Read wanga OKHURULA 28 Bible Online

OKHURULA 28 - wanga bible

OKHURULA 28

¹“Langa omusiani wenywe Haroni nende abasianibe: Nadabu, Abihu, Eleazari nende Itsumari, betse aha oli, barule mubandu ba Isiraeli mbu, baakhalabanile isie shinga abesaaliisi.

²Okaasilie omusiani wenywe Haroni ebifwalo ebitakatifu, khulwa oluyali nende ing'oono.

³Nawe oboolele abandu bobusitsa, aba ndahelesia obuchesi, ne obaboolele bakaasilie Haroni ebifwalo, ebialakholelanga emilimo chiobwisaaliisi niyefwalile, mana yahulwe okhuba omukhalabani wanje.

⁴Obaboolele bakaasie ingubo yokhushilifu, ifodi, ikanzu, likoti, eshilemba, nende omushipi. Bakaasilie omusiani wenywe halala nende abasianibe, ebifwalo biobwisaaliisi kho mbu, baakhalabanilenje isie shinga abesaaliisi.

⁵Abandu abasitsa abo banabe tsingubo etsio okhurula khwichoora lia buluu, elieisambarao, eliakhanyu, obuusi bweitsahabu nende okhurula khwichoora lieikitani inyushe.

⁶“Banabe ifodi yobuusi bwobukondo bweitsahabu, obwa buluu, bweisambarao, okhurula khubwoya obwakhanyu nende okhurula khungubo yeikitani inyushe. Ifoti eyo ying'oonwekhwo obuusi obulayi.

⁷Yibekhwo emikoye chibili chiokhumabeka, echia yinyala okhubohelwa.

⁸Omushipi okuukaasiibwe obulayi bwene, okhurula khwichoora elala elo, kunabilwe khufoti eyo mana bikhole ingubo ndala.

⁹Obukule amachina kabili kobukusi, mana ohandichekhwo ameera ekhumi nakabili, akabaana ba Yakobo.

¹⁰Ohandiche khwichina elala ameera kasasaba khandi khulindi kasasaba.

¹¹Okhaabe omusaari omusitsa mana asaare ameera kabaana ba Isiraeli khumachina kabili ako, mana abashekhwo itsahabu.

¹²Ore amachina kabili ako khumikoye chibili echieifodi echiokhumabeka echio, kabe eshitsulilo khulwa abaana ba Isiraeli. Khandi Haroni yesi olwa yetsa imbeli wanje, achinjenje amachina ako khumabekake kho mbu, isie OMWAMI Nyasaye nditsulilenje abandu banje ba Isiraeli.

¹³Okaasie ebitiili bieitsahabu bibili,

¹⁴nende tsinyolo tsieitsahabu inzeleleshe tsibili, etsiboroolwe shinga emikoye, mana ore tsinyolo etsio khubitiili ebio.

¹⁵“Okaasie ingubo eyokhwifwala khushilifu, eya Omwisaaliisi Omukhulundu alekhoonyelanga khulwa okhumanya aka Nyasaye yeenya. Ingubo eyo yikaasibwe okhurula khwichoora elala tsana elia ifodi yakaasibwakhwo, khandi ing'oonwe shinga olwa ifodi eyo yang'oonwa nende obuusi obulayi.

¹⁶Ingubo yokhuhilifu eyo yibe yoburambi nende obuchiikha obuhela bwetsisendimita amakhumi kabili natsibili.

¹⁷Okaasiekhwo emikhoosi chine chiamachina kobukusi. Omukhoosi kwambeli kubekhwo lichina lia akiki, elia topazi nende lialumasi eliakhanyu.

¹⁸Omukhoosi kwakhabili kubekhwo lichina lia zumaridi, elia yohari nende lialumasi.

¹⁹Omukhoosi kwakhataru kubekhwo lichina lia yasinzo, liakiki nende liametsisito.

²⁰Ne omukhoosi kwakhane, kubekhwo elia zabarajadi, elia shohamu nende elia yasipi. Amachina kobukusi ako koosi okahandiekhwo niwikhoonyela itsahabu.

²¹Buli lichina khumachina ekhumi nakabili ako, lisaarungwekhwo eliira elala elala, mana kabe ekhumi nakabili khulwa tsimbia ekhumi natsibili tsia Isiraeli.

