Read wanga ESITA 7 Bible Online

ESITA 7 - wanga bible

ESITA 7

¹Kho omuruchi nende Hamani nibatsia okhulia lisabo halala nende omukhaye Esita.

²Olwa bali nibanywetsanga idivai khunyanga yakhabili eyo, Omuruchi khandi nareeba Esita ari, “Omukhaye Esita, nishiina eshia wenya? Mboolela, kata nishiakhaba inusu yelihanga lianje lierukanga, ndalakhuhelesia.”

³Naye Esita nakalusia ari, “Omuruchi woluyali, nimba ningoosibwe imbeliwo, ekhusaba mbu nochama undeshe isie nende abandu banje khubeho abalamu.

⁴Isie nende abandu banje khumalile okhukusibwa, mbu khusasibwe, khwirwe khandi khumululwe fwesi pe okhurula khushialo. Nikakhabeele mbu khukusibwe butswa okhuba abasumba abeshikhasi nende abeshisaatsa shindakhachinjilekhwo omunwa ta, shichila akene ako shikakhanyasiye omuruchi tawe.”

⁵Mana Omuruchi Ahasuwero nareeba omukhaye Esita ari, “Outsaliishe okhukhola likhuwa lino niwiina? Ne ali heena?”

⁶Esita namukalusia ari, “Omusuku wefwe, oukhusandinjia nomundu omumayanu Hamani uno.” Mana Hamani natiilwa neindenga imbeli womuruchi nende omukhaye Esita.

⁷Omuruchi nasinjila bwangu muburuma, narula natsia mumukunda kweitookho, naye Hamani natong'a nasabanga obulesheli okhurula khumukhaye Esita, shichila yamanya mbu omuruchi atsia okhumuhelesia eshinyasio khulwa obumayanubwe.

⁸Olwa omuruchi yachelela okhurula mumukunda kweitookho, niyenjila munzu omwa bali nibanywelelenje idivai, yanyoola Hamani nasikaame ewa Esita yali niyesetamiye khushifumbi shiokhuhuluushilakhwo. Olwa omuruchi yamulola, yayiiba naboola ari, “Owatsana khandi yenya okhukwa khumukhaye wanje nendoola, mana munzu mwanje mwene?” Ne olwa yali nashiboolanga butswa ario, abakhalabanibe bafuunikha Hamani mumooni.

⁹Mana Haribona, mulala khubasumba abalate abakhalabanilanga omuruchi, naboola ari, “Lola, omusaala tsana kwoburambi tsifuti amakhumi karano, okwa Hamani abeele nakaasiye okhumichilakhwo Moridekai, owahonokosia obulamu bwomuruchi, kuli munzu mwa Hamani.” Omuruchi nalaka ari, “Mumichile khumusaala okwo.”

¹⁰Mana nibamichila Hamani khumusaala kwa yali nakasiiye khulwa Moridekai. Mana liruma liomuruchi niliihotselesia.