Read wanga OKHURULA 21 Bible Online

OKHURULA 21 - wanga bible

OKHURULA 21

¹“Bulaano kano niko amalako akolahelesia abandu ba Isiraeli:

²Nokula omusumba Omuheburania washio, omusumba oyo alakhukholela emilimo khulwemiyika chisasaba. Ne mumuyika kwomusaafu, akhoyile okhulekhuulwa butswa obulalikhwo nomurungo kwosi kwosi tawe.

³Naba niyakulwa nashili okhuteeshia, olwa aba niyenyokha, atsie butswa yenyene nabula omukhasi. Ne naba niyakulwa niyateeshia, olwa alekhuulwa, yenyoshe nomukhasiwe.

⁴Ne naba niyetsa nashili okhuteeshia mana omwamiwe owamukula oyo amubashila omukhasi, ne omusumba oyo niyebula abaana abasiani nabakhaana, olwa aba niyenyokha emiyika chisasaba nichihwele, atsie yenyene, aleshele omusumbawe omukhasi oyo halala nende abaana abo. Shichila omukhasi oyo nende abaana abo nabomwamiwe.

⁵Nebutswa omusumba oyo naba naboola habulafu mbu, yaheela omwamiwe, omukhasi halala nende abaanabe, ne khulweshio shiyenya okhulekhuulwa ta,

⁶omwami womusumba oyo amuyile habundu wokhwinamila Nyasaye. Mana amusinjisie hamuliango noho khushiyindi shiomuliango, mana amufutule amarwi noluchela, ne omusumba oyo atsiililile okhukhalabanila omwamiwe emiyika chiosi.

⁷“Omundu naba nakusia omwanawe omukhaana shinga omusumba, omukhaana oyo shiakhoyile okhulekhuulwa shinga omusumba weshisaatsa akholungwa tawe.

⁸Omukhaana oyo naba nakusibwa khumusaatsa wenyanga okhumukhola okhuba omukhasiwe, mana omukhaana oyo aleshe okhumuchamisia, omusaatsa oyo akhoyile okhukusia omukhaana oyo khusamwana. Omwami wakula omukhaana oyo shiali nende obulekhuule bwokhukusia omukhaana oyo khumundu omurende ta, shichila yakholela omukhaana oyo amakhuwa kobubatsa.

⁹Omundu naba nakula omusumba weshikhaana khulwokhubashila omwanawe omusiani, okhuula amulinde shinga omwanawe womwene yebula.

¹⁰Omundu naba nateeshia omukhasi wakhabili, okhuula atsiililile okhuhelesia omukhasiwe wambeli ebiokhulia nende tsingubo, khandi shialalekha okhuba ninye shinga omukhasiwe tawe.

¹¹Ne naba nalamukholela amakhuwa kataru ako ta, okhuula amulekhuule yenyoshe, ne shialareebakhwo mbu, akalusilibwe amapesake tawe.

¹²“Omundu yesi yesi nakhupa owashie mana amwire, yesi akhoyile okhwirwa.

¹³Nebutswa naba namwira metsukhana, nalali nende lichoomo liokhumwira ta, ouba namwirire oyo anyala okhwilukha atsie ewa enzia okhubalobolela inywe, ne alaba nomulembe ebweneyo.

¹⁴Nebutswa omundu naba naseera owashie mana amwire chiminiayi, kata naba niyelushiile khushimalilo shianje shiemisango khulwa okhwihonokosia, akhoyile okhurusibwaho niyerwa.

¹⁵“Khandi omundu yesi yesi oukhupa samwana noho nyinamwana, okhuula yerwe.

¹⁶“Omundu yesi yesi oukoneshela owashie amutiile khulwa okhumukusia noho okhumubiikha shinga omusumbawe, okhuula yerwe.

¹⁷“Omundu yesi yesi oulaama samwana noho nyinamwana eshilaamo shiobubi, okhuula yerwe.

¹⁸“Khandi abandu nibaba nibasoolana mana mulala khubo akhupe owashie nelichina, noho amukhupe eshifuusi, ne oukhupilwe oyo nalafwa ta, mana atoonye niyakona khwiselo,

¹⁹mana olunyuma ahone abuushe achaache okhuchendela khumutunga, owamukhupa oyo akhoyile okhumurunga ebise biayakosia nalwalanga khandi akhoyile okhusinjilila obusilishibwe okhuula olwa ahona.

