Read wanga OKHURULA 30 Bible Online

OKHURULA 30 - wanga bible

OKHURULA 30

¹“Okaasie eshimalilo shiemisango okhurula khumusaala kwomupeli eshiokhusambilakhwo obubane.

²Oshikaasie eshihelaana tsimbeka tsiosi tsibili kho mbu, obuchiikha nende obulunji bube obuhela tsisendimita amakhumi kane nende tsirano (45). Nabwo oburambi bwashio okhuula bube tsisendimita amakhumi shienda. Mana okaasie tsinzika tsiashio tsine khubuli ikoona.

³Obukule itsahabu inzeleleshe mana obashe khushimalilo shiemisango eshio, oshibashe kata khu tsimbeka tsiashio tsine etsio halala nende khu tsinzika tsine tsiashio etsio. Khandi obashe itsahabu khululika lwashio lwosi.

⁴Khandi okaasie tsingaka tsieitsahabu mumbafu mwashio khululika hasi washio, etsiokhwikhoonyela khulwa okhushichinga.

⁵Ne tsinyanzo tsiokhuchinjila tsiosi otsibashekhwo itsahabu inzeleleshe.

⁶Ore eshimalilo shiemisango eshio elwanyi weingubo ishinga, eyeeleelanga imbeli welisanduku lieindakano yanje elo. Yaho niho aha ndalaakaanilanga ninenywe.

⁷Buli mumabwibwi, olwa Haroni yetsa okhuhafia tsitaha, alasambilanga obubane bweshing'ari eshilayi khushimalilo shiemisango eshio.

⁸Khandi olwa yetsa okhuhafia tsitaha khungolobe, okhuula asambe obubane nibutuumuukha omwosi kwelibuliesi. Mukholenje murio buli lwosi obulakonelakhwo tawe inziayo.

⁹Shimulakholelakhwo khushimalilo shiemisango eshio omusango kwobubane kundi kwosi kwosi okulakhoyile okhukholelwakhwo, kata omusango omusambe, kata omusango kweimele tawe. Khandi shimulamalilekhwo omusango okwokhutsukhakhwo amalasile tawe.

¹⁰Buli khumuyika, Haroni akholenje eshitiso khulwa okhutsukha amalasile komuruko kwomusango kwokhurusiaho obwonooni khutsinzika tsiashio tsine etsio, khulwa okhushisiiya. Omusango okwo kukholungwe mutsinzibulo tsienywe tsiosi inziayo. Eshimalilo shiemisango eshio neshitakatifu shianje isie OMWAMI Nyasaye.”

¹¹OMWAMI Nyasaye naboolela Musa ari,

¹²“Olwa oba nobala abandu ba Isiraeli, khulwa okhumanya obunji bwabwe, okhuula buli mundu arunje omurungo khulwa okhununula obulamubwe omwene, kho mbu aleshe okhunyoola amasila lwoba nobabala.

¹³Buli mundu oubalwa, okhuula arunje omurungo kukhoyeele okhurungwa khwisie OMWAMI Nyasaye. Amapesa ako okhuula kabe akahelana nende eshichelo shiarebwaho.

¹⁴Buli mundu oubalwa, ouli nemiyika amakhumi kabili nende okhubisiaho, okhuula arunje omurungo okwo khwisie OMWAMI Nyasaye.

¹⁵Abandu boosi abayinda kata abamanani, okhuula barunje omurungo kuhelana olwa barunga amapesa ako khulwa okhwinunula.

¹⁶Nawe olasololanga amapesa kokhusiiya ako, mana okekhoonyelenje khulwa okhukholela emilimo chiokhulinda liheema litakatifu. Omurungo okwo kulaba mushilenje shiobulamu bwabwe, nasi ndaletsulila okhubalinda.”

¹⁷OMWAMI Nyasaye naboolela Musa ari,

¹⁸“Okaasie olukaraya okhurula khumukasa, lwokhusaabilakhwo. Okaasie khandi eshichibi shialwo okhurula khumukasa, mana olurenjeshe hakari weliheema litakatifu nende eshimalilo shiemisango, mana otsushekhwo amaatsi.

