Read wanga OKHURULA 14 Bible Online

OKHURULA 14 - wanga bible

OKHURULA 14

¹Mana OMWAMI Nyasaye naboolela Musa ari,

²“Boolela abandu ba Isiraeli bakalushe bakhupe ikambi yabwe imbeli wa Pi-hahirotsi, hakari wa Migidoli nende inyanza inzakhanyu, ahambi nende Baali Zefoni.

³Okhuba omuruchi wa Misiri alapaara mbu, shimumanyile ewamutsitsanga ta, khandi mbu, mukoreere mushitsiimi.

⁴Nasi ndalakhola omwoyokwe okhuba omutinyu, ne alabalondachilakhwo. Nasi isie omwene ndalakhola omuruchi wa Misiri halala nende abandube belihe bambelesie oluyali.” Kho abandu ba Isiraeli nibakhola shinga olwa OMWAMI Nyasaye yali nababooleele okhukhola.

⁵Olwa omuruchi wa Misiri yaboolelwa mbu, abandu ba Isiraeli bali nibeluushe, omuruchi oyo halala nende abakhongobe bakalukhasia amapaaro kabwe khubo ne nibaboola bari, “Eshikhachilile nikhulekhuula abandu ba Isiraeli okhutsia, nibalekha okhukhukholela emilimo nishiina?”

⁶Kho omuruchi narechekha abandube belihe, nibalondachila khu Abaisiraeli.

⁷Nabukula amakaari akeshialo shia Misiri koosi halala nende amakaari ebikhumi bisasaba, kabelihebe. Kho natsia ninabo, halala nende abelihebe abalulu boosi.

⁸Khandi OMWAMI Nyasaye natsiililila okhukhola omwoyo kwomuruchi wa Misiri okhuba mutinyu, ne omuruchi oyo nalondachila khubandu ba Isiraeli, abali nibarulanga mushialo shia Misiri munjila yobuhuli muno.

⁹Mana abelihe ba Misiri, nibali netsifarasi nende abachendelanga khumakari nibalondachila khubandu ba Isiraeli. Nibanyoola abandu ba Isiraeli nibali mukambi ya bali nibakhupile ahambi khunyanza inzakhanyu, eyali hakari wa Pi-hahirotsi nende Baali Zefoni.

¹⁰Olwa abandu ba Isiraeli balola omuruchi wa Misiri namakaarike halala nende abelihebe nibabalondachilanga, baria muno ne nibachaaka okhuhabila OMWAMI Nyasaye mbu, abakhoonye.

¹¹Khandi nibareeba Musa bari, “Tsing'ani tsibeele nitsihwele mushialo shia Misiri kho nokhureera mushitsiimi muno okhwirirwamwo mbu khuleshe okhuyabilwa noho? Mbushiina nokhurusia mushialo shia Misiri?”

¹²Shikhwakhuboolelakhwo nikhushuli okhurula Misiri mbu, kano kalekholekha? Khwakhuboolela mbu, okhuleshe khutsiililile butswa okhuba abasumba aba Abamisiri. Bwakhabeele obulayi ifwe okhutsiililila okhuba abasumba ebweneyo, okhushila okhufwila mushitsiimi muno.

¹³Naye Musa nabakalusia ari, “Yume ikholo mana musinjile nimutinyile, ne mulalola shinga olwa OMWAMI Nyasaye alabahonia inyanga yino. Emboola endio shichila, shinga olwa mubalola murio, kho mubalolanga olwokhumalilikha. Shimulibalolakhwo khandi tawe.

¹⁴OMWAMI Nyasaye mwene alamulwanila inywe, shiendolakhwo eshimuhendinjia emioyo ta, inywe mutinye butswa.”

¹⁵Kho OMWAMI Nyasaye nareeba Musa ari, “Eshichilanga niuhabila nishiina? Boolela abandu ba Isiraeli batsiililile imbeli.

¹⁶Nawe chinguula ikulu weinyanza inzakhanyu omukhonokwo okulimwo indabushi okwo, ne inyanza ilakabukhanamwo akhandi khabili. Mana abandu ba Isiraeli balabira munyanza khumuyeshe.

