namulachilisiye.