Read wanga ESITA 6 Bible Online

ESITA 6 - wanga bible

ESITA 6

¹Eshilo tsana eshio, omuruchi shiyakonakhwo tsindoolo tawe. Kho nalachilisia mbu bamureerere eshitabu shiokhwitsulila amakhuwa kakhale mana bamusoomele.

²Mana nikanyoolekha nikahaandiikwamwo shinga olwa Moridekai yabuula obukhobi bwa Bigitsana nende Tereshi, abali abakhalabani abalate bomuruchi abalindi bokhumuliango, abali nibakasiiye okhwira omuruchi Ahasuwero.

³Omuruchi nareeba ari, “Noluyali shiina noho eshihaanwa shiina eshia Moridekai yaheebwa khulwa likhuwa lino?” Nabo abakhalabanibe nibamukalusia bari, “Shibulaho eshia yakholelwa tawe.”

⁴Omuruchi nareeba ari, “Niwiina khubemilisi banje ouli mulwanyi lweitookho?” Naye Hamani yali butswa niyakhenjila mulwanyi olwo, mbu aboolele omuruchi amakhuwa kokhumichila Moridekai khumusaala kwa yali namalile okhusinjisia.

⁵Kho abakhalabani nibakalusia omuruchi bari, “Hamani ngwoyo, asinjiile mulwanyi.” Omuruchi nakalusia ari, “Muboolele yenjile.”

⁶Kho Hamani niyenjila, omuruchi namureeba ari, “Omundu womuruchi achamile okhuhelesia oluyali anyala okhukholelwa shiina?” Hamani napaara mumwoywokwe omwene ari, “Niwiina oundi owa omuruchi anyala okhwenya okhuhelesia oluyali nalali isie?”

⁷Mana Hamani namukalusia ari, “Omundu wa iwe omuruchi wenya okhuhelesia oluyali,

⁸lachilisia mbu, tsikanzutsio tsioburuchi tsia wamala okhufwalakhwo tsireerwe, khandi lachilisia mbu, ifarasi ya wachendelakhwo yireerwe mana yifwalwe olusimbi lwoburuchi.

⁹Mana olachilisie mulala khubakhulundubo boluyali afwale omundu oyo obulayi, mana amuniinie nende okhumwikhasia khusishili eyo, amucheesie mulwanyi lwelitookho, narumbula nomwoyo omukhongo ari, ‘Lole, nolwa akholelwa omundu womuruchi achama okhuhelesia oluyali.’ ”

¹⁰Kho omuruchi naboolela Hamani ari, “Bwangu, bukula tsikanzu tsioburuchi etsio nende ifarasi, mana okholele Moridekai, omuyahudi wikhalanga hashilibwa shiomuruchi aka oboolile ako. Omukholele buli shindu shioboolile.”

¹¹Mana Hamani nabukula tsikanzu tsioburuchi nende ifarasi, ne nafwala Moridekai. Moridekai niyekhala khufarasi eyo, Hamani namuchesia mulwanyi lwelitookho narumbula nomwoyo omukhongo ari, “Lole, nolwa akholelwa omundu womuruchi achama okhuhelesia oluyali.”

¹²Mana Moridekai nakalukha hashilibwa shieitookho, naye Hamani nakalukha munzuye niyefuuniishe mubweni khulwa okhufimbwa omurwe.

¹³Mana Hamani naboolela Zareshi omukhasiwe nende abeetsabe boosi, koosi akali nikekholeshe. Mana abeetsabe abachetsi nende Zereshi omukhasiwe nibamuboolela bari, “Moridekai bulano uchaachile okhubukula obunyalibwo, ne olwa ali omuyahudi, shiolamunyala tawe. Toto mwene lakhuhula.”

¹⁴Ne olwa bali nibashiboolanga ninaye, abakhalabani abalate bomuruchi beetsa, ne bwangu nibabukula Hamani nibamuyila mwisabo lia Esita yali nakaasiye.