Read wanga OKHURULA 1 Bible Online

OKHURULA 1 - wanga bible

OKHURULA 1

¹Abaana ba Yakobo, abetsa okhumenya mushialo shia Misiri nende sabwe, buli mundu nende abeinzuye bali

²Rubeni, Simeoni, Lawi nende Yuda,

³Isakari, Zebuluni nende Banjamini,

⁴Dani nende Nafutali, Gadi nende Asheri.

⁵Abandu bolwibulo lwa Yakobo boosi bali amakhumi musaafu. Nebutswa Yosefu yali nali mushialo shia Misiri.[1]

⁶Mana Yosefu nafwa khandi abasiani babwe boosi nibafwa nibalekha tsinzibulo tsiabwe inyuma.

⁷Nebutswa abolwibulo lwa Yakobo beebulana nibaba abandu abanji muno. Bemeeta nibekhola abamaani muno. Bali abanji mana nibetsula mushialo shia Misiri shiosi.

⁸Ne omuruchi omuyiakha yetsa khuburuchi mushialo shia Misiri, oulaali niyamanya Yosefu tawe.

⁹Mana omuruchi oyo naboolela abandube ari, “Abandu ba Isiraeli bano nabanji muno, khandi bakhulile mana bali namaani amanji okhushila ifwe.

¹⁰Chende khubasandie, bakhetsukhana baba abanji, ne lihe niliba nilichaaka mwifwe, banyala okhungaana nende abasuku befwe ne nibakhuseera nende okhukhupana ninefwe nolunyuma nibelukha okhurula mushialo shiefwe.”

¹¹Khulweshio, abandu ba Misiri bemekha abasinjilili okhusinjilila abandu ba Isiraeli nibabanichililsia okhukhola emilimo emisiro. Khandi Abaisiraeli bombashila omuruchi wa Misiri litookho likhongo lia Pitsomu nende elia Ramesesi akalinjimwo ebiavchi biomuruchi.

¹²Nebutswa shinga olwa abandu ba Misiri basandia Abaisiraeli muno, nolwa nabo Abaisiraeli bebulana muno nibasalaana mushialo shia Misiri shiosi. Kho aba ndu ba Misiri nibaria Abaisiraeli muno.

¹³Mana abandu ba Misiri nibanichilisia abandu ba Isiraeli okhukhola emilimo emisiro muno.

¹⁴Khandi nibakhola obulamu bwabwe okhuba bwobunyakhani obubi muno khulwa emilimo emisiro mushiswalilo shiokhukaasia amatofari, nende okhukhosibwa emilimo chietsimbia tsiosi mumukunda. Mumilimo chiabwe chiosi, abasinjilili banichilisia Abaisiraeli nibabakhosia emilimo namaani, khandi shibabalolelakhwo tsimbabasi tawe.

¹⁵Mana omuruchi wa Misiri naboolela Shifura nende Puha, abakhasi bebusinjia abakhasi Abaheburania ari,

¹⁶“Olwa muba nimwibusia abakhasi Abaheburania, nimulola nibebula abaana abasiani okhuula mwire abaana abasiani abo. Nebutswa nibebula abaana abakhaana, muleshe abaana abo babeho mwoyo.”

¹⁷Nebutswa abakhasi bebusinjia abo baria Nyasaye ne nibalakhola shinga lwomuruchi wa Misiri yali nabalachile okhukhola ta, habula balekha abaana abasiani nibabaho mwoyo.

¹⁸Kho omuruchi wa Misiri nalanga abakhasi bebusinjia abo ne nabareeba ari, “Mbushiina nimulekha abaana abasiani ba Abaisiraeli okhubaho mwoyo?”

¹⁹Nabo abakhasi bebusinjia abo nibamukalusia bari, “Abakhasi Abaheburania shibali shinga abakhasi ba Misiri ta, okhuba bayungubala khandi bebulanga bwangu nikhushili okhuboolakhwo.”

²⁰Kho Nyasaye nakoosia abakhasi bebusinjia abo, ne nibebula abaana abanji.

²¹Mana Abaisiraeli nibebulana muno khandi nibaba abamaani amanji muno.

²²Olunyuma omuruchi wa Misiri nalachilisia abandube boosi ari, “Buli mwana omusiani, owibulwa munzu ya Abaheburania okhuula mumusukune mumwalo kwa Naili, ne muleshe abaana abakhaana babeho mwoyo.”