Read wanga OKHURULA 29 Bible Online

OKHURULA 29 - wanga bible

OKHURULA 29

¹“Kano Niko aka olakholela Haroni nende abaanabe khulwa okhubaahula kho mbu, babe abesaaliisi khulwa okhuukhalabanila. Obukule ihunwa ndala nende amamiiku kabili. Emiruko echio chiosi chibe echibulamwo obulema bwosi bwosi.

²Wikhoonyele obusie obunyushe bweingano okhuteekha emikaate, habula shichilabamwo limela ta, ne echindi ochiteeshele amafura kemitseituni nachio echindi shiolachitekha namafura tawe. Khandi ochikaasie echifwana shinga ebisikuti ebibashilwekhwo amafura.

³Obire mushimwelo ochinjilemwo. Mana obukule ihunwa eyo nende amamiiku kabili ako undeerere halala nende ebindu bindi ebio khulwa okhukholela omusango.

⁴“Oreere Haroni nende abasianibe hamuliango weliheema liokhubaho khwanje mana obaboolele besinje khulwokhwisiiya.

⁵Olunyuma ofwale Haroni tsingubo tsiobwisaaliisi. Etsiatsana nzietsino: likoti, ikanzu, ifodi nende ingubo yokhushilifu. Mana omubohe omushipi kwobwisaaliisi.

⁶Omufwale eshilemba khumurwe. Ne oboyekhwo olusimbi olutakatifu olwahandikwakhwo mbu, “Omwahule owa OMWAMI Nyasaye.”

⁷Mana obukule amafura amatakatifu kokhutsushilila, omutsushilile khumurwekwe abe omwahule.

⁸“Oreere abaanabe boosi mana obafwale amakoti,

⁹obabohe emishipi mubishienje biabwe khandi abafwale tsikofia khumirwe chiabwe. Nolwa olaahula Haroni nende abasianibe orio. Bo nende abolwibulo lwabwe balaakhalabanila isie shinga abesaaliisi inziayo.

¹⁰“Oreere ihunwa imbeli weliheema litakatifu mana oboolele Haroni nende abasianibe bachitiile omurwe.

¹¹Osinzile ihunwa eyo hamuliango weliheema litakatifu.

¹²Okhombolekhwo amalasile keihunwa ako nolwalalwo mana obashe khutsinzika tsieshimalilo shiemisango eshio. Ne akatong'a okasundule hasi weshimalilo shiemisango.

¹³Olunyuma obukule amasinya koosi kafuunikhanga ebindu biomunda biosi ebuleka indayi weshitakhaliira, nende tsifuko, mana obisambile khushimalilo shiemisango.

¹⁴Nebutswa inyama yeihunwa eyo, liseelo liayo nende ebiomunda biayo obisambile elwanyi wekambi. Okwo nomusango kwokhuyiniaho obwonooni bwabesaaliisi.

¹⁵“Obukule limiiku elala ne oboolele Haroni nende abaanabe balitiile khumurwe.

¹⁶Olisinze mana obukule amalasile kalio omiitse khumbeka tsieshimalilo shiemisango tsiosi tsine.

¹⁷Okhalachemwo limiiku elo ebitonye ebitonye. Wosie ebiomunda bialio nende ebiatakho bialio, mana obire khushimalilo shiemisango biosi halala nende omurwe kwalio.

¹⁸Osambe limiiku elo liosi khushimalilo shiemisango kho mbu, uhaanile isie omusango omusambe. Isaakakha yomusango omusambe injamisinjia.

¹⁹“Obukule limiiku lindi elo mana oboolele Haroni nende abaanabe batiile emikhono chiabwe khumurwe kwalio.

²⁰Olisinze mana obukulekhwo khumalasile kalio, obashe khubutsunzu bweshirwi shiomukhono musaatsa shia Haroni nende abasianibe, khutsinzala tsikhongo tsiemikhono chiabwe emisaatsa nende khutsinzala tsikhongo tsiebilenje biabwe biomukhono musaatsa. Amalasile kaba nikatoonyile okamiitse khutsimbeka tsieshimalilo shiemisango tsiosi tsine.

²¹Obukule amalasile kali khushimalilo shiemisango otsokasiemwo amafura mana okamiitse khu Haroni, khutsingubotsie nende khubasianibe halala nende khutsingubo tsiabwe. Haroni, abasianibe nende tsingubo tsiabwe balaba nibaahulwe khulwa okhuukhalabanila isie.

²²“Otete orusiekhwo amasinya kelimiiku elo, omusembe, amasinya kabetsanga khubiomunda, abuleka indayi weshitakhaliira, tsifuko tsiosi tsibili halala nende amasinya katsio nende eshiatakho shiomukhono musaatsa (Ebiene ebio, nebiokhwahula abesaaliisi).

²³Obukule omukaate mulala, eliandasi elala eliatekhwa namafura, eshisikuti eshibulamwo limela nende omukaate mulala okulaakasilibwamwo amafura kemitseituni ta, obirusie mushimwelo shia baahaaniile eshio.