²⁰“Omundu naba nakhupa omusumbawe nende indabushi, kata nali weshisaatsa noho oweshikhasi, mana omusumba oyo afwe habwene nahabwene, okhuula omundu oyo ahebwe eshinyasio.

²¹Nebutswa omusumba oukhupilwe oyo nalafwa ta, mana abeho mwoyo khulwa inyanga yindi ndala noho tsibili mana afwe, omwami womusumba oyo shiakhoyile okhuhebwa eshinyasio ta, shichila okhufwa khwomusumba oyo neshinyasio khumwamiwe oyo.

²²“Ne abandu babili nibaba nibakhupana mana basaalisie omukhasi ouli inda, ne omukhasi oyo nahuusa omwana, ne okhusaalila khundi khuleshe okhulondakhwo, okhuula ouba namusaalisiye akhalachilwe okhurunga shiosi shiosi shiomusaatsa mwene omukhasi yenya mbu arungwe, okhulondana nende obukhalachi bwabayaasi.

²³Nebutswa omukhasi ousaalisibwe oyo naba nafwa, okhuula oumusaalisiye oyo yesi yerwe,

²⁴naba namufutula imoni, yesi afutulwe imoni, ne naba namukhuula eliino, yesi akhuulwe eliino. Naba namufunaka omukhono, yesi afunakwe omukhono. Naba namufunaka eshilenje, yesi afunakwe eshilenjeshie.

²⁵Naba namusambile, yesi asambwe. Naba nafumiire likonzo, yesi afumirwe likonzolie. Naba namukhupaka nende okhutsunula, yesi akhupakwe mana atsunushe.

²⁶“Khandi omundu naba nakhupa omusumbawe weshisaatsa noho oweshikhasi mana amufutule imoni, okhuula omusumba oyo alekhuulwe yenyoshe khulwa imoniye ifutuushe eyo.

²⁷Omundu naba nakhuula omusumbawe weshisaatsa noho oweshikhasi eliino, okhuula omusumba oyo alekhuulwe yenyoshe khulwa eliinolie likhuulilwe elo.

²⁸“Ne ing'ombe isurusi niyiba niyifumura omundu mana afwe, okhuula ing'ombe eyo ilaswe ifwe, ne inyama yayo shiyilaliibwa tawe. Habula mweneyo shiakhoyile okhuhebwa eshinyasio tawe.

²⁹Ne nikaba mbu, ing'ombe eyo ituyanga abandu ne mweneyo abolelwa ne shiakholakhwo eshindu ta aholeela butswa, niyifumira omundu mana yimwire, isurusi eyo ilalaswa amachina ifwe, khandi mweneyo okhuula yesi yeerwe.

³⁰Nebutswa mushilenuje shiokhwirwa, mwene isururi eyo narebwakhwo okhurunga omurungo khulwa okhwitisa, okhuula akurunje.

³¹Kata isurusiye eyo niyiba niyifumira omwana omusiani noho omukhaana mana imwire, khandi mweneyo alakholelwa butswa ario.

³²Khandi isurusi niyiba niyiira omusumba weshisaatsa kata oweshikhasi, okhuula mwene surusi eyo arunje mwene omusumba ebitonye bieifetsa amakhumi kataru, nayo isurusi eyo okhuula ilaswe namachina ifwe.

³³“Khandi omundu naba nalekha obwina nibwasaame, noho naba nayaba obwina mana aleshe okhubufuunikhakhwo eshindu, mana ing'ombe noho isishili ikwe mubwina obwo,

³⁴okhuula mwene obwina obwo arunje mwene ing'ombe eyo. Nayo ing'ombe ifwile eyo yilaba eya mwene bwina obwo.

³⁵Isurusi yomundu niyiba niyifumira eyowashie mana yichiire, okhuula babili abo bakusie eyiirire eyashie eyo mana bakabane amapesa karulamwo. Khandi bakabane ing'ombe eyifwile eyo hakari.

³⁶Ne nikaba nikamanyikha mbu, ing'ombe eyo yifumiranga abandu okhurula khale, ne mweneyo shiachibohanga ta, niyifumira mana yeera eyashie, okhuula mweneyo arunje mwene ng'ombe eyifwile eyo ing'ombe yindi, naye abukule eyifwile eyo.