Read wanga OKHURULA 11 Bible Online

OKHURULA 11 - wanga bible

OKHURULA 11

¹OMWAMI Nyasaye yaboolela Musa ari, “Ndalaruma eshinyasio shindi shilala khumuruchi wa Misiri nende khubandube boosi. Olunyuma lweshinyasio eshio, omuruchi alamulekhuula, nenywe mulatsia. Kata kario shialamulekhuula butswa ta, alamulonda bulonda okhurula mushialoshie.

²Bulaano tsia oboolele abandu ba Isiraeli mbu, basabekhwo abamenyanwa babwe ebiuma bieitsahabu nende bieifetsa.”

³Mana OMWAMI Nyasaye nakhola Abamisiri okhuhelesia abandu ba Isiraeli oluyali. Khandi, abakhongo bomuruchi wa Misiri nende abandu ba Misiri boosi bamala balole Musa okhuba shinga omundu omukhongo muno.

⁴Mana Musa naboolela omuruchi wa Misiri ari, “OMWAMI Nyasaye aboola ari, ‘Mushilo shieinyanga yino hakari, ndalabira mushialo shia Misiri,

⁵ne buli omwana omwikulanda wa Abamisiri alafwa, okhuchaachila khumwana wambeli womuruchi wa Misiri oulilaamilwa obwami omuruchi nafwile, okhuula khumwikulanda womukholi weshikhasi, ousietsanga imele khuluchina. Okhumeetakhwo, emiruko emiikulanda chiebulwa chiosi khandi chilafwa.

⁶Okhwikhuula khulaba mushialo shia Misiri okhulashiabakhwoho ta, ne khandi okhwikhuula khweimbia eyo shikhwakhabekhwoho inyanga yindi tawe.

⁷Nebutswa abandu ba Isiraeli balatong'a nibaliho mwoyo. Kata emiruko chiabwe, noho imbwa shinayisemelekhwo Abaisiraeli, noho emiruko chiabwe tawe. Nolwa mulamanya mbu, isie OMWAMI Nyasaye nisie owahukhasinjia Abamisiri okhurula khu Abaisiraeli.’ ”

⁸Musa yamalilisia naboolela omuruchi wa Abamisiri ari, “Abakhongobo bano boosi nibetse nibanzinamila khandi nibaasaaya mbu, embukule abandu ba Isiraeli boosi mana khurule khutsie. Nibamalile okhuusaaya bario, nolwa nerule nenzia nende abandu ba Isiraeli.” Kho Musa narula ewomuruchi wa Misiri nasinyiishe po.

⁹Naye OMWAMI Nyasaye naboolela Musa ari, “Omuruchi wa Misiri alatsiililila okhuloba okhulekhuula abandu banje, ne ndalakhola akamamakana kandi amanji mushialo shia Misiri.”

¹⁰Musa nende Haroni bakhola akamakana ako koosi imbeli womuruchi wa Misiri, nebutswa OMWAMI Nyasaye yakhola omwoyo kwomuruchi okhuba omutinyu mana omuruchi oyo nalafuchilila abandu ba Isiraeli okhurula mushialoshie okhutsia tawe.