¹⁹Haroni nabasianibe balasaabangamwo amakhono kabwe nende okhwosiamwo ebilenje biabwe

²⁰nibashili okhwinjila mwiheema noho okhusita khushimalilo shiemisango khulwa okhuhaanila omusango kweimele.

²¹Okhuula basaabe amakhono kabwe nende ebilenje biabwe kho mbu, baleshe okhufwa. Haroni nende abolwibulolwe boosi balonde lilako elo enziayo.”

²²OMWAMI Nyasaye naboolela Musa ari,

²³“Bukula amalesi amalayi amanyushe. Amalesi ka manemane tsikilo tsisasaba, aka omutalasini kweshing'ari kabe tsikilo tsitaru, aka omukhoonye kweshing'ari eshilayi kabe tsikilo tsitaru

²⁴nende akandi akomutalasini akahela tsikilo tsisasaba, (koosi kabe okhulondana nende eshichelo shiarebwaho). Khandi omeetekhwo tsilita tsine tsiamafura komutseituni,

²⁵mana okaasie amafura amatakatifu keshing'ari kokhutsushilila, akatsokasibwemwo eshing'ari eshilayi.

²⁶Olatsushililanga amafura ako khwiheema liokhubaho khwanje, khwisanduku lieindakano,

²⁷khumesa nende khubindu bilikhwo biosi, khushichibi shieitaha nende ebindu biashio biosi, khushimalilo shiokhusambilakhwo obubane.

²⁸Khandi otsushilile amafura ako khushimalilo shiemisango eshiokhumalilakhwo emisango emisambe nende ebindu biashio biosi nende khulukaraya nende eshichibi shialwo.

²⁹Waahule orio ebindu ebio kho mbu, bibe ebitakatifu muno. Ne omundu yesi yesi noho eshindu shiosi shiosi eshibitiilakhwo, shilasaalisibwa nobutakatifu bwabio.

³⁰Mana khandi otsushilile khu Haroni nende abasianibe amafura mana khandi obaahule babe abesaaliisi khulwa okhukhalabanila isie.

³¹Kho oboolele abandu ba Isiraeli ori: Okhukhutsushilila amafura okhutakatifu khuno nikhwo okhulakholungwa buli lwosi olwa munzinamila khulwa tsinyanga tsitsanga tsiosi.

³²Amafura kano shikakhoyile okhutsushililwa khumundu yesi yesi butswa ta, kata inywe abandu ba Isiraeli bandi, shimukhoyile okhukaasia amafura kafwanana ninako tawe. Namafura amatakatifu, kho mukakhole kabe amatakatifu.

³³Ne omundu oulali omwisaaliisi nakakaasia, kata omundu oulali omwisaaliisi nakatsushilila khumundu undi, kho boosi babili, outsushiliile nende outsushiliilwekhwo shibalaba abandu banje tawe.”

³⁴OMWAMI Nyasaye naboolela Musa ari, “Bukula ebichelo bihelaana, ebia buli amalesi keshing'ari eshilayi ka inatafi neishekheletsi, nende nakhelebena, halala nende obubane obunyushe,

³⁵mana wikhoonyele ebindu ebio okhukaasia obubane shinga amafura akokhwibakha, mana oremwo omunyu okhukakhola okhuba amatakatifu.

³⁶Mana obukulekhwo akandi okhurulakhuko, okatubule kabe amanyushe, mana okare mwiheema liokhubaho khwanje, mana okahanye khwisanduku lieindakano yanje. Obubane obunyushe obwo bulaba obutakatifu muno khwinywe.

³⁷Shimulakaasiekhwo obubane bundi munjila yino khulwa okhwikhoonyela abeene tawe. Mubukule obubane buno okhuba obutakatifu khwisie sienyene.

³⁸Omundu yesi yesi oubukaasia shinga amafurake kokhwibakha okhuula olondwe arule mubandu banje.”