Read wanga OKHURULA 2 Bible Online

OKHURULA 2 - wanga bible

OKHURULA 2

¹Mutsinyanga etsio, omundu okhurula muluyia lwa Lawi yatsia nateeshia omukhaana okhurula muluyialwe lwene.

²Mana omukhasi tsana wateshibwa oyo nahela inda, ne niyebula omwana omusiani. Ne lwomukhasi oyo yalola mbu, omwana oyo yali niyanera obulayi, yamubisa khulwemiesi chitaru.

³Nebutswa lwomwana oyo yali nalanyala okhubiswa khandi ta, nyinamwana yabukula eshikapo shialukhwa okhurula khumaturu, nashihomakhwo ihula, naramwo omwana oyo ne nashira mumakata keshisari, khulukuku lwomwalo.

⁴Ne omukhaana wabwe omwana oyo nasinjila ehalekhwo mbu, ahenjelesinjie okhulola eshiakhekholekha khumwana oyo.

⁵Mana omukhaana womuruchi wa Misiri yakholomokha natsia mumwalo okhwisinga, nabo abakholibe beshikhaana nibatong'a nibachendanga khulukuku lwomwalo okwo. Ne lwomukhaana womuruchi wa Misiri oyo yalola eshikapo mushisari, yaruma omukholiwe weshikhaana okhushibukula.

⁶Ne lwomukhaana womuruchi oyo yashibukula, yalola omwana nalimwo, ne omwana tsana oyo yali nalilanga. Yamulolela tsimbabasi ne naboola ari, “Uno nimulala khubaana ba Abaheburania.”

⁷Naye omukhaana wabwe omwana oyo nasita ahambi nomukhaana womuruchi oyo ne namureeba ari, “Enzie ekhulanjile omulesi okhurula mubakhasi Abaheburania mbu, akhulelele omwana uno noho?”

⁸Ne omukhaana womuruchi wa Misiri oyo namukalusia ari “Tsia.” Mana omukhaana wabwe omwana oyo natsia nalanga nyinamwana omwana oyo.

⁹Naye omukhaana womuruchi namuboolela ari, “Bukula omwana uno undelele ne nasi ndilikhurunga obukholibwo.” Kho omukhasi oyo nabukula omwana oyo ne namulela.

¹⁰Mana omwana nakhula. Ne olwa yali nanuniishe, yamala amukalusilie omukhaana womuruchi wa Misiri, mana omwana oyo naba omwana womukhaana womuruchi. Naye namukulikha mbu Musa, eshifune mbu, “Emukhwesile okhurula mumaatsi.” [2]

¹¹ Inyanga yindi olwa Musa yali niyakhulile, yatsia okhukonya abandu boluyialwe Abaheburania, ne nalola obusiro bwemilimo chiabwe. Khandi nalola Omumisiri nakhupanga Omuheburania, mulala khuboluyialwe.

¹²Musa nakhupa amashemo nahenga eyi nende eyi, ne olwa yalola mbu, omundu abulaho oumulolanga, yeera Omumisiri oyo, ne namubisa mumuyeshe.

¹³Ne olwa yakalukhayo inyanga yalondakhwo, yalola Abaheburania nibakhupananga. Mana nareeba omusaatsa wali naranjile owashie ari, “Mbushiina nonywekha owashio?”

¹⁴Naye omusaatsa oyo namureeba ari, “Oukhukholile okhuba omuruchi khandi omukhalachi weshiina khwifwe niwiina? Wenya okhunzira shinga olwa wayerire Omumisiri ulia?” Mana Musa naria khandi niyereeba mumwoyokwe ari, “Khane akandaakholile kaamanyiishe?”

¹⁵Olwa omuruchi wa Misiri yahulilakhwo likhuwa elo, yakhaaba okhwira Musa. Nebutswa Musa yelukha natsia okhwibisa Midiani, ne niyekhala hasi ahambi khwiyabo lindi

¹⁶Omwisaaliisi wa Midiani yali nabaanabe abakhaana musaafu, abeetsa okhutaha amaatsi nibetsusia tsisiongo tsiabwe khulwa okhunywesia emiruko chia papa wabwe.

¹⁷Abaayi nabo nibeetsa nibabalonda. Nebutswa Musa yabuukha nakhoonya abakhaana abo okhunywesia ebiayo biabwe.

¹⁸Olwa bachelela ewa Yetsiro[3] sabwe yali, yabareeba ari, “Ne leelo mukhacheleele murie bwangu?”

¹⁹Nabo nibamukalusia bari, “Omumisiri akhuhonokosiye okhurula khubayi mana omwene nakhutayila amaatsi khandi nanywesia ebiayo biefwe.”

²⁰Naye nabareeba ari, “Ne omwene ali hena? Mbushiina nimumulekha? Tsie mumulanje yetse aliekhwo ebiokhulia ninefwe.”

²¹Mana Musa nafuchilila okhumenya nende Yetsiro, naye Yetsiro nahelesia Musa omukhaanawe ulangwa mbu, Zipora okhuba omukhasiwe.

²²Zipora yebula omwana omusiani ne Musa namukulikha mbu, Gerishomu[4] shichila yaboola mbu; “Endi omurende, mushialo shino.”

²³Emiyika eminji nichiwele, omuruchi wa Misiri yamala nafwa. Nabo Abaisiraeli bali nibashinyakhananga, nibeyiniakana nende okhuhaba nibenya obununuli nende okhuhabinwa. Mana Nyasaye nahulila okhuhaba khwabwe.

²⁴Khandi Nyasaye nahulila okhwiyiniakana khwabwe ne niyetsulila indakano eya yali niyakhola nende Aburahamu, Isaka nende Yakobo.

²⁵Mana Nyasaye nalola obubohe bwabandu ba Isiraeli ne nababeelelela.