Read wanga OKHURULA 10 Bible Online

OKHURULA 10 - wanga bible

OKHURULA 10

¹Mana OMWAMI Nyasaye naboolela Musa ari, “Tsia ewomuruchi wa Misiri, okhuba ekholile omwoyokwe halala nende emioyo chiabakhongobe okhuba emitinyu. Ekholile endio shichila ndienyile mbu ekhole akamakana kano mubandu ba Misiri.

²Khandi ekholile endio shichila ndienyile mbu, munyale okhuboolela abaana benywe nende abetsukhulu benywe shinga olwa ndakhola Abamisiri okhuba abayingwa khulwebikhole biamakana ebia ekholanga. Ekholile ako kho mbu mumanye mbu, isie nisie OMWAMI Nyasaye.”

³Kho Musa nende Haroni nibatsia munzu mwomuruchi wa Misiri ne nibamureeba bari, “OMWAMI Nyasaye owa Abaheburania areebanga ari, ‘Olatsiililila okhwichinjimisia imbeli wanje okhuula liina? Lekhuula abandu banje batsie kho mbu, banzinamile.

⁴Ne noba nolalekhuula abandu banje batsia ta, notsiililila okhubahandakhwo, mukamba ndalareera tsisiche mushialoshio shino.

⁵Ne tsisiche etsio tsilaba tsinyinji muno mana tsilaama khwiloba liosi. Tsisiche etsio tsilalia buli shindu eshilasasibwe namachina keifula tawe.

⁶Tsisiche etsio tsiletsula munzumwo nende munzu tsiabakhongobo boosi nende munzu tsiabandu ba Misiri boosi. Mulalola tsisiche tsiabapaapa benywe kata abakuuka benywe bashili okhulolakhwo okhurula nibebulwa.’ ” Mana Musa nashiukhana narula ewomuruchi wa Misiri ne natsia.

⁷Kho abakhongo bomuruchi wa Misiri nibamuboolela bari, “Omuruchi wefwe, omundu uno nakhunyasie okhuula liina? Shiololangakhwo mbu, eshialo shia Misiri shisasiibwe ta? Lekhuula abandu Abaisiraeli batsie benamile OMWAMI Nyasaye wabwe.”

⁸Kho Musa nende Haroni nibareerwa ewomuruchi wa Misiri, naye nababoolela ari, “Munyala okhutsia okhwinamila OMWAMI Nyasaye wenywe, habula mumboolelekhwo mbu, abakhoyile okhutsia beene, nibeena?”

⁹Musa namukalusia ari, “Abandu boosi, okhuchaachila khubaana okhuula khubakofu, boosi pe bakhoyile okhutsia. Khulatsia nende abaana befwe abasiani nende abakhaana, tsing'ombe tsiefwe, amakondi kefwe nende tsimbusi, shichila kenyekha mbu khukhole lisabo khulwa okhuhelesia OMWAMI Nyasaye wefwe oluyali.”

¹⁰Kho omuruchi wa Misiri nakalusia Musa ari, “Nditsuba muliira lia OMWAMI Nyasaye mbu, shindalafuchililakhwo mbu, nimutsia mubukule abakhasi benywe nende abaana benywe mutsie ninabo tawe! Kamalile okhulolekha habulafu mbu, inywe mututanga amakhuwa kokhureera induli.

¹¹Tawe! Nikaba mbu, eliene elo neliamwenyanga, leshe abasaatsa bonyene batsie benamile OMWAMI Nyasaye.” Mana Musa nende Haroni nibalondwa okhurula imbeli womuruchi wa Misiri.

¹²Mana OMWAMI Nyasaye naboolela Musa ari, “Chinguula omukhonokwo khushialo shia Misiri mbu, tsisiche tsitse. Tsisiche tsileetsa nitsilia ebindu biaraakwa biosi pe nende eshindu shindi shiosi, tsilalia ebindu ebilaasasibwa nende ifula yamachina tawe.”

¹³Mana Musa nachinguula indabushiye mwikulu, ne OMWAMI Nyasaye nakhola omuyeka okhurula ebukwe nikuhutsa khushialo inyanga eyo yoosi nende eshilo shieinyanga eyo shiosi. Ne olwa bwashia, omuyeka kwebukwe okwo kwali nikumalile okhureera tsisiche.

