Read wanga ESITA 5 Bible Online

ESITA 5 - wanga bible

ESITA 5

¹Khunyanga yakhataru yokhuhonga inzala, Esita yefwala tsingubotsie tsioluyali, ne natsia nasinjila mulwanyi lwomukari lweitookho oluli imbeli weinzu yoburuchi. Omuruchi yali mukari niyekhaale khushifumbishie shioburuchi nahenjile mushilibwa.

²Olwa omuruchi yalola Esita nasinjiile mulwanyi, yakoosibwa ninaye, ne nachinguula indabushiye eyoburuchi. Kho Esita natsia natiila khushikong'o shieindabushi eyo.

³Mana omuruchi namureeba ari, “Omukhaye Esita, nishiina eshibi? Mboolela eshia wenya, kata niwenya inusu yelihanga lianje ndalakhuhelesia.”

⁴Esita namukalusia ari, “Omuruchi nochama, iwe nende Hamani mwitse inyanga yino mwisabo eliekhukasiliye.”

⁵Mana Omuruchi nalachilisia ari, “Lanje Hamani yetse bwangu, khukhole aka Esita yekombile.” Kho omuruchi nende Hamani nibatsia mwisabo lia Esita yali nakaasiye.

⁶Olwa bali nibanywetsanga idivai, omuruchi yareeba Esita ari, “Nishiina eshia wenya ekhukholele? Kata niwenya inusu yelihanga lianje, ndalakhuhelesia.”

⁷Nebutswa Esita yakalusia ari,

⁸“Nimba ningoosibwe imbeli womuruchi, khandi omuruchi nachamile okhukholela elia enzenya okhumusaba, kho lekha omuruchi nende Hamani betse mwisabo elia engasiye mutsuli, mana ndalamuboolela elia enzenyile okhumureeba.”

⁹Kho Hamani yarula mwisabo inyanga eyo natsaatsahalile khandi nasangalile. Nebutswa olwa yoola hashilibwa shielitookho, Moridekai shiyasinjila noho okhuhaana oluyali imbeliwe tawe. Hamani yatiilwa noburuma obunji khu Moridekai.

¹⁰Nebutswa yesimilisia, ne natsia ingowe. Mana nalanga abetsabe nende Zereshi omukhasiwe.

¹¹Niyeyitsiala khulwa obuyindabwe obunji, abaanabe abanji, nende shinga omuruchi yali niyamwemekha khushifumbi shieikulu, khandi shinga olwa yali namuchinguulile okhushila abeemilisi bandi boosi.

¹²Natsiililila okhuboola ari, “Kata omukhaye Esita shialaanjilekhwo omundu undi yesi okhutsia nomuruchi mwisabo liakaasiye ta, habula isie sienyene. Khandi mutsuli ukhulaanjile halala nomuruchi okhutsia mwisabo liakaasiye.

¹³Kata kario, kano koosi shikangasila eshindu ta, olwa enzililila okhulola Moridekai omuyahudi mubukhalabani bwomuruchi hashilibwa shieitookho.”

¹⁴Mana abeetsabe abo nende Zereshi omukhasiwe nibamuboolela bari, “Lachilisia basinjisie omusaala kwokhumichilwakhwo omundu kwoburambi bwetsifuti amakhumi musaafu nende tsirano (75), mana mumabwibwi oboolele omuruchi alachilisie mbu Moridekai amichilwekho. Mana otsie mwisabo nende omuruchi nosangalile.” Hamani nachamisibwa nende likhuwa elo, kho nalaka mbu omusaala kwokhumichilwakhwo omundu kusinjisibwe.