Read wanga ESITA 8 Bible Online

ESITA 8 - wanga bible

ESITA 8

¹Khunyanga tsana eyo, omuruchi Ahasuwero yahelesia omukhaye Esita, emiandu chia chiosi Hamani, owali omusuku wa Abayahudi. Mana Esita naboolela omuruchi mbu, Moridekai nomwikhowe, ne okhurula inyanga eyo Moridekai nafuchililwa okhwitsa imbeli womuruchi.

²Omuruchi nabukula ingakaye ya yali nabukule okhurula khu Hamani nahelesia Moridekai. Ne Esita nakhola Moridekai okhuba owokhusinjilila emiandu chiali chia Hamani.

³Mana Esita naboola nomuruchi khandi, nakwa hasi wamakulu komuruchi nalila amasika muno, namusaaya mbu arusieho amabi aka Hamani owolwibulo lwa Agagi yali nakasiliye Abayahudi.

⁴Mana Omuruchi nanyiilila Esita indabushiye yoburuchi, kho Esita nabuukha, nasinjila imbeli womuruchi, naboola ari,

⁵“Nikaba nikakhuchamisia iwe omuruchi, khandi nasi nimba ningoosibwa imbeliwo, chama ohandiche lilako liokhufukula tsibarwa tsiakholwa namachesi ka Hamani Omugagi, omusiani wa Hamedatsa, etsia yahandika okhumulula Abayahudi boosi abali mutsingongotsio tsiosi.

⁶Okhuba ndakhefwiila endie okhulola amabi ketsa okhukwila abandu banje? Kata ndakhefwila endie okhulola abekho banje nibeerwa?”

⁷Mana omuruchi Ahasuwero naboolela Esita omukhayewe nende Moridekai omuyahudi ari, “Lole ndamalile okhwira Hamani khulwa amabi ka yali nakasiye okhukholela Abayahudi, ne emianduchie ehelesiye Esita.

⁸Nebutswa lilako liosi eliahandikwa muliira liomuruchi, nilireebwakhwo eshibalikho shieingaka yoburuchi, abulaho ounyala okhulikalukhasia. Halali munyala okhuhandichila Abayahudi shinga olwa mwenyile, ne muhandiche muliira lianje mana murekhwo eshibalikho shieingaka yoburuchi.”

⁹Amakhuwa kano kekholekha khunyanga yamakhumi kabili nakhataru yomumwesi kwa Siwani. Moridekai yalanga abahandichi bomuruchi nababoolela amakhuwa kokhuhandichila Abayahudi, abarukanga ebikwenyi, abasinjilili, nende abakhongo boosi abasinjililanga ebikwenyi eshikhumi namakhumi kabili namusafu (127), okhurula India okhuula Etsiopia. Tsibarwa etsio tsiahandichilwa buli olukongo, khubuhandiche bwalwo, nende khubuli abandu mululimi lwabwe abeene.

¹⁰Moridekai yalaka tsibarwa etsio okhuhandikwa muliira liomuruchi Ahasuwero mana nitsireebwakhwo eshibalikho shieingaka yomuruchi. Mana natsiruma nabarume abachendela khutsifarasi tsiomuruchi tsietsimbilo muno, khandi etsiebulilwa mubitioli biomuruchi.

¹¹Tsibarwa etsio tsiafuchilila Abayahudi abali mumatookho koosi okhukhung'ana nende okhusinjilila akobulamu bwabwe; khandi tsiabafuchilila okhumulula, nokhwira nende okhusasia abandu boosi, aboluyia lwosi kata abolukongo lwosi abetsa nibeenya okhubaseera, noho abaana babwe, noho abakhasi babwe, nende okhuyaaya emiandu chiabwe chiosi.

¹²Abandu bachaaka okhutiila nende okhuloonda lilako elo mutsingongo tsiomuruchi Ahasuwero tsiosi khunyanga yali yokhwirwa khwa Abayahudi, niyo inyanga yekhumi nakhataru, eyomumwesi kwa Adari[3].

¹³Lilako elo liatswanibwa mutsimbia tsiosi tsiabandu, mbu, Abayahudi berecheshe inyanga eyo okhumala eshikwoli khubasuku babwe.

¹⁴Kho abarume bokhuchendela khutsifarasi etsielukhanga tsimbilo muno abo, nibatsia bwangu khulwa lilako liomuruchi mana lilako elo nilitswanibwa kata mwitookho likhongo lia Susa.

¹⁵Naye Moridekai narula ewa omuruchi yali niyefwalile tsingubo tsioburuchi tsindafu nende etsiabuluu, nali nolusimbi olukhongo lweitsahabu, khandi nali neingubo ifuubila yeikitani neisambarau. Mana abandu belitookho lia Susa nibakhupa tsingalakala nibekhoya.

¹⁶Abayahudi nibasangala, nibekhoya khandi nibaba noluyali.

¹⁷Ne mubuli litookho nende mubuli olukongo welilako liomuruchi elo liasoomwa, Abayahudi basangala nende okhwikhoya, nibalia lisabo khandi nibaba neinyanga ikhulundu. Abandu bandi abanji abeshialo eshio nibekhola Abayahudi, shichila bali nibabarire muno.