Read wanga OKHURULA 25 Bible Online

OKHURULA 25 - wanga bible

OKHURULA 25

¹OMWAMI Nyasaye naboolela Musa ari, “Boolela abandu ba Isiraeli bandeerere ebihaanwa.

²Obukule eshindu eshiomundu yesi yesi achama okhuhaana nomwoyo omulekhuule.

³Ne ebihaanwa biokhoyile okhubukula okhurula khubo nibino; itsahabu, ifetsa nende omukasa.

⁴Tsingubo tsieikitani, etsia bulu, etsieisambarao, etsia ranzayi, itsieikitani indorotoro nende obwoya bwetsimbusi,

⁵amaseelo kamakondi, akabashilwe iranji inzakhanyu, amaseelo ketsimbusi, tsimbao tsiemisaala chiemipeli,

⁶amafura ketsitaha, amalesi khulwa okhukaasia amafura kokhutsushilila nende akokhukaasia obubane bweshing'ari eshilayi,

⁷amachina kobukusi, namachina kandi akokhura khufodi nende akokhura khushitsengwa shiokhushilifu shieiloloti yabesaaliisi abakhulundu.

⁸Khandi okhuula Abaisiraeli banzumbashile liheema litakatifu kho mbu, enyale okhumenya mubo.

⁹Okaasie liheema elo nende ebiokhuliumbakha okhulondana shinga olwa ndalakhumanyia.”

¹⁰“Abaisiraeli bakaasie lisanduku liamalako okhurula kumbao tsiomupeli. Oburambi bube tsisendimita eshikhumi shilala nende ekhumi (110 cm), obuchiikha bube tsisendimita amakhumi kasasaba nende tsisasaba. Ne okhutsia yikulu, bwosi bube tsisendimita amakhumi kasasaba nende tsisasaba.

¹¹Olibashe itsahabu inzeleleshe mukari mwalio, khwikulu walio nende khundulo walio khwosi.

¹²Olikaasilie tsingara tsine etsiokhulichinga okhurula khutsahabu inzeleleshe eyo, mana ore buli ingara ndala khwikuru, khumakhuru koosi kane. Tsingara tsibili tsibe khulubafu lwalio lulala ne natsio tsibili tsindi tsibe khulubeka lwalio lundi.

¹³Okaasie tsinyanzo tsiomupeli mana otsibashekhwo itsahabu.

¹⁴Khandi winjisie tsinyanzo etsio mutsingara etsili khubuli olubafu lwelisanduku elo khulwa okhulichinganga.

¹⁵Tsinyanzo etsio shitsikhoyile okhurusibwa mutsingara tsielisanduku etsio ta, tsilekhwe tsibemwo inziayo.

¹⁶Mana ore mwisanduku omwo amachina kabili akehandiichekhwo amalako ako.

¹⁷“Khandi okaasie eshifuunikho eshieitsahabu inzeleleshe, eshielisanduku elo, eshiobuburambi bwetsisendimita eshikhumi shilala nende ekhumi, ne obubambalifu bwashio bube tsisendimita amakhumi kasasaba nende tsisasaba.

¹⁸Mana okaasie abilonje bietsimbaha bibili nibihengaane okhurula khutsahabu eyiraanyilwe.

¹⁹Shilala khundulo welisanduku, ne eshindi khundulo ebuleka undi. Obihandie khushifuunikho kho mbu, bibe eshindu shilala neshifuunikho.

²⁰Mana ebilonje bietsimbaha ebio bibambule tsimbaha tsiabio khwisanduku ikulu nitsifwimba eshifuunikho netsimbaha tsiabio etsio, nibihengaane.

²¹Ore amachina kabili akalikhwo amalako ako mwisanduku omwo mana ofuunishekhwo eshifuunikho eshio.

²²Habwenaho niho aha ndalakaana ninawe, ne ikulu weshifuunikho eshio, hakari webilonje bietsimbaha ebio, niho aha ndalakhuhelesilia amalako kabandu ba Isiraeli.

²³“Ne okaasie imesa okhurula khumusaala kwomupeli, eyoburambi buhela tsisendimita amakhumi munane namunane, obuchiikha bwayo bube obuhela tsisendimita amakhumi kane natsine, ne obwiyinikhu bwayo bube tsisendimita amakhumi kasasaba natsisasaba.

²⁴Ochifuunishe nende itsahabu inzeleleshe, khandi ochibotokhasiekhwo itsahabu.

²⁵Ochibotokhasiekhwo olubao lwobubambalifu obuhela tsisendimita amakhumi kasasaba natsisasaba, mana obotokhasie khululika lwalwo itsahabu inzeleleshe.

²⁶Okaasie tsingara tsine tsieitsahabu mana ore buli ingara khutsimbeka tsine, etsiebilenje biayo bine bili.

²⁷Tsingara tsiokhwinjisibwamwo tsinyanzo tsiokhuchinga imesa etsio tsirebwe ahambi nolubaho olubotokhasibwe olwo.

²⁸Okaasie tsinyanzo tsiomusaala kwomupeli mana otsibashekhwo itsahabu. Tsinyanzo etsio nitsio etsilekhoonyelungwa okhuchinga imesa eyo.

²⁹Okaasie tsisahani, nende ebikombe biokhura obubane khu mesa eyo, khandi okaasie tsinyungu nende ebikaye khulwomusango kwokhutsushililwa. Ebindu ebio biosi bikaasibwe okhurula khutsahabu inzeleleshe.

³⁰Orenjeshe imesa eyo imbeli welisanduku liamalako, ne emikaate emitakatifu chiokhuuhaanila isie okhuula chirebungwe khumesa okhwo buli lwosi.

³¹“Okaasie eshichibi shieitaha okhurula khutsahabu inzeleleshe. Oshikaasie hasi washio nende mumbafu washio okhurula khutsahabu eiyiraanyilwe. Khandi ebimuli biokhushing'ona, halala nende ebikombe biashio nende emikhono chiabio, biosi bikaasibwe okhurula khutsahabu eyiraanyilwe.

³²Mana orekhwo emikhono chisasaba kho mbu, chitaru chibe khulubeka lulala, nachio chitaru chibe khulubeka lundi.

³³Buli mulala kumikhono chisasaba echio, kukhoyile okhuba nende ebimuli bieing'ono indayi bitaru, ebifwana shinga eshimuli eshimulikha.

³⁴Ne khumukhono kweshichibi eshio khwosi khube nende ebimuli bieing'ono indayi bine, ebifwana shinga eshimuli eshimulikha.

³⁵Ne hasi wa buli omukhono, khumikhono chisasaba echio, eshimuli shibetsenjeho shilala shilala.

³⁶Ebimuli ebio, emikhono nende eshichibi eshio bikhoyile okhukaasibwa okhurula khutsahabu inzeleleshe eyiraanyilwe.

³⁷Mukaasie tsitaha musaafu mana mutsiachishe khubichibi kho mbu, tsiashenje nitsikhosia imbeli washio.

³⁸Okaasie amahana kamanda, halala nende ebikaye biashio okhurula khutsahabu inzeleleshe.

³⁹Wikhoonyele tsikilo amakhumi kataru natsirano tsieitsahabu inzeleleshe khulwa okhukaasia eshichibi shieitaha eshio nende ebindu biayo biosi.

⁴⁰Oteeme olole mbu, okaasia ebindu ebio shinga olwa ekhumanyiye khushikulu.