Read wanga OKHURULA 19 Bible Online

OKHURULA 19 - wanga bible

OKHURULA 19

¹Abandu ba Isiraeli barula Rafidimu nibatsiililila noluchendo lwabwe. Kho niboola mushitsiimi shia Sinai khunyanga yambeli yomwesi kwali kwakhataru, okhurula nibachaaka oluchendo lwokhurula Misiri.

²Olwa abandu ba Isiraeli bali mushitsiimi, bakhupa ikambi yabwe ahambi khushikulu.

³Mana Musa natikulukha natsia khushikulu shia Zayuni okhwakaana nende OMWAMI Nyasaye. OMWAMI Nyasaye nali mushikulu, yalanga Musa ne namuboolela mbu, aboolele Abaisiraeli bomulwibulo lwa Yakobo ari,

⁴“Mwalutsi aka ndakholeele Abamisiri nende shinga olwa ndamulindile okhuula khushikulu shino shinga olwa indutsu yichinganga abaana bayo khutsimbaha tsiayo.

⁵Nimuba nimuhuluila aka isie emboola khandi nimulonda amalako kanje, mulaba abandu banje, mulaba abandu abanje abalobole hakari wamahanga kandi koosi akali mushialo, okhuba eshialo shiosi neshianje.

⁶Mulaba khwisie lihanga liabesaaliisi khandi litakatifu. Kano niko akolaboolela abandu ba Isiraeli.”

⁷Mana Musa nakholomokha okhurula khushikulu naboolela abemilisi babandu ba Isiraeli aka OMWAMI Nyasaye yali naboolile.

⁸Nabo abandu boosi nibakalusia bari, “Khuhuliile, khulakhola shinga olwa OMWAMI Nyasaye aboolile.” Naye Musa naboolela OMWAMI Nyasaye ari, “Abandu beyamile okhukhola akoboolile.”

⁹OMWAMI Nyasaye naboobela Musa ari, “Ndalaboola ninawe nendi mumaleesi abandu boosi nibahulila kho mbu, buli mundu asuubile mbu, oli omukhalabani wanje.” Musa naboolela OMWAMI Nyasaye akabandu bali nibaboolile,

¹⁰naye OMWAMI Nyasaye namuboolela ari, “Tsia oboolele abandu bahonje inyanga yino nende mukamba nibesiiyanga kulwokhunzinamila isie. Boosie tsingubo tsiabwe

¹¹mana berecheshe okhunzinamila inyanga ilonda mukamba. Khunyanga eyo ndaleekha okhurula khushikulu shia Zayuni, ne abandubo nibandole.

¹²Nawe osire olwakho okhubotokhana eshikulu mana abandu basinjile ehalekhwo, baleshe okhusita ahambi nende eshikulu tawe. Omundu oufunaka lilako lino mana yatiila khushikulu, okhuula yerwe.

¹³Omundu oyo yerwe khulwa okhulaswa namachina, noho nobuyingo. Nebutswa abandu shibalamutiilakhwo namakhono kabwe ta, kata abe omundu noho isolo nabulimo, okhuula yerwe. Ne olwa itarumbeta yikhupwa niyitsiililila, abandu boosi batsie khushikulu.”

¹⁴Mana Musa niyekha okhurula khushikulu ne naboolela abandu okhwirechekha khulwokhwinamila Nyasaye. Kho niboosia tsingubo tsiabwe,

¹⁵naye Musa naboolela ari, “Mwirecheshe okhwakaana nende OMWAMI Nyasaye khunyanga yilonda mukamba, ne shimulakonakhwo nabakhasi benywe tawe.”

¹⁶ Mumabwibwi khunyanga yakhataru, okhwatulukha khwelikulu khahulilikha, khandi tsimbenu tsieifula nitsimwesukha, ne omwosi nikulolekha khushikulu khandi olwika olukhongo nilukhupwa. Abandu bali mukambi boosi nibachaaka okhutechela.

¹⁷Mana Musa narusia abandu abo mukambi okhutsia okhwanaana nende OMWAMI Nyasaye, nabo nibasinjila hasi weshikulu.

¹⁸Mana eshikulu shia Sinai nishifuunikhwa nomwosi shiosi pe, okhuba OMWAMI Nyasaye yali niyeshile khushio mukhufwana ookhwa omulilo. Mana omwosi okwo nikutuumuukha ikulu shinga omwosi kwelirumbi nashio eshikulu eshio nishirenga obutinyu muno.

¹⁹Ne lwobuyoka bwolwika bwatsiililila okhuba obunji, Musa yaboola nende Nyasaye naye Nyasaye namukalusia nende okhukukuma khweliku.

²⁰OMWAMI Nyasaye niyekha nasinjila khubutenje bweshikulu ne nalanga Musa mbu, atikulushe atsie khushikulu eshio.

²¹OMWAMI Nyasaye naboolela Musa ari, “Kholomokha otsie okaanie abandu baleshe okhuniina khushikulu ewa endi, shichila bakhetsukhana baruuma olwakho, bandola. Nibakhola bario, abanji mubo balafwa.

²²Khandi oboolele abesaaliisi abasita ahambi khwisie mbu, okhuula besiiye, nebutswa ndalabahelesia eshinyasio.”

²³Naye Musa naboolela OMWAMI Nyasaye ari, “Abandu shibanyala okhwitsa khushikulu shia Sinai shino ta, shichila iwe omwene wakhulachilisia noboola ori, ‘Musire eshikulu shiosi mana mushisiiye.’ ”

²⁴Mana OMWAMI Nyasaye namuboolela ari, “Kholomokhayo mana witse nende Haroni. Nebutswa shiolalekha abesaaliisi nende abandu bakhalasia betsa khushikulu shino, ewa isie endi ta, nibetsukhana betsa ndalabahelesia eshinyasio.”

²⁵Mana Musa nakholomokha natsia wabandu bali, ne nababoolela ario.