Read wanga OKHURULA 26 Bible Online

OKHURULA 26 - wanga bible

OKHURULA 26

¹“Okhumeetakhwo, okaasie liheema litakatifu, okhurula khubitonye ekhumi bieingubo ishinga yeikitani, eyalushilwamwo obuusi bwobukondo bwa buluu, bweisambarao nende obwakhanyu. Ong'olekhwo obulayi bwene ebifwanani biebilonje bietsimbaha.

²Buli eshitonye shieingubo ishinga eyo okhuula shibe eshihelana. Shibe eshioburambi buhela tsimita ekhumi natsibili, nabwo obuchiikha tsimita tsibili.

³Onabe niungaasia ebitonye bieingubo ishinga birano ebio biikhole ingubo ndala, khandi onabe niungaasia ebindi birano ebio orio.

⁴Khwichemo khwa buli ingubo ishinga iliimaasiibwe eyo, onabilekhwo ebifuulwa bieingubo yobukondo bwa buluu. Khandi okhole orio khungubo ishinga yakhabili eyiliimaasiibwe halala eyo.

⁵Ore ebifuulwa amakhumi karano khushitonye shiambeli shieingubo ishinga iliimaasiibwe eyo, khandi ore ebifuulwa bindi amakhumi karano bileeng'aasibwe nende eshitonye shiokhumalilikha shieingubo ishinga yakhabili iliimaasiibwe eyo.

⁶Khandi okaasie ebitiili amakhumi karano, ebiakaasibwa okhurula khutsahabu, bibe ebiokhuliimaasia halala tsingubo tsishinga tsibili etsiliimaasiibwe etsio mbu, tsiikhole ingubo ndala kho mbu, liheema elo libe lilamba.

⁷“Obukule ebitonye bietsingubo tsishinga ekhumi nandala, etsiakaasibwa khubwoya bwetsimbusi mana okaasie ingubo yindi ishinga, yibe eyokhufuunikha khwiheema elo.

⁸Okaasie ebitonye bietsingubo tsishinga ekhumi nandala ebio bibe ebihelaana, bibe ebioburambi obuhela tsimita ekhumi natsitaru, nabwo obuchiikha tsimita tsibili.

⁹Onabe noliimaasia halala tsingubo tsishinga tsirano tsiikhole ingubo ndala, natsio etsindi tsisasaba otsiliimaasie tsibe ingubo ndala. Ingubo ishinga yoliimaasiiye okhurula khutsingubo tsisasaba eyo, ochifuumbemwo khabili, yibe khwikulu imbeli weliheema elo.

¹⁰Mana ore ebifuulwa amakhumi karano khuluhanda lweingubo ishinga yokhumalilikha eyo, khandi ore ebifuulwa amakhumi karano khuluhanda lweingubo ishinga yindi eyo.

¹¹Khandi okaasie ebitiili biomukasa amakhumi karano, ebiokhuliimaasia halala tsingubo tsishinga etsiliimaasiibwe etsio mbu, tsiikhole ingubo ndala eyokhufuunikha khwiheema elo.

¹²Mana inusu yeingubo ishinga yindi eyiba niyitoonyile eyo, ochibambule namukongo weliheema elo.

¹³Ingubo ishinga oburambi bwetsisendimita amakhumi karano tsitoong'a khubuli olubeka lweliheema elo, ochifumbemwo yeleele khutsimbeka tsiosi khulwa okhufuunikha liheema elo mutsimbeka etsio.

¹⁴“Okaasie ebifuunikho bindi bibili okhurula khumaseelo kamakondi nende aketsimbusi. Eyikaasibwe okhurula khwiseelo lielikondi olibashilekhwo irangi inzakhanyu nalio eliindi elo libe elieliselo linyushe, libe eliokhufuunikha mukari mweliheema.

¹⁵“Okaasie emikuulo chieliheema emikololofu okhurula khumusaala kwomupeli.

¹⁶Buli omukuulo kube kwoburambi obuhela tsimita tsine, nabwo obubambalifu bwakwo bube tsisendimita amakhumi kasasaba natsisasaba.

