Read wanga OKHURULA 18 Bible Online

OKHURULA 18 - wanga bible

OKHURULA 18

¹Mana Yetsiro, Omwisaaliisi wa Midiani, nyakhufialanyene Musa niyetsa okhucheniya Musa. Yali niyahuuliile aka OMWAMI Nyasaye yali nakholeele abandu ba Isiraeli khulwa okhubarusia Misiri.

²Yetsa nende Zipora, omukhasi owa Musa, owa Musa yali niyateshia, nebutswa yali niyamukalusia ewabwe khu samwana, olwa yarula natsia Misiri.

³Zipora yetsa nende samwana, nende abaana ba Musa abasiani babili. Owambeli yalangwa mbu, Gerishomu, Musa yamukulikha eliira elo shichila yaboola ari, “Ndabelenje omucheni mushialo shiabeene”

⁴Naye owakhabili namukulikha mbu, Eliazeri, okhuba yaboola ari, “Nyasaye wa papa wanje yahonokosia okhurula khukhwirwa nende omuruchi owa Misiri.”

⁵Yetsiro yetsa nomukhasi wa Musa halala nende abaana ba Musa abasiani babili ewa Musa yali mushitsiimi khushikulu shia Sinai.

⁶Yetsiro yali niyarumila Musa likhuwa mbu niyetse nende omukhasi wa Musa nende abaana ba Musa babili okhulola Musa.

⁷Kho olwa Musa yaboolelwa mbu, Yetsiro yetsile, yarula natsia okhumwakaanila, namwinamila khandi namufumbelela ne namutsunzuuna. Olwa bali nibareebaane akobulamu bwokhulekhana khulwa ebise biali nibibirire nibalekhaane, bamala nibenjila mwiheema lia Musa.

⁸Mana Musa naboolela Yetsiro koosi aka OMWAMI Nyasaye yali niyakholeele omuruchi wa Abamisiri halala nende Abamisiri boosi nende okhuhonokosia abandu ba Isiraeli okhurula mumatinyu koosi aka banyoola nibali khunjila.

⁹Kho Yetsiro niyetsoomia OMWAMI Nyasaye khulwa okhuhonia khwayali nahoniye abandu ba Isiraeli okhurula mumikhono chia Abamisiri.

¹⁰Yetsiro naboola ari, “OMWAMI Nyasaye yetsoomibwe khulwa okhuhonokosia abandu ba Isiraeli okhurula mubunyali bwomuruchi wa Misiri nende okhurula khubandu ba Misiri boosi.

¹¹Bulaano emanyile mbu, OMWAMI Nyasaye ashila abanyasaye bandi boosi pe.” Tooto Abamisiri bali nibafinya abandu ba Isiraeli khulwoluhoono olurambi.

¹²Mana Yetsiro narusia ebihaanwa okhuhaanila OMWAMI Nyasaye shinga omusango omusambe. Mana Haroni nende abandu ba Isiraeli boosi nibatsia okhulia nende Yestiro eshiokhulia eshitakatifu khulwa okhwinamila Nyasaye.

¹³Inyanga yalondakhwo, Musa yekhala mushifumbushie okhuyaasia abandu. Mana abandu nibeema nibamubotokhaane okhuula khubwile.

¹⁴Olwa Yetsiro, nyakhufialanyene Musa yalola aka Musa yali nakholelanga abandu koosi, yareeba Musa ari, “Nishiina eshioboolanenje nende abandubo bano okhurula mumabwibwi okhuula eshilo?”

¹⁵Musa namukalusia ari, “Abandu betsanga khwisie okhureeba amakhuwa ka Nyasaye.

¹⁶Olwa baba nibali noburambani, betsanga khwisie, nasi ekhalakanga ebiina hakari wabwe nenonda ameebaalo nende amechesio ka Nyasaye olwemba nekhalaka ebiina.”

¹⁷Mana Yetsiro namuboolela ari, “Shiokholanga habwene tawe.

¹⁸Iwe nende abandu aba oli ninabo mulachoonya. Okhuba emilimo chino neminji muno. Shionyala okhuchikhola iwe wenyene tawe.

¹⁹Bulaano ndienya okhukhwibaalila eliokhoyile okhukhola, naye Nyasaye akhoya yaba halala ninawe! Nobulayi otsitsenje imbeli wa Nyasaye mushilenje shiabandubo, nomuyilila akoburambani bwabwe.

²⁰Okhuula obeechesie amalako ka Nyasaye nende okhubeebaalila shinga olwa bakhoyile okhumenya nende akabakhoyile okhukhola.

²¹Nebutswa okhumeetakhwo, okhuula waahule abasaatsa abanyala okhukhukhoonya, babe ebemilisi babandu. Abemilisi abo kenyekha mbu bemilile abandu mumikanda chiebikhumila, echiebikhumi, echiamakhumi karano nende echiabandu ekhumi. Bakhoyile okhuba abandu abariitsanga Nyasaye khandi abasuubilwa, abalanyala okhubukula eshiomufusi tawe.

²²Oleshe abandu beene abo abeene bayaasinjie abandu buli lwosi. Ne likhuwa likhongo elia balanyala okhukhola ta, lionyene libe eliabakhureerera iwe. Nebutswa abeene bakhalachenje amakhuwa amatuutu koosi. Nibakhukhoonya okhukhola, emilimochio chilaba emiangu.

²³Noba nokhola shinga olwa OMWAMI Nyasaye yakhalaka, shiolachoonya ta, ne khandi bano boosi, balakalukha ewabwe obwahukhani bwabwe nibukololosiibwe.”

²⁴Musa yafuchilila ameebaalo ka Yetsiro ne nakhola koosi aka yali nabooleelwe.

²⁵Musa yaahula abasaatsa abanyala, okhurula mubandu ba Isiraeli boosi, okhuba abemilisi babandu ebikhumila, ebikhumi, amakhumi karano nende ekhumi.

²⁶Mana abandu abo bamalanga bayaasia abandu buli lwosi. Bayaalanga emise emitiiti nibakhalaka ebiina, nebutswa bareeranga emise emikhongo khu Musa okhuyaasia.

²⁷Mana Musa naseebula Yetsiro naye Yetsiro nakalukha ingowe.