Read wanga OKHURULA 24 Bible Online

OKHURULA 24 - wanga bible

OKHURULA 24

¹OMWAMI Nyasaye naboolela Musa ari, “Tikulukha witse khushikulu iwe, Haroni, Nadabu, Abihu nende abakofu ba Abaisiraeli amakhumi musaafu. Ne nimushili ehalekhwo, munzinamile.

²Iwe Musa wenyene, niwe ouletsa ewa endi, shioletsakhwo nomundu undi yesi yesi ahambi ninasi tawe. Ne abandu bandi ba Isiraeli shibakhoyile okhwitsa khushikulu shino tawe.”

³Mana Musa natsia naboolela abandu aka OMWAMI Nyasaye yali namulachile nende ameebaalo koosi, ne abandu nibakalusilia halala boosi nibaboola bari, “Khulakhola koosi aka OMWAMI Nyasaye akhulachile.”

⁴Mana Musa nahandika amalako koosi aka OMWAMI Nyasaye yali nabooleele. Ne mumabwibwi inyanga yalondakhwo, Musa yombakha eshimalilo shiemisango hashikulu niyekhoonyela amachina ekhumi nakabili. Buli elala mushilenje shia buli oluyia, khumbia ekhumi natsibili tsia Isiraeli.

⁵Kho naruma abaraaka, ne nabo nibakholela Nyasaye emisango emisambe nende chiokhureera omulembe nende echiokhukhupila Nyasaye orio.

⁶Naye Musa nabukula inusu yamalasile nara khushikaye, ne akali nikatoonyile namiitsa khushimalilo shiemisango.

⁷Kho nabukula eshitabu shiamalako aka OMWAMI Nyasaye ne nashisooma nomwoyo omukhongo. Nabo abandu nibakalusia bari, “Khulahulila nikhukhola koosi aka OMWAMI Nyasaye aboolile.”

⁸Mana Musa nabukula amalasile akali khushikaye ako nakamiitsa khubandu naboola ari, “Kano niko amalasile kasiiliisia indakano hakari wanje ninenywe khumakhuwa kamwakhetsuba ako.”

⁹Kho Musa, Haroni, Nadadu, Abihu nende abemilisi amakhumi musaafu ba Isiraeli abo nibatikulukha nibatsia khushikulu,

¹⁰ne nibalola Nyasaye wa Isiraeli. Ne hasi webilenjebie, eshindu shialiho eshifwana shinga obwelu obwakaasibwa okhurula khumachina keisapiri, akobukondo bweisambarao, nishifwana shinga likulu elibulakhwo amaleesi.

¹¹Nyasaye shiyasaalisia abemilisi babandu ba Isiraeli abo tawe. Balola Nyasaye khandi nibalia nende okhunywa halala ninaye.

¹²OMWAMI Nyasaye naboolela Musa ari, “Tikulukha witse khushikulu ewa endi, ne shinga lwolaba noli wendi yino, ndalakhuhelesia amachina kabili, akalikhwo amalako koosi akehandiiche khulwa ameebaalo khubandu banje.”

¹³Mana Musa nende omukhoonyiwe Yoshwa nibarula nibatikulukha khushikulu shia Nyasaye.

¹⁴Musa naboolela abemilisi ba bandu ba Isiraeli ari, “Mukhulinde mukambi muno okhuula olwa khuchelela. Haroni nende Huri balatong'a hano ninenywe. Omundu yesi yesi mwinywe nali nobuyingani hakariwe nende owashie, banyala okhuyila obuyingani bwabwe obwo khu Haroni nende Huri.”

¹⁵Mana Musa natikulukha natsia khushikulu shia Sinai ne amaleesi nikafuunikha eshikulu eshio.

¹⁶Oluyali olwa OMWAMI Nyasaye nilwikha khushikulu shia Sinai eshio, nalio lileesi nilishifuunikha khulwa tsinyanga tsisasaba. Khunyanga yomusaafu, OMWAMI Nyasaye nali hakari welileesi elo, yalanga Musa.

¹⁷Oluyali olwa OMWAMI Nyasaye lwalolekha imbeli wabandu ba Isiraeli shinga omulilo okwakhanga khubutenje bweshikulu eshio.

¹⁸Naye Musa, niyenjila mwileesi elo, natikulukha khushikulu eshio. Kho namenya khushikulu eshio khulwa tsinyanga amakhumi kane, eshilo neshiteere.