Read wanga OKHURULA 12 Bible Online

OKHURULA 12 - wanga bible

OKHURULA 12

¹OMWAMI Nyasaye naboolela Musa nende Haroni nibali mushialo shia Misiri ari,

²“Omwesi kuno nikwo okulabetsanga omwesi kwenywe kwambeli, kwomuyika.

³Mulachilisie abandu ba Isiraeli boosi nimubaboolela muri, ‘Khunyanga yekhumi yomwesi kuno, buli omusaatsa yaahule eshimeeme shielikondi noho eshieimbusi, khulwa abomunzuye.

⁴Ne abomunzuye nibaba nibali batuutu butswa, kho okhuula alie nende omumenyaniwe okhulondana nende obunji bwabandu abo. Mana buli mundu aliekhwo inyama eyo.

⁵Munyala okhwaahula eshimeeme shielikondi noho shieimbusi, habula okhuula shibe eshiomuyika mulala. Ne khandi shibe eshibulakhwo obulema bwosi bwosi bwosi tawe.

⁶Mana khubwile bweinyanga yekhumi nakhane yomumwesi okwo, abandu ba Isiraeli boosi basinze ebimeeme biabwe.

⁷Mana babukule amalasile kabatasiiye okhurula mubimeeme ebio, babashe khubiyindi biemiliango nende hekulu wemiliango chietsinzu tsiababa nibaliiliilemwo.

⁸Eshilo shieneshio, basambe inyama yeneyo mana bachilie halala nende eliani[7] lilulu nemikaate chibulamwo limela.

⁹Shimulaliekhwo inyama eyo niyishili imbisi noho niyiteeshilwe tawe. Habula muchilie niyisambilwe. Mulie kata nende omurwe, nende ebilenje halala nende ebiomunda biayo biosi.

¹⁰Shimulalekhakhwo inyama yosi yosi yitoonye okhuula mumabwibwi ta, ne niyiba niyitoong'a okhuula muchisambe yoosi.

¹¹Mulie ebiokhulia bienebio bwangu bwangu, nimusinjiile, khandi nimwifwalile tsingubo tsienywe nende ebilaaro, khandi nimutiilile tsindabushi tsienywe chioluchendo. Elo nilio Lisabo lia Pasaka, elia mulakholanga khulwa okhunzinamila isie OMWAMI Nyasaye wenywe.’

¹²“Eshilo shieinyanga yeneyo eyo, isie nenzire abaana abasiani ebekulanda ba Abamisiri boosi, nende emiruko chieshisaatsa emikulanda chiabandu ba Misiri boosi. Khandi ndilihelesia abanyasaye ba Misiri boosi eshinyasio. Isie nesie OMWAMI Nyasaye.

¹³Ne amalasile ako kalaba eshilolelo shiokhumanyia tsinzu tsiamulimwo. Ne olwa ndalalola amatsayi ako, ndalamubirakhwo, olwa ndalaba nindiiranga abaana bambeli ba Abamisiri, shinditsa okhwira abaana benywe tawe.

¹⁴Okhuula mukholenje lisabo lino shinga omulukha kweidiini, okhwokhwitsulila eshia isie OMWAMI Nyasaye ndamukholela inywe. Mukholenje lisabo elo emiyika chiosi.”

¹⁵OMWAMI Nyasaye naboola ari, “Khulwa tsinyanga musaafu tsilondokhana, shimulaliekhwo omukaate kulimwo limela tawe. Nebutswa mulie omukaate kubulamwo limela. Khunyanga yambeli, murusie mutsinzu tsienywe limela liosi, shichila omundu yesi yesi ouliakhwo omukaate kunyoobeelwemwo limela mutsinyanga musaafu etsio, shialabalwa shinga mulala khubandu banje tawe.

¹⁶Ne khandi khunyanga yomusaafu eyo, okhuula mwakaane halala khulwa okhunzinamila. Shimulakholekhwo omulimo kwosi kwosi munyanga tsienetsio tawe, omulimo kwa mulakholanga, nokhuteekha ebiokhulia.

¹⁷Mukholenje lisabo elo khulwa okhwitsulila mbu, okhuba khunyanga eyo, nolwa ndamurusia mushialo shia Misiri. Ne khandi mubulamu bwenywe bwosi, okhuula mukholenje lisabo lieinyanga eyo.