¹⁷Buli omukuulo kube namasaka kabili, akokhuliimaasia emikuulo echio chiosi halala.

¹⁸Okaasie emikuulo amakhumi kabili emulambo weliheema elo.

¹⁹Khandi okaasie ebitiisi amakhumi kane ebieifetsa mana buli omukuulo mulala kwikhaleje khubitiisi bibili, khulwokhutiila amasaka kachio kabili ako.

²⁰Okaasie emikuulo amakhumi kabili emasaba waliheema elo,

²¹nende ebitiisi ebieifetsa amakhumi kane, mama ebitiisi bibili bibe hasi wabuli omukuulo mulala.

²²Okaasie emikuulo chisasaba khulwa enamukuru weliheema elo, khulubeka lwemumbo,

²³khandi okaasie echindi chibili nachio chibe echiomutsikoona.

²⁴Emikuulo chiomutsikoona echio chikhoyile okhulekhana hasi wachio, nebutswa chiliimaasibwe hekulu wachio. Emikuulo chindi chibili echio chiosi chikholwe chirio.

²⁵Chibeho emikuulo munane nebitiisi biachio bieifetsa ekhumi nabisasaba. Ebitiisi bibili birebwe hasi wa buli omukuulo mulala.

²⁶“Okaasie tsisheti ekhumi natsirano okhurula khumusaala kwomupeli, tsirano tsibe khulwa emikuulo chiolubeka lulala lwaliheema elo,

²⁷tsirano tsibe khulubeka lundi lweliheema, natsio etsindi tsirano tsibe khulubeka lwa Mumbo weliheema, enamukuru walio.

²⁸Olusheti lwa hakari nalwo lubire hakari wemikuulo echio, lubire okhurulila khulubeka lulala lweliheema elo okhuula khulubeka lundi lwalio.

²⁹Obashe khumikuulo echio itsahabu mana ochikaasilie ebitiili bieitsahabu khulwa okhutiila tsisheti etsio, ne khandi tsisheti etsio tsiosi otsibashekhwo itsahabu.

³⁰Okaasie liheema elo shinga olwa ekhumanyiye khushikulu khuno.

³¹Okaasie ingubo ishinga okhurula khubuusi obunyushe bweikitani obwalushilwamwo obuusi bwobukondo bwa buluu, bweisambarao nende obwakhanyu. Ong'olekhwo ebifwanani biebilonje bietsimbaha.

³²Mana wachishe ingubo eyo khusiilo tsine tsiomusaala kwomupeli, tsiafuunikhwa nende itsahabu eyilikhwo ebitiili biarenjekhwa khubitiisi bine biemikasa.

³³Wachishe ingubo ishinga eyo hasi webitiili bili hashisuli weliheema, ne inyuma weingubo ishinga eyo, oreyo lisanduku liamalako, elilimwo amachina kabili kalikhwo amalako. Ingubo ishinga eyo yilakabulamwo habundu hatakatifu nende habundu hatakatifu muno.

³⁴Ore eshifuunikho khwisanduku liamalako elo.

³⁵Orenjeshe imesa elwanyi weingubo ishinga eyo, emasaba wa habundu hatakatifu muno, nashio eshichibi shieitaha oshirenjeshe emulambo weliheema elia OMWAMI Nyasaye, shihengane nende imesa eyo.

³⁶“Okaasie ingubo ishinga yeikitani eyalushilwamwo obuusi bwobukondo bwa buluu, bweisambarao nende obwakhanyu khulwa omuliango kweliheema elia OMWAMI Nyasaye, khandi eyang'oonwa nobuusi obulayi.

³⁷Okaasie tsisiilo tsirano okhurula khumusaala kwomupeli, mana otsibashekhwo itsahabu khandi orekhwo ebitiili biakaasibwa okhurula khutsahabu. Okaasie ebichibi ebiakaasibwa okhurula khumukasa khulwa tsisiilo etsio.