Read wanga OKHURULA 15 Bible Online

OKHURULA 15 - wanga bible

OKHURULA 15

¹Kho Musa nende abandu ba Isiraeli nibembela OMWAMI Nyasaye olwimbo luno bari, “Ndalamwimbila OMWAMI Nyasaye olwimbo, shichila amalile okhunyoola obuhuli bwoluyali, asunduule munyanza tsifarasi nende abelushilanga khutsio.

²OMWAMI Nyasaye niye omulindi wanje wamaani, khandi niye oumboniye. Niye Nyasaye wanje, nasi ndalamwitsoominjia. Ye ni Nyasaye wa Papa wanje ne ndalemba nindiitsoomia obukhongobwe.

³OMWAMI Nyasaye nomukhupani ne eliiralie niye OMWAMI Nyasaye.

⁴“Afuubile amakaari komuruchi wa Misiri nende abelihebe munyanza, ne abakhongobe abalayi bakwisiibwe munyanza inzakhanyu.

⁵Tsisiba tsieinyanza tsibafuuniishe, beyiniishe mulusiba shinga lichina.

⁶Iwe OMWAMI Nyasaye, amaani komukhonokwo musaatsa nakoluyali, kakhalakanga abasukubo mubitonye.

⁷Mubuhulibwo obukhongo, ohulanga abasukubo. Oburumabwo nabwo bubasambanga shinga obusamba obunyasi.

⁸Olwa wafuura omuuyakwo khumaatsi, kebunjelesia halala, kasinjila shilunji shinga lisiisi, Natsio tsindungu tsiomulusuba lweinyanza tsiahambaana halala.

⁹Omusuku yaboola ari, ‘Ndalabalondachilakhwo embatiile, Ndalakabukhasia emiandu chiabwe nembukula ebia ndienya. Ndalarusia olukanga lwanje muluula, nembukula ebia bali ninabio biosi!’

¹⁰Nebutswa wafuura omuuyakwo lulala butswa ne amaatsi nikamila Abamisiri, beyinikha shinga tsisasi[8] mumaatsi kolutungu olukhongo

¹¹“Iwe OMWAMI Nyasaye, ouli shinga iwe mubanyasaye niwiina? Iwe OMWAMI Nyasaye, ouli nobutakatifu obukhongo shinga obubwo niwiina? Khandi ounyala okhukhola ebikhole ebikhongo khandi ebiamakana shinga iwe niwiina?

¹²Olwa wanyiila omukhonokwo omusaatsa, liloba liamila abasuku befwe.

¹³“Mubuheelibwo oburalilu, wemilila abandu ba wali nonunuule. Wabemilila namaaniko okhuula mushialoshio eshitakatifu.

¹⁴Amahanga koosi akahulila, katechelanga noburi, tsindenga tsiatiilile Abafilisiti.

¹⁵Abemilisi ba Edomu bariire, Abasaatsa bamaani ba Moabu bareenganga. Nabo abandu ba Kanani bamalile okhukosia itswoni yabwe.

¹⁶Tsindenga noburi biabatiilile. Olwa balolangakhwo butswa amaaniko, basinjilanga butswa noburi nibabula oubakhoonya, okhuula olwa abandubo aba warusia mumbohe babiraho.

¹⁷Wabarusiye mumbohe nobareera khushikulushio, habundu aha iwe OMWAMI Nyasaye waahula okhuba eshimenyoshio, aha waahula okhuba Ihekaluyo, eya iwe omwene wombakha.

¹⁸Iwe OMWAMI Nyasaye, oliba omuruchi emiyika nemiyika.”

¹⁹Abandu ba Isiraeli bachenda khwiloba eliumu. Nebutswa olwa Abamisiri namakaari kabwe, netsifarasi tsiabwe nende abelusinjia khutsifarasi balondakhwo, OMWAMI Nyasaye yachelesia amaatsi ne nikabamila boosi nibafwa.

²⁰Kho Miriamu, omukhaana wabwe Haroni, owali omulakusi, nabukula abikhulibwe nachaaka okhukhupa. Kho abakhasi bandi boosi nibabukula ebikhuli biabwe nibamulondakhwo nibashina.

²¹Miriamu yabarereesilia olwimbo nabo nibongulamwo bari, “Mumwimbile OMWAMI Nyasaye shichila amalile okhunyoola obuhuli bwoluyali. Afuubile tsifarasi nende abatsilushilangakhwo Munyanza.”

²²Kho Musa niyemilila abandu ba Isiraeli okhurula khunyanza inzakhanyu, nibenjila mushitsiimi shia Shuri. Bachenda tsinyanga tsitaru mushitsiimi nibalanyoolanga amaatsi tawe.

²³Ne olwa boola Mara[9], shibanyalilwa okhunywa amaatsi ta, shichila amaatsi kaliyo kali amalulu. Niko akachila habundu yaho nihakulikhwa mbu, Mara.

²⁴Mana abandu nibachaaka okhunyiniakanila Musa nibareeba bari, “Khulanywa shiina?”

²⁵Mana Musa nasaaya khu OMWAMI Nyasaye, naye OMWAMI Nyasaye namumanyia eshitonye shiolusaala namuboolela mbu, afuube mumaatsi. Olwa Musa yafuuba olusaala olwo mumaatsi, amaatsi kamala nikakaasa akokhunywa. OMWAMI Nyasaye yabahelesia amalako kokhumenyela mushitsiimi omwo. Mana khandi nibali ebweneyo, OMWAMI Nyasaye yabateema.

²⁶OMWAMI Nyasaye nababoolela ari, “Nimuba nimutsia okhuhulila nende okhulonda koosi akendolanga mbu nakobulunjishi nende okhulonda amalako kanje, shindakhamuhelesiekhwo eshinyasio shiobulwale shinga eshiandahelesia Abamisiri ta, shichila nisie OMWAMI Nyasaye oumuhoninjia.”

²⁷Olwa barula Mara, boola habundu mbu Elimu, ewa tsisebele ekhumi natsibili tsiali nende emishindu musaafu. Kho nibakhupa ikambi yabwe habwene yaho, ahambi namaatsi.