²⁴Obire biosi mumakhono ka Haroni nende akabaanabe boosi mana obaboolele babiahule, bibe ebiahule bianje shinga eshihaanwa shianje eshilobole.

²⁵Olunyuma obibukule okhurula khubo, mana obisambile khushimalilo shiemisango, khwikulu khwemisango emisambe bibe shinga omusango kwanje omusambe. Isakakha yomusango kuno, injamisinjia muno.

²⁶“Obukule itakata yelimiiku elo mana ochiahule yibe eshihaanwa shianje eshilobole.

²⁷“Olwa omwisaaliisi yaahulwa, obukule itakata nende eshiatakho shielimiiku liokhwikhoonyelwa khulwa okhwahula abesaaliisi, mana obiahule bibe eshihaanwa shianje eshilobole, biahulwe khulwa abelsaaliisi.

²⁸Buli lwosi olwa abandu ba Isiraeli bakhola omusango kwokhureera omulembe, itakata yelimiiku nende eshiatakho shialio bilabetsanga ebiabesaaliisi. Eshio shilabetsanga eshihaanwa eshiabandu khwisie OMWAMI Nyasaye.

²⁹“Olwa Haroni alifwa, ebifwalo biobwisaaliisibwe bilihelesibwa abaanabe khulwa okhubifwala olwa baliba nibaahulungwa okhuba abesaaliisi.

³⁰Omusiani oulikalukha mubwisaaliisi mushilenje shia Haroni, olwa aba niyetsa mwiheema liokhubaho khwanje khulwa okhukhalabana Habundu Hatakatifu, okhuula yefwale tsingubo etsio khulwa tsinyanga musaafu.

³¹“Obukule inyama yelimiiku yikholeelwe omusango kwokhwahula abesaaliisi eyo mana ochiteeshele habundu hatakatifu.

³²Bakhoyile okhuliila inyama eyo habwinjililo bweliheema liokhubaho khwanje. Bachilie halala nende emikaate chiba nichitoonyile mushimwelo.

³³Abesaaliisi balie ebindu biikhoonyeelwe mukhukhola omusango kwokhwahulwa khwabwe ebio. Abesaaliisi bonyene nibo abakhoyile okhulia ebindu ebio, okhuba nebitakatifu.

³⁴Inyama yosi yosi noho omikaate nibiba nibitoong'a okhuula mukamba, okhuula bisambwe. Shibikhoyile okhuliibwa ta, shichila nebitakatifu.

³⁵“Okhole emisango chiokhwahulwa khwa Haroni nende abaanabe okhuba abesaaliisi khulwa tsinyanga musaafu shinga olwa ekhulachile.

³⁶Ne buli nyanga olahaanilanga ing'ombe ihunwa khulwa okhuukholela omusango, kho mbu, oleshelwe obwonoonibwo. Omusango okwo kulaba okwokhusiiya eshimalilo shiemisango. Khandi otsushilile amafura khushimalilo shiemisango eshio khulwa okhushikhola okhuba eshitakatifu.

³⁷Okhole omusango kwokhutisa eshimalilo shiemisango eshio khulwa tsinyanga musaafu noshikhola okhuba eshitakatifu. Ne omundu yesi yesi noho eshindu shiosi shiosi esitilakhwo shilasalisibwa nobutakatifu bwashio.

³⁸“Buli nyanga mutsinyanga etsiolunyuma tsiosi, osinzilenje khushimalilo shiemisango ebimeeme bibili ebiomuyika mulala khulwa okhukhola omusango.

³⁹Osinze eshimeeme shilala mumabwibwi ne nashio eshindi oshisinze nibwakhela.

⁴⁰Eshimeeme shiambeli oshihaanenje halala nende ikilo ndala yobusie bweingano obunyushe, nibutsokasibwemwo amafura ilita ndala. Musundulenje hasi ilita ndala yeidivai khulwomusango kwokhunywa.

⁴¹Khandi eshimeeme shiakhabili eshio oshihaanenje hangoloobe mana oshihaane halala nende ebiohaanile eshimeeme shiomumabwibwi eshio.

⁴²Omusango kwokhusamba okwo kukholelungwe hamuliango heliheema liokhubaho khwanje emiyika chiosi.

⁴³Habwene yabo niho aha ndalakaanilanga nende abandu ba Isiraeli, ne khandi oluyali lwokhubaho khwanje lulahakhola okhuba hatakatifu.

⁴⁴Ndalakhola liheema nende eshimalilo shiemisango okhuba ebitakatifu, khandi ndalaahula Haroni nende abasianibe okhuukhalabanila shinga abesaaliisi.

⁴⁵Ndalamenya hakari wabandu ba Isiraeli, khandi ndalaba Nyasaye wabwe.

⁴⁶Ne nilwo olwa balamanya mbu, nisie OMWAMI Nyasaye wabwe, owabarusia mushialo shia Misiri kho mbu, emenye mubo. Nisie OMWAMI Nyasaye wabwe.