Read wanga OKHURULA 13 Bible Online

OKHURULA 13 - wanga bible

OKHURULA 13

¹OMWAMI Nyasaye yaboolela Musa ari,

²“Waahule abaana abasiani abekulanda boosi babe abanje. Khandi mwahule emiruko chieshisaatsa chiambeli chiosi chibe echianje.”

³Mana Musa naboolela abandu ba Isiraeli ari, “Mwitsulilenje inyanga yomwesi kwambeli yino shinga inyanga ya mwarulilakhwo Misiri, ewa mwali ababohe. Ne Nyasaye yamurusiayo nobunyalibwe. Kho mulaliekhwo omukaate kulimwo limela khunyanga yino tawe.

⁴Inywe murulanga Misiri omwesi kwambeli kuno, nikwo omwesi kwa Abibu.

⁵Olwa OMWAMI Nyasaye alamureera mushialo eshia Abakanani, Abahiti, Abahiwi, nende Abayebusi, eshia yetsuba okhuhelesia abakuuka benywe, eshialo eshiyinda khandi eshinulu, mwitsulilenje inyanga yino buli khumwesi.

⁶Khulwa tsinyanga musaafu mulalitsanga emikaate chibulamwo limela, ne khunyanga yomusaafu khulwa tsinyanga musaafu etsio, mulakaasia lisabo liokhuhelesia OMWAMI Nyasaye oluyali.

⁷Khulwa tsinyanga musaafu shimulaliakhwo omukaate kulimwo limela tawe. Omukaate kulimwo limela shikulanyoolekha khwo hosi hosi mushialo shienywe tawe.

⁸Mukhuchaaka khwelisabo elo, muboolele abaana benywe mbu, mukholanga lisabo lia Pasaka elo khulwa okhwitsulila amakhuwa aka OMWAMI Nyasaye yamukholela olwa yamurusia Misiri.

⁹Mana lisabo lino lilaba shinga eshilolelo, eshili khumikhono chienywe khandi eshitsulilo eshili khubweni bwenywe, okhumwitsusia okhuliinda amalako aka OMWAMI Nyasaye khulwa okhumurusia Misiri, okhubirira mubunyalibwe obukhongo.

¹⁰Mukholenje lisabo lino ebise bia liahuliilwe okhukholungwa buli muyika.”

¹¹“Ne olwa OMWAMI Nyasaye nabe namuusie inywe mushialo shia Kanani, eshia yetsuba okhuhelesia abakuuka benywe, namuhelesie inywe eshialo eshio mbu shibe eshienywe,

¹²okhuula muhaane abaana benywe abasiani abekulanda khu OMWAMI Nyasaye, halala nende emiruko chiosi emikulanda echibulwa mumataala kenywe. Ebikulanda ebisaatsa bino biosi okhuula bilabetsanga ebia OMWAMI Nyasaye.

¹³Nebutswa isishili niyiibula eshimoosi eshikulanda eshisaatsa, eshieneshio okhuula mubinunulenje khulwa okhuhaana eshimeeme shielikondi mushileje shieshimoosi shieisishili eshio. Ne nimuba nimulenya okhushinunula ta, mushifunache likosi. Khandi okhuula mununulenje omwana wenye omusiani, omwikulanda womubaana benywe.

¹⁴Ne mutsinyanga tsitsanga, olwa abaana benywe bamureeba inywe eshifune shiamakhuwa kano, mulibaboolela mbu, mukholanga murio khulwokhuhelesia OMWAMI Nyasaye oluyali, shichila yamurusia Misiri nobunyali obukhongo, ewa mwali abasumba.

¹⁵Olwa omuruchi wa Misiri yaloba okhumulekhuula inywe mbu, mukalushe mushialo shienywe, OMWAMI Nyasaye yeera abasiani abekulanda boosi nende emiruko emikulanda chia Abamisiri chiosi. Khulweshio khuhaananga emiruko chiefwe chieshisaatsa emikulanda shinga omusango khu OMWAMI Nyasaye, nebutswa khununulanga abaana befwe abasiani abekulanda.

¹⁶Lisabo lino lilabetsanga shinga eshilolelo eshili khumikhono chienywe nende khubweni bwenywe. Shilakhwitsusinjia ifwe shinga olwa OMWAMI Nyasaye yakhurusia mushialo shia Misiri nobunyali obukhongo.”

¹⁷Olwa omuruchi wa Misiri yalekhuula abandu ba Isiraeli okhukalukha ewabwe, Nyasaye shiyabemilila okhubirira khunjila inyimbichiti, eyibiriranga mushialo shia Abafilisiti ta, kata kario injila eyo niyo eyali inyimbichiti. Nyasaye yaboola ari, “Shindienya abandu bano bafwe emioyo chiabwe mana bakalushe mushialo shia Misiri, olwa balamanya mbu okhuula bakhupane lihe tawe.”

¹⁸Nebutswa yababisilia khunjila eyibotokhananga okhubirira mushitsiimi niyichoomile khunyanza inzakhanyu. Abandu ba Isiraeli bali nibemanuule khulwa okhulwana lihe.

¹⁹Mana Musa nabukula amakumba ka Yosefu okhutsia ninako shichila, Yosefu yali niyalachilisia Abaisiraeli, nabakhola okhwitsuba naboola ari, “Olwa Nyasaye alimuhonokosia, okhuula muchinje amakumba kanje okhurula mushialo shino mutsie ninako.”

²⁰Mana Abaisiraeli nibachenda okhurula Sukotsi okhuula Etsamu, nibakhupa ikambi yabwe khundulo weshitsiimi.

²¹Olwa bali nibenyokhanga, OMWAMI Nyasaye yabemilila imbeli mushiteere nali musiilo yelileesi. Ne mushilo, OMWAMI Nyasaye yabemililanga injila nende isiilo yomulilo.

²²Buli lwosi isiilo yelileesi yabemililanga eshiteere, ne eshilo isiilo yomulilo yabemililanga.