Read wanga OKHURULA 17 Bible Online

OKHURULA 17 - wanga bible

OKHURULA 17

¹Abandu ba Isiraeli bamala barule mushitsiimi shia Sini, nibachenda okhulondana shinga olwa OMWAMI Nyasaye yabalachilisia. Bamala bakhupe ikambi Refidimu, nebutswa amaatsi shikaliho akokhunywa tawe.

²Abandu abo bamala babuuluulile Musa nibamuboolela bari, “Khuhelesie amaatsi kokhunywa.” Naye Musa nabakalusia ari, “Mbushiina muusoolasinjia? Eshichilanga nimuteema OMWAMI Nyasaye wenywe nishiina?”

³Nebutswa abandu bali nobuloho obunji, mana nibatsiililila okhubuuluulila Musa nibaboola bari, “Wakhurusiye Misiri halala nende emiruko chiefwe kho mbu, witse okhwirire mushitsiimi nobulo?”

⁴Kho Musa nahabila OMWAMI Nyasaye naboola ari, “Iwe OMWAMI Nyasaye, nekhole endie abandu bano? Bali ahambi okhundasa amachina.”

⁵Naye OMWAMI Nyasaye namuboolela ari, “Bukulakhwo abemilisi ba Isiraeli mana wimile imbeli wabandu, obukule indabushi ya wakhupila amaatsi komwalo kwa Naili.

⁶Isie ndalasinjila halwanda mushikulu shia Zayuni. Witse okhupe olwanda olwo, amaatsi kalarulamwo ne abandu balanywa.” Musa nakhola ario, abemilisi babandu ba Isiraeli nibalolanga.

⁷Musa yamala nakulikha habundu tsana mbu, Masa nende Meriba[10], shichila abandu ba Isiraeli babuuluula nibeyiniakana khu OMWAMI Nyasaye nende okhumuteema, olwa bareeba bari, “Toto mwene OMWAMI Nyasaye ali ninefwe noho ta?”

⁸Mana Abamaleki nibeetsa nibaseera abandu ba Isiraeli nibali Refidimu.

⁹Kho Musa naboolela Yoshwa ari, “Yahula abandu banyala okhukhupana, mukamba batsie bakhupane nende Abamaleki. Nasi ndalasinjila khushikulu nenjiinjile mwikulu indabushi ya Nyasaye yambelesia.”

¹⁰Mana Yoshwa nakhola shinga olwa Musa yali namuboolile. Kho nibatsia okhukhupana nende Abamaleki. Ne Musa, Haroni nende Huri nibaniina khubutenje bweshikulu.

¹¹Olwa Musa yachinguulanga omukhono kulimwo indabushi, abandu ba Isiraeli bahulanga lihe. Ne olwa yeshinjia omukhonokwe hasi, Abamaleki bahulanga lihe.

¹²Olwa amakhono ka Musa kachoonya, Haroni nende Huri bamala nibabukula lichina nibarechekha, ne Musa niyekhalakhwo. Ne Haroni nende Huri nibatiila emikhonochie okhuula olwa eliuba liayeela.

¹³Mana Yoshwa nahulila elala Abamaleki.

¹⁴Kho OMWAMI Nyasaye naboolela Musa ari, “Handika amakhuwa kobuhuli bwelihe lino mushitabu, mana shibe eshitsulilo khubandu ba Isiraeli, khandi oboolele Yoshwa mbu, ndalamulula Abamaleki boosi pe.”

¹⁵Kho Musa niyombakhaho eshimalilo shiemisango ne nashikulikha mbu, “OMWAMI Nyasaye yambelesinjia obuhuli.”

¹⁶Mana naboola ari, “Eshifune shili mbu, ndiletanga khu OMWAMI Nyasaye. Nebutswa mutsinzibulo tsieimbeli, OMWAMI Nyasaye alikhupa Abamaleki khandi.” [11]