Read wanga OKHURULA 27 Bible Online

OKHURULA 27 - wanga bible

OKHURULA 27

¹“Okaasie eshimalilo shiemisango okhurula kumusaala kwomupeli. Obubambalifu nende obuchiikha bwashio bube tsimita tsibili nende tsisendimita amakhumi kabili, nabwo oburambi bwashio bube imita ndala nende tsisendimita amakhumi kataru.

²Orekhwo tsinzika khutsimbeka tsiashio tsine. Tsinzika tsine etsio tsibe eshindu shilala nende eshimalilo shiemisango eshio, mana shiosio shibakhwekhwo omukasa.

³Oshikaasilie tsinyungu tsiokhuramwo likoshe, amapakiyo, tsingaraya, amahana kokhutiilila omulilo nende ebikaye biokhurakhwo omulilo. Ebindu ebio biosi bikaasibwe okhurula khumukasa.

⁴Khandi okaasie eshitalatalilo shietsiseng'enge okhurula khumukasa mana ore khutsikoona tsiashio tsingara tsine tsiokhushichinga, etsiakaasibwa okhurula khumukasa. Ore tsingara tsine etsio khutsikoona tsiashio tsine.

⁵Ore eshitalatalilo eshio hasi wolulika lweshimalilo shiemisango eshio kho mbu, shinyale okhuula hakari weshimalilo shiemisango eshio okhurula hekulu washio.

⁶Okaasie tsinyanzo tsiokhuchinga eshimalilo shiemisango okhurula khumusaala kwomupeli mana otsibashekhwo omukasa,

⁷khandi olweshimalilo shiemisango eshio shiba nishichingwa, winjisie tsinyanzo etsio mutsingara, etsili khubuli olubeka lwashio, buli olwanzo lulala mutsingara ndala.

⁸Oshikaasie mukari mwashio mube muukhaya shinga olwa ekhumanyiye khushikulu khuno.

⁹“Okaasie olukaka lwokhubotokhana olwanyi lweliheema litakatifu. Olukaka olwo lurebwekhwo tsingubo tsishinga tsinyushe etsieikitani. Khulubeka lwemulambo, tsingubo tsishinga etsio tsibe etsioburambi obuhela tsimita amakhumi kane natsine,

¹⁰ne tsingubo etsio tsibohwe khubitsiisi biemikasa amakhumi kabili nibikhasiibwe khubichibi amakhumi kabili ebiakaasibwa okhurula khumukasa. Nebutswa ebifuulwa biatsio nende tsinyanzo tsiatsi bikaasibwe okhurula khufetsa.

¹¹Khandi mukhole murio khulubeka lwemasaba lwosi.

¹²Ne khulubeka lwa Mumbo, mureyo tsingubo tsishinga etsioburambi obuhela tsimita amakhumi kabili natsibili, nende eebitiisi ekhumi nende ebichibi ekhumi.

¹³Khulubeka lwebukwe, ewobwinjililo buli, olukaka olwo lube lwosi lwobuchiika obuhela khandi tsimita amakhumi kabili natsibili.

¹⁴Ingubo ishinga yokhulubeka lwobwinjililo yibe eyihela tsimita tsisasaba nende tsisendimita amakhumi kasasaba nende ebitiisi biokhuchitiililila bitaru nende ebichibi bitaru.

¹⁵Ne khulubeka lundi lwobwinjililo olwo, ingubo eyo khandi yibe eyihela tsimita tsitaru nende ebitiisi biokhuchitiililila bitaru nende ebichibi bitaru.

¹⁶Ne khulwobwinjililo bwomulwanyi lwene, ingubo ishinga inyushe yeikitani yibeyo eyihela tsimita shienda, eyalushilwamwo obuusi bwobukondo bwa buluu, obweisambarao nende obwakhanyu, khandi yibe niyang'oonwakhwo obuusi obulayi. Ingubo eyo yitiilililwe hekulu nende tsisiilo tsine khubichibi bine.

¹⁷Tsisiilo tsiosi etsiokhulukaka lwosi tsiliimaasibwe nende tsinyanzo tsiakaasibwa okhurula khu fetsa, nabio ebitiili bibe ebiakaasibwa okhurula khu fetsa ne ebichibi biabio bibe ebiakaasibwa okhurula khumukasa.

¹⁸Oburambi bwolukaka olwo lwosi bube tsimita amakhumi kane natsine, obubambalifu tsimita amakhumi kabili natsibili nabwo obwiyinikhu bwalwo bube tsimita tsibili nende tsisendimita amakhumi kabili. Tsingubo tsishinga tsiakhwo tsibe etsiakaasibwa okhurula khubuusi obunyushe bweikitani, nabio ebichibi bibe ebiakaasibwa okhurula khumukasa.

¹⁹Ebindu biosi ebiomwiheema nende ebibambo bialio biosi kata ebibambo biolukaka biosi, bibe ebiakaasibwa okhurula khumukasa.

²⁰“Olachilisie abandu ba Isiraeli bakhureerere amafura kemitseituni ameeleleshe amalayi khulweitaha, kho mbu, itaha yashenje buli khungoloobe.

²¹Haroni nende abasianibe nibo abalachihafinjia elwanyi weingubo ishinga eyili imbeli weliheema Litakatifu, mana yakha okhuchaaka khungolobe okhuula mumamwibwi. Abandu ba Isiraeli boosi balinde lilako lino emiyika chiosi munzibulo tsiabwe tsiosi.