Read wanga ESITA 9 Bible Online

ESITA 9 - wanga bible

ESITA 9

¹Kho inyanga yekhumi nakhataru yomwesi kwa Adari niyula, inyanga yokhuhesia lilako liomuruchi, inyanga ya abasuku ba Abayahudi banayanga okhubeera. Nebutswa mushilenje eshio Abayahudi nibo ababeera.

²Habundu hosi aha Abayahudi bali nibamenya mubuli litookho lieshialo eshio, Abayahudi berechekha okhuseera omundu yesi outeema okhubasaalisia. Abandu buli habundu baria Abayahudi, ne abulaho owakhabaseerire tawe.

³Abakhongo betsingongo, abakafuna, abasinjilili nende abarume bomuruchi bakhoonya Abayahudi shichila boosi bali nibarire Moridekai.

⁴Kali nikamalile okhumanyikha mushialo shiosi shia Perisia mbu, Moridekai yali omundu owobunyali muitookho yomuruchi, ne khandi yali nameetanga okhuba nobunyali obunji muno.

⁵Kho Abayahudi bakholela abasuku babwe koosi akabenya, babaseera netsinganga nibabasinza nende okhubasasia.

⁶Mwitookho likhongo lia Susa, Abayahudi beera abandu ebikhumi birano (500).

⁷Khandi nibeera Parishandatsa, Dalifoni, Asipatsa,

⁸Poratsa, Adalia, Aridatsa,

⁹Parimashita, Arisai, Aridai nende Waizatsa,

¹⁰halala nabasiani ekhumi ba Hamani, owali omusiani wa Hamedatsa omusuku wa Abayahudi. Nebutswa Abayahudi shibabukula emiandu chiabwe tawe.

¹¹Khunyanga yene eyo, omuruchi yaboolelwa obunji bwabandu beerwa mwitookho lia Susa.

¹²Mana omuruchi naboolela omukhayewe Esita ari, “Mwitookho lia Susa lionyene Abayahudi beerire abandu ebikhumi birano halala nende abasiani ekhumi ba Hamani, kho aberirwe mutsingongo tsindi bakhaba banga! Kho eshindi shioreeba bulano nishiina? Ohelesibwe. Mboolela eshindi shia wenya, olahelesibwa.”

¹³Mana Esita namuboolela ari, “Nikaba nikakhuchamisia omwami, oleshe Abayahudi bali mwitookho elia Susa bakhole khandi mukamba aka bafuchililwe okhukhola olwa leelo. Khandi olache emibili chiabasiani ekhumi ba Hamani chielesibwe khumisaala.”

¹⁴Mana nalaka mbu amakhuwa ako kakholwe, ne lilako elo nilihaanwa mu Susa; kho emibili chiabasiani ba Hamani nichielesibwa khumisaala habulafu.

¹⁵Khunyanga yekhumi nakhane eyomumwesi kwa Adari, Abayahudi abali mwitookho lia Susa bakhung'ana khandi mana nibeera abandu ebikhumi bitaru (300) nebutswa khandi shibayaaya ebindu tawe.

¹⁶Abayahudi abali mutsingongo tsindi betsa halala khulwa okhwilinda abeene nende okhunyoola obuhuluushi okhurula khubasuku babwe. Beera abandu ebikhumila amakhumi musafu nabirano (75,000) abali nibabasila, nebutswa shibayaaya ebindu tawe.

¹⁷Ako kekholekha khunyanga yekhumi nakhataru yomwesi kwa Adari; Ne khunyanga yaloondakhwo yekhumi nakhane shibayeerakhwo abandu bandi ta habula bahuluukha nibayikhola okhuba inyanga ikhulundu.

¹⁸Nebutswa Abayahudi abali nibamenya mwitookho lia Susa bakhola inyanga yabwe eyelisabo khunyanga yekhumi nakharano shichila bali nibeerire abandu khunyanga yekhumi nakhataru nende eyekhumi nakhane.