¹⁴Mana tsisiche etsio nitsiitsa tsinyinji nitsiama khushialo shiosi. Tsisiche tsinyinji shinga etsio shitsiali nitsietsakhwo khushialo shia Misiri tawe. Ne khandi shitsiakhabekhwoho etsindi shinga etsio tawe.

¹⁵Tsisiche etsio tsiama khushialo okhuula nishiilima ti. Tsialia buli shindi shiali nishilasasiibwe nende amachina keifula ta, halala nende ebiamo biokhumisaala biosi pe. Tsialia buli lisaafu khumisaala mana emisaala nichitoong'a nichibula amasaafu nende ebiamo.

¹⁶Mana omuruchi wa Misiri nalanga Musa nende Haroni bwangu bwangu nababoolela ari, “Ndayonooneele OMWAMI Nyasaye, Nyasaye wenywe, nende inywe.

¹⁷Bulaano emusaaya mbu, mumbeele obwonooni bwanje, eliemusaaya olwokhumalilisia ndielino mbu, muchame musaaye Nyasaye wenywe yarusiekhwo eshinyasio shiokhufwa shino.”

¹⁸Kho Musa narula munzu womuruchi wa Misiri ne nasaaya OMWAMI Nyasaye.

¹⁹OMWAMI Nyasaye nashiukhasia omuyeka kwali nikuhutsanga okhurula ebukwe, nikuchaaka okhuhutsa okhurula Mumbo. Omuyeka okwo kwamala kuhutse tsisiche etsio tsiosi nikutsichoomiye munyanza inzakhanyu. Omuyeka kwahutsa tsisiche etsio tsiosi. Shiyatong'akhwo khushialo shia Misiri isiche kata ndala yonyene tawe.

²⁰Nebutswa OMWAMI Nyasaye yakhola omwoyo kwomuruchi wa Misiri okhuba omutinyu ne naloba okhulekhuula abandu ba Isiraeli okhurula okhutsia.

²¹Kho OMWAMI Nyasaye naboolela Musa ari, “Nyiila omukhonokwo kuhenje mwikulu, ne eshiilima shilabaho eshimali ti, shiomundu alanyala okhulola eshindu shiosi shiosi mushialo shia Misiri tawe.”

²²Kho Musa nanyiila omukhonokwe nikuhenjile mwikulu ne eshialo shia Misiri nishiilima ti khulwa tsinyanga tsitaru.

²³Abamisiri shibanyalilwa okhulolana abeene khu beene ta, ne shibarulakhwo elwanyi okhuchenda ta, habula batong'a butswa munzu. Nebutswa omubasu kwali mushialo shia Gosheni, ewa Abaisiraeli bali nibamenya.

²⁴Omuruchi wa Misiri nalanga Musa namuboolela ari, “Iwe halala nende abaana benywe nabakhasi benywe munyala okhutsia okhwinamila Nyasaye. Habula shimulatsia nemiruko chienywe ta, mulachilekha hano.”

²⁵Naye Musa nakalusia omuruchi wa Misiri ari, “Kho oba olakhuhelesia emiruko chiokhumala emisango nende chiokhukholela OMWAMI Nyasaye wefwe emisango misambe.

²⁶Okhuula khutsie nemiruko chiefwe chiosi, shikhulalekhakhwo kata oluhakayu lulala lwonyene tawe. Eshichila khutsie ninachio, shikhumanyile mbu OMWAMI Nyasaye niyenye omusango okhurula khumiruko shiina tawe. Khulamanya nikhwakholayo.”

²⁷Nebutswa OMWAMI Nyasaye yakhola omwoyo kwomuruchi wa Misiri okhuba omutinyu ne nalafuchilila abandu ba Isiraeli okhutsia tawe.

²⁸Mana omuruchi wa Misiri nayibila Musa namuboolela ari, “Tsia, ndula mumoni, ne khandi shindalakhulolakhwo kata inyanga ndala yonyene ta! Olwa ndilikhulola, nolwa wakhafwe.”

²⁹Musa namukalusia ari, “Oli habwene, shinaundolekhwo khandi tawe.”