¹⁸Muchaachenje okhulikhola khubwile khunyanga yekhumi nakhane, eyomwesi kwambeli okhuula khunyanga yamakhumi kabili nalulala, eyomwesi kwenokwo. Mutsinyanga musaafu etsio tsiosi, shimulaliekhwo omukaate kuukaasiliibwemwo limela tawe.

¹⁹Ne omundu yesi yesi ouliakhwo omukaate kulimwo limela mutsinyanga musaafu etsio, noho kata limela linyooleshekhwo munzuye, omundu oyo abe Omuisiraeli, noho omucheni owamenya butswa mwinywe, shialabalwa shinga mulala khubandu banje tawe.

²⁰Shimulaliekhwo eshindu shilimwo limela ta, habula mutsinyanga etsio muliitenje emikaate chibulamwo limela.”

²¹Mana Musa nalanga abemilisi ba Isiraeli boosi ne nababoolela ari, “Buli mulala khwinywe alobole eshimeeme shielikondi noho eshieimbusi, mana ashisinze kho mbu, abeinzuye bakhole lisabo lia Pasaka.

²²Mubukule eshiangwe mana mwinishe mushindu shia mutatsiliyemwo amalasile mana mubashe amalasile keshimeeme ako khubiyindi nende hekulu wemiliango chienywe. Ne omundu yesi yesi shialarulakhwo munzu omwo eshilo ta, okhuula mulinde bushie kho murule.

²³Olwa OMWAMI Nyasaye alaba nabiranga niyera abekulanda ba Abamisiri, alalola amalasile khubiyindi biemiliango ne shialafuchilila omumalaika wokhwira okhwinjila mutsinzu tsienywe niyera abekulanda benywe tawe.

²⁴Inywe nende abolwibulo lwenywe muhulile amalako kano mana mukalondenje emiyika chiosi.

²⁵Mana olwa muliula mushialo eshia OMWAMI Nyasaye atsia okhumuhelesia, okhuula mukhole lisabo elo.

²⁶Ne olwa abaana benywe balimureeba bari, ‘Lisabo lino likholungwa khulwa shiina?’

²⁷Nenyu mulibakalusinjia muri, ‘Omusango kwelisabo lia Pasaka kuno khukukholanga khulwa okhuhelesia OMWAMI Nyasaye oluyali, shichila yabura khutsinzu tsia Abaisiraeli ne niyeera abekulanda ba Abamisiri nnende okhuhonokosia abaana babwe.’ ” Olwa abakhongo ba Abaisiraeli bahulila amakhuwa ako, benamia emirwe chiabwe nibamwinamila OMWAMI Nyasaye.

²⁸Mana nibatsia okhukhola shinga olwa OMWAMI Nyasaye yali nalachile Musa nende Haroni.

²⁹Mana mushilo hakari, OMWAMI Nyasaye niyera abaana abekulanda ba Abamisiri boosi, okhuchaachila khumwana womuruchi wa Misiri, owali niyalaamilwa obwami okhuula khumwana womundu omuhambe, owali nali mubuhambe mushialo shia Misiri. Kata ebikulanda biemiruko biosi bierwa.

³⁰Mana omuruchi, abakhalabanibe boosi nende Abamisiri boosi nibabuukha mushilo hakari. Okhwikhuula nikhubaho okhukhongo muno okhuba shiyaliho inzu kata ndala yomwana omusiani alaali nafwilemwo tawe.

³¹Eshilo shieneshio butswa, omuruchi wa Misiri yarumana mbu Musa nende Haroni balangwe. Olwa betsa, yababoolela ari, “Inywe nende abandu benywe rule mushialo shianje mutsie. Tsie nemiruko chienywe mwinamile Nyasaye wenywe shinga olwa mwaboola.

³²Bukule emiruko nende biayo bienywe biosi mana mutsie shinga olwa mwaboola, khandi siesi musabilekhwo ikhabi.”

³³Abamisiri banichilisia abandu ba Isiraeli okhurula mushialo shiabwe bwangu mbu benyoshe nibababoolela bari, “Chame mutsie, nimulatsia ta fwesi khulafwa.”

³⁴Kho abandu ba Isiraeli nibabukula obusie bwabali nibanyoobile nibubulamwo limela, nibabura mubindu biabanyoobelangamwo nende okhuboya ebindu ebio netsingubo tsiabwe, nibetuukha khumakeka.

³⁵Abaisiraeli bali nibakholile shinga olwa Musa yali nababooleele, khandi bali nibasabile ebiuma bieifetsa nende bieitsahabu halala netsingubo okhurula khubandu ba Misiri.