²²Okaasie tsinyolo okhurula khutsahabu inzeleleshe, otsiborole mana otsire kungubo yokhushilifu eyo.

²³Okaasie tsingaka tsibili tsietsahabu mana otsire buli ndala khukoona tsibili tsieikulu, etsieingubo yokhushilifu eyo,

²⁴mana obohe tsinyolo tsibili etsio khungaka tsibili etsio.

²⁵Tsindulo tsibili tsiolunyolo lweitsahabu olwo, otsibohe imbeli khumikoye chibili echieingubo yokhumabeka eyo.

²⁶Mana okaasie tsingaka tsibili tsieitsahabu tsitiile hasi wetsikoona tsibili mukari weifodi eyo.

²⁷Okaasie khandi tsingaka tsindi tsieitsahabu tsibili mana ohandie emwalo wemikoye chiamabeka keifodi, ahambi nende aha yonjelwa, hekulu womushipi kweifodi.

²⁸Obohe tsingaka tsiokhushilifu etsio khungaka tsieifodi nomushipi kwa buluu, mana ingubo yokhushilifu eyo iyeeshe ahambi khumushipi, kho mbu, yileshe okhulekhana nende ifodi eyo.

²⁹“Buli olwa Haroni yenjila habundu Hatakatifu, abetsenje niyefwalile inguboye eya khushilifu, eyilikhwo ameera kabandu betsimbia tsia Isiraeli, mana isie OMWAMI Nyasaye, ndalabetsulilanga.

³⁰Ore khunguboye eyo amachina ka Urimu nende Tsumimu[12] kabetsenje khushilifu shia Haroni olwa yenjila mwiheema lianje. Khulweshio, Haroni alachinganga obukhalachi bweshiina shiabandu ba Isiraeli mumwoyokwe buli nyanga.

³¹“Ikanzu eyilabetsanga emwalo weifodi eyo yibe eya buluu.

³²Ingubo eyo ibekhwo induu yokhufwalamwo omurwe hakari wayo. Ingubo yokhushilifu yeitsahabu eyo yibotokhasibwe khunduu eyo, mana likosi lieingubo eyo lileshe okhurandukha.

³³Mana khundulo weingubo eyo hasi wayo, banabilekhwo amakomamanga ka buluu, akeisambarao nende amakhanyu. Khandi ebikhuli bieitsahabu bibohwe hakari kari wamakomamanga ako okhuchibotokhana.

³⁴Banabile ebikhuli bieitsahabu khundulo weingubo eyo okhubotokhasia yoosi pe.

³⁵Haroni alefwalanga eshifwalo eshio olwa aba niyaakhalabanila habundu hatakatifu kho mbu, aleshe okhufwa.

³⁶“Okaasie isahani yeitsahabu inzeleleshe, eyahandikwakhwo mbu, ‘Omwahule owa OMWAMI Nyasaye’

³⁷Obohe isahani eyo khushilemba, imbeli washio nende omukoye kwa buluu.

³⁸Mana shibe khubweni bwa Haroni olwa aba nashiifwalile kho mbu, isie OMWAMI Nyasaye efuchilile emisango chiabandu ba Isiraeli baakholela isie.

³⁹“Munabe likoti lieikitani inyushe, nende omushipi okung'oolilwekhwo obuusi obulayi.

⁴⁰“Khandi munabile abaana ba Haroni boosi amakoti, emishipi nende tsikofia, ebiokhubahelesia oluyali.

⁴¹Ofwale omusiani wenywe Haroni, halala nende abasianibe tsingubo etsio. Mana obaahule khulwa okhubatsushililakhwo amafura akomutseituni kho mbu, baakhalabanile shinga abesaaliisi.

⁴²Khandi obanabile tsingubo tsinyimbichiti etsieikitani, etsiokhubafuunikha okhurula mubishishienje okhuula khumarango kho mbu, baleshe okhulolesia eshiechenye shiabwe.

⁴³Okhuula Haroni nende abasianibe befwalenje tsingubo etsio buli olwa batsia mwiheema liokhubaho khwanje, noho olwa baba nibatsia okhukhalabana shinga abesaaliisi khushimalilo eshiemisango Habundu Hatakatifu, kho mbu, baleshe okhwirwa khulwa okhumanyia eshiechenye shiabwe. Lino ni lilako elia Haroni nende abolwibulwe balalindanga okhuula inziayo.