¹⁹Niko akachilanga Abayahudi abamenya mumataala amatiiti bakholanga inyanga yekhumi nakhane yomwesi kwa Adari okhuba inyanga yabwe ikhulundu khandi eyokhutsaatsahala. Inyanga ya bahelesaninjia ebihaanwa bieshiokhulia khubashiabwe.

²⁰Moridekai yahandika amakhuwa kano hasi mana naruma tsibarwa khu Abayahudi boosi abali ahambi nende abali ehale mushialo shia Perisia shiosi.

²¹Yababoolela mbu betsulilenje inyanga yekhumi nakhane nende eyekhumi nakharano yomwesi kwa Adari buli khumuyika okhuba inyanga yabwe ikhulundu.

²²Etsio tsiali tsinyanga tsia Abayahudi bahulilakhwo abasuku babwe, ne omwesi kwa Adari kwali nikukalukhasibwe okhuba okwobutsaatsahafu mushilenje shieshibeela, okhwikhoya mushilenje shiamasika. Baboolelwa mbu betsulilenje tsinyanga etsio khulwa okhukhola amasabo nende okhwikhoya, tsiokhuhelesania ebihaanwa bieshiokhulia nende okhukhoonya abatakha.

²³Kho Abayahudi balonda lilako lia Moridekai, ne lisabo elo nilikholwa buli khumuyika.

²⁴Hamani omusiani wa Hamedatsa owomulwibulo lwa Agagi omusuku wa Abayahudi yali niyakhupa ikha ya Puri, eshisina mbu ikha yokhumanya inyanga yokhwira Abayahudi boosi. Yali niyerecheshe okhubamulula boosi.

²⁵Nebutswa olwa Esita omukhaye womuruchi yatsia khumuruchi, omuruchi nalaka mutsibarwa mbu, amakhuwa ka Hamani yali nakasiye kokhwira Abayahudi kamukalushe omwene. Ye nende abasianibe beleesibwa khumisaala chia yali niyarechekha.

²⁶Niko akachila lisabo lio nililangwa mbu, Purimu, khulwa okhubela tsibarwa tsia Moridekai yali nahandiche nende khulwa amakhuwa kali nikekholeshe khubo.

²⁷Abayahudi balikhola okhuba likako khubo abeene, nende khubetsinzu tsiabwe nende khumundu yesi oukwa omuyahudi mbu balalindanga tsinyanga tsibili etsio khundukho yatsio buli khumuyika shinga olwa lilako lialaka.

²⁸Khandi mbu tsinyanga etsio tsiletsulilwa nitsilindwa mubuli olwibulo, mubuli abeinzu, mubuli olukongo nende mubuli litaala; khandi mbu, tsinyanga tsibili etsio tsia Purimu tsilebililwakhwo mubayahudi noho kata eshitsulilo shiatsio okhwakama mutsinzibulo tsiabwe tawe.

²⁹Kho omukhaye Esita, omukhaana wa Abihaili halala nende Moridekai omuyahudi, bahaana obunyali mubuhandiche nibatinyisinjia ibarwa ya Moridekai yahandika khumakhuwa kalisabo lia Purimu.

³⁰Ibarwa eyo yahandichilwa Abayahudi boosi abali mutsingongo eshikhumi namakhumi kabili namusafu etsiomushialo shia Perisia shiosi. Ne yabekombela omulembe nende obuhuluushi.

³¹Ibarwa eyo yebaalila Abayahudi nende abetsinzibulo tsiabwe okhwitsulila tsinyanga tsia Purimu khunduukho yatsio, shinga olwa abeene bali nibaloondanga amalako kokhuhonga inzala nende akokhwikhuula. Ako kalakwa nende omukhaye Esita nende Moridekai.

³²Lilako lia Esita okhutinyisia amalako ka Purimu liahandikwa mushitabu eshikanye.