³⁶OMWAMI Nyasaye yali nakholile Abamisiri okhuhelesia Abaisiraeli oluyali nende okhubahelesia biosi ebia Abaisiraeli babasaba. Nolwa Abaisiraeli barulilamwo Misiri nobuyinda bwa Abamisiri bario.

³⁷Abaisiraeli bachaaka oluchendo lwabwe khubilenje okhurula Ramesesi nibahenjile Sakotsi. Abasaatsa bonyene Abakhasi nende abaana nibabulakhwo, bali ebikhumila ebikhumi bisasaba (600,000).

³⁸Okhumeetakhwo, Abaisiraeli batsia nomukanda omukhongo kwabandu abalaali Abaisiraeli tawe, nende amakondi amanji, tsimbusi halala nende tsing'ombe tsinyinji.

³⁹Banyooba emikaate chibulamwo limela okhurula khubusie bwabali nibarusiye Misiri, shichila bali nibalondilwe okhurula Misiri bwangu muno, mana shibaali nende ebise bihela okhunyooba obusie bwotekhwamwo emikaate chilimwo limela ta, kata shibaali nibabukuulekhwo ebiokhwikhoonyela khuluchendo tawe.

⁴⁰Abaisiraeli bamenya Misiri khulwemiyika ebikhumila bine nende amakhumi kataru.

⁴¹Ne inyanga yeneyo ya bosiliakhwo emiyika ebikhumila bine nende amakhumi kataru eyo, niyo eya barulilakhwo Misiri.

⁴²Olwa OMWAMI Nyasaye yalinda abandu ba Isiraeli nabarusia Misiri mwali mushilo. Okhuba mbu OMWAMI Nyasaye yahonga nalindile abandu ba Isiraeli okhurula Misiri, eshilo shieneshio shiamala nishikholwa eshiahule shia OMWAMI Nyasaye. Mana khushitsulilo shieshilo eshio, buli muyika abandu ba Isiraeli bekhalanga meeso nibalakonakhwo tawe.

⁴³OMWAMI Nyasaye yaboolela Musa nende Haroni ari, “Kano niko amalako ka mwitsa okhwikhoonyelanga olwa muba nimukhola lisabo lia Pasaka. Ne omurende yesi yesi shialaliakhwo lisabo lino ta, nebutswa,

⁴⁴Omusumba wa mwakula anyala okhuliakhwo lisabo lia Pasaka lino nikaba mbu, ashebwa.

⁴⁵Omundu witsile okhumenyakhwo ninenywe hatuutu butswa noho owamulanjile mbu amukholelekhwo emilimo hatutu butswa, shialaliakhwo lisabo lienywe lia Pasaka tawe.

⁴⁶Lisabo lino okhuula liliilwe munzu eyikaasibwe okhuliilwamwo. Ebiokhulia biliibwa mwisabo lino shibilarulakhwo munzu wa bikasiliibwe omwo tawe. Ne olwa mulia inyama yelisabo lino, shimulamenenekhwo ebikumba bieshimeeme shielisabo lia Pasaka tawe.

⁴⁷Aboluyia lwa Isiraeli boosi okhuula bakholenje lisabo lia Pasaka lino obulachweya tawe.

⁴⁸Nebutswa omundu omusinde shialaliakhwo lisabo lino tawe. Omundu oulali Omuisiraeli niyetsa okhumenya mwinywe naba niyenya okhuliakhwo lisabo lino khulwa okhuhelesia OMWAMI Nyasaye oluyali, okhuula abe niyashebwa khandi abandu beinzuye boosi okhuula babe nibashebwa. Omundu oyo nende ebeinzuye nibamalile okhushebwa, bulaano balaba nibali shinga abebule babandu ba Isiraeli ne banyala okhuliakhwo lisabo lia Pasaka.

⁴⁹Lilako lieshishebo lino okhuula lilondwe nende abebule ba Isiraeli boosi halala nende abandu bandi boosi abetsa okhumemya hakari munywe.”

⁵⁰Abandu ba Isiraeli boosi bahulila khandi nibalonda amakhuwa ka Musa nende Haroni bali nibababooleele, mana nibakhola shinga olwa baboolelwa.

⁵¹Ne khunyanga yeneyo, OMWAMI Nyasaye yarusia tsimbia tsiabandu ba Isiraeli boosi okhurula mushialo shia Misiri.