Read wanga OKHURULA 3 Bible Online

OKHURULA 3 - wanga bible

OKHURULA 3

¹Inyanga yindi Musa yali niyayanga emiruko chia nyakhufialanyene Yetsiro, omwisaaliisi wa Midiani. Inyanga eyo yayila emiruko echio mushitsiimi olubeka lwa Mumbo, mana natsia khushikulu shia Zayuni[5], eshikulu shia Nyasaye.

²Ebweneyo, omumalaika owa OMWAMI Nyasaye yamuloleshela shinga olumemu lwomulilo, okwakha okhurula hakari weshitsakha, mana nahenga nalola eshitsakha eshio nishiakhanga omulilo, nebutswa shishiali nisiyitsanga tawe.

³Kho Musa naboola ari, “Ndalasita ahambi endolekhwo likhuwa liamakana lino, mbushiina eshitsakha shino nishilayitsanga ta?”

⁴Olwa OMWAMI Nyasaye yalola mbu, Musa asutile hambi okhulola eshiali nishikholekhanga, Nyasaye yamulanga nali mushitsakha hakari ne naboola ari, “Musa! Musa!” Naye Musa nakalusia naboola ari, “Endiho!”

⁵Mana Nyasaye naboola ari, “Shiolasita hambi ta, fwalula ebilaaro okhurula mubilenjebio, shichila habundu hosiinjiile yaho nahatakatifu.”

⁶Khandi Nyasaye naboolela Musa ari, “Isie nisie Nyasaye wa bakuukabo, Nyasaye wa Aburahamu, Nyasaye wa Isaka kandi Nyasaye wa Yakobo.” Mana Musa nafuunikha obwenibwe shichila yali nariire okhuhenga Nyasaye.

⁷Mana OMWAMI Nyasaye naboola ari, “Enduutsi obunyaakhani bwabandu banje abali Misiri, khandi embuliile okhuhaba khwabwe khulwa okhunyaasibwa nabasinjilili babwe. Emanyile obunyakhani bwabwe bwosi.

⁸Ne nditsile okhubahonokosia okhurula mubunyali bwabandu ba Misiri, nende okhubarusia mushialo shia Misiri, okhubayila mushialo eshiyinda khandi eshinulu, eshia Abakanani, Abahiti, Abamori, Aperizi, Abahiwi, nende Abayebusi.

⁹Ne bulaano, amalilo kabandu ba Isiraeli kanzuliile ne khandi ndalutsi obusandibwi bwabandu ba Misiri babasandinjia.

¹⁰Bulaano itsa, ndalakhuruma khumuruchi wa Misiri kho mbu, onyale okhurusia abandu banje, abaana ba Isiraeli abo okhurula mushialo shia Misiri.”

¹¹Nebutswa Musa yareeba Nyasaye ari, “Ne nasi nisie wiina ounyala okhutsia khuruchi wa Misiri nende okhurusia abaana ba Isiraeli okhurula mushialo shia Misiri?”

¹²Naye Nyasaye namukalusia ari, “Isie ndalaba halala ninawe. Ne olwa olirusia abandu ba Isiraeli mushialo shia Misiri, olinzinamila khushikulu shino. Eshio nishio eshiakhabe eshilolelo okhumanyisia mbu, nisie oukhurumile.”

¹³Mana Musa namureeba khandi ari, “Nemba nenzia khubandu ba Isiraeli mana embaboolela endi, ‘Nyasaye wabakuuka benywe yarumile khwinywe,’ nabo bareebe bari, ‘Eliiralie niye wiina,’ nebakalusie endie?”

¹⁴Naye Nyasaye nakalusia Musa ari, “Isie Nisie” khandi naboola ari, “Oboolele abandu ba Isiraeli mbu, Isie, OMWAMI Nyasaye, Nyasaye wabakuuka benywe, Nyasaye wa Aburahamu, Isaka nende Yakobo yarumile khwinywe.”

¹⁵Khandi Nyasaye naboolela Musa ari, “Boolela Abaisiraeli ori, ‘OMWAMI Nyasaye, Nyasaye wabakuuka benywe, Nyasaye wa Aburahamu, owa Isaka, nende owa Yakobo yarumile khwinywe.’ Lino nilio eliira lianje inziayo. Khandi ndaletsulilungwa endio mutsinzibulo tsiosi.

¹⁶Tsia okhung'asie abakhulundu ba Isiraeli halala, mana obaboolele ori, ‘OMWAMI Nyasaye, Nyasaye wa Aburahamu, owa Isaka nende owa Yakobo yandolesheele naboola ari: Endutsi shinga olwa munyakhananga mushialo shia Misiri.

¹⁷Khandi emusuubisia endi, ndalamurusia mubunyakhani obwa Abamisiri nemuyila mushialo shia Abakanani, Abahiti, Abamori, Abaperisi Abahiwi nende Abayebusi, eshialo eshiyinda khandi eshinulu.’

¹⁸“Ne balahulila amakhuwa kobaboolela, khandi iwe nende abakhulundu ba Isiraeli okhuula mutsie khumuruchi wa Misiri mana mumuboolele muri, ‘OMWAMI Nyasaye, Nyasaye wa Abaheburania yakhulolesheele. Ne bulaano khukhusaaya mbu okhuleshe khutsie oluchendo lwetsinyanga tsitaru mushitsiimi khumumalile omusango.’

¹⁹Emanyile mbu omuruchi shialamufuchilila mbu mutsie nalanichilisibwe tawe.

²⁰Habula ndalekhoonyela obunyali bwanje khulwa okhukhola ebikhole biokhuriisia nende okhukhupa Abamisiri. Olunyuma lwamakhuwa ako omuruchi alafuchilila mbu murule mutsie.

²¹Khandi ndakhola Abamisiri okhumuhelesia inywe oluyali kho mbu, olwa muchaaka oluchendo, shinamurule nimuli amakhono makhaya tawe.

²²Nebutswa buli omukhasi Omuisiraeli alasaba okhurula khu mumenyaniwe, nende okhurula khumucheni oumenyile ninaye munzuye mbu, amuhelesie itsahabu, ifetsa nende tsingubo. Nenywe mulafwala abaana benywe abasiani nabakhaana. Nolwa mulanuula murio Abamisiri obuyinda bwabwe.”