¹⁷Nasi ndalakhola emioyo echia Abamisiri okhuba emitinyu ne balenjila munyanza okhumulondachilakhwo. Olwa balenjila munyanza ndalabamulula boosi pe, mana oluyali lwanje lwimeete shichila ndaleera omuruchi wa Misiri, halala nende abelihebe boosi nende abamakaari kata nende abokhutsifarasi.

¹⁸Olwa ndalaba nembahulile, nolwa Abamisiri balamanya mbu, isie nisie OMWAMI Nyasaye.”

¹⁹Mana omumalaika wa Nyasaye, owali niyemilile abandu ba Isiraeli injila, narula imbeli nakalukha inyuma wabandu boosi. Kho isiilo yelileesi eyo yoosi niyirula imbeli niyikalukha inyuma.

²⁰Mana lileesi elo nilisinjila hakari wa Abamisiri nende abandu ba Isiraeli. Lileesi elo liabakabukhasia nilikhola eshiilima ewa Abamisiri bali, nebutswa ewa Abaisiraeli bali, liabaashilia obulafu eshilo shiosi. Nikachila abelihe ba Misiri nibalanyala okhusita ahambi nende abandu ba Isiraeli tawe.

²¹Kho Musa nanyiila omukhonokwe ikulu weinyanza, ne OMWAMI Nyasaye nareera omuyeka omukhongo okhurula ebukwe, nikuhutsa khunyanza eshilo shiosi, kho nikukabukhasia amaatsi keinyanza akhandi khabili ne habundu aha amaatsi kali nikabelenje nihasangalala.

²²Kho abandu ba Isiraeli nibabira munyanza hakari khwiloba eliumu. Amaatsi ako nikakabukhanamwo, akandi khumukhono musaatsa nakandi khumukhono mukhasi.

²³Nabo Abamisiri namakaari kabwe, nende tsifarasi tsiomuruchi, halala nende abandu abali khutsifarasi boosi nibalondachila khu Abaisiraeli, okhubirila khunjila yali niyiikaasiye hakari weinyanza.

²⁴Olwa eshialo bwali nibushietsanga, OMWAMI Nyasaye yahenga hasi khubelihe ba Misiri nali musiilo yomulilo nende eyelileesi, ne nabakhola okhuba noburi.

²⁵Yakhola ebilenje biamakaari kabwe okhwiyinika mumuyeshe, nikachila okhuchenda khwa Abamisiri nikhuba okhutinyu muno. Kho nibaboola bari, “OMWAMI Nyasaye akhupanilanga Abaisiraeli okhukhuyinga ifwe, chende khwilushe khubarulekhwo.”

²⁶Mana OMWAMI Nyasaye naboolela Musa ari, “Nyiila omukhonokwo okulimwo indabushi khumaatsi ne amaatsi kalalimaana khandi kaleera Abamisiri namakaari kabwe, halala nende abokhumakari abo.”

²⁷Kho Musa nanyiila omukhonokwe ikulu weinyanza, ne olwa eshialo bwali nibushietsanga, inyanza niyiliimaana niyikalukha shinga olwa yali niyibelenje. Abamisiri bateema okhwilukha okhurula munyanza,

²⁸nebutswa OMWAMI Nyasaye yachelesia amaatsi hakari wa Abamisiri abali nibachendanga, kho amaatsi nikamila abelihe beshialo shia Misiri boosi. Mana nibafwa boosi, shiyatong'akhwo kata mulala yenyene tawe.

²⁹Nebutswa abandu ba Isiraeli bachenda butswa khwiloba lisangalafu hakari weinyanza, amaatsi nikasinjiile shinga lisiisi khumukhono mukhasi nende khumukhono musaatsa.

³⁰OMWAMI Nyasaye yahonia abandu ba Isiraeli okhurula khubandu ba Misiri, inyanga eyo, nabo Abaisiraeli nibalola Abamisiri nibafwile nibali khulukuku lweinyanza.

³¹Olwa abandu ba Isiraeli balola omulimo omukhongo okwa OMWAMI Nyasaye yali nabakholeele, bamuria ne nibamusuubilila khandi nibasuubila Musa shinga omukhalabani owa OMWAMI Nyasaye.