Read wanga OKHURULA 31 Bible Online

OKHURULA 31 - wanga bible

OKHURULA 31

¹OMWAMI Nyasaye yaboolela Musa ari,

²“Ndaahule Bezaleli omusiani wa Uri, omwitsukhulu wa Huri, owoluyia lwa Yuda,

³ne emureeremwo Roho wanje, obunyali, obumanyilisi, nende obusitsa bwokhukhola emilimo chiahukhane,

⁴obwokhwiranya ebindu okhurula khutsahabu, ifetsa, nende okhurula khumukasa.

⁵Yamanya okhubaatsa amachina nende tsimbao ebiokhukaasia ebindu biahukhaane.

⁶Khandi ndahule Oholiabu omusiani wa Alisamaki, owomuluyia lwa Dani bokhukhola emilimo nende Bezeleli. Ndahelesiye khandi ababaatsi bandi boosi obunyali obunji bwamakana khubusitsa bwetsimbia tsiosi okhukaasia eshindu shiosi eshia ndakhulachile mbu shikwasibwe.

⁷Ebiene biebino mbu liheema libunyali bwanje lisanduku liamalako neshifuunikho shialio, nende biosi ebiokhusiaya liheema Litakatifu.

⁸Bakasie imeesa, neshichibi eshieleleshe shietsitaha nebikaye biashio biosi, nende eshimalilo shiemisango shiobubane bweshing'ari.

⁹Khandi bakaasie eshimalilo shiemisango eshiokhumalilakhwo emisango emisambe, nebikaye biashio biosi bakaasie neshikaye shiokhusaaba halala neshichibi shiashio.

¹⁰Mana abaanabe nibanaba ebifwalo ebilayi biobwisaaliisi. Haroni nende abasianibe nibo abalefwalanga ebifwalo bienebio olwa baba nibamalanga emisango chiobwisaalisi.

¹¹Okhumeetakhwo, bakaasie amafura kokhutsushilila nende obubane bweshing'ari eshilayi ebia habundu hatakatifu. Olwa baba nibakasinjia ebindu bino, okhuula bakhole butswa shinga olwa ekhulachilisiye.”

¹²Mana OMWAMI Nyasaye naboolela Musa ari,

¹³“Boolela abandu ba Isiraeli ori: Okhuula mulinde inyanga eya Sabato, shichila inyanga eyo neshilolelo hakari wanje ninenywe, emiyika chiosi kho, mumanye mbu OMWAMI Nyasaye nisie owamwahula nimukhola abatakatifu.

¹⁴Okhuula mulindenje Isabato, shichila neinyanga indakatifu khwinywe. Omundu yesi yesi oulahelesia inyanga eyo oluyali ta, aleerwa. Omundu yesi oukhola emilimo khunyanga eyo, alarusibwa mubandube.

¹⁵Muli netsinyanga tsisasaba etsiokhukholelamwo emilimo. Nebutswa khunyanga yomusaafu mulakholenjekhwo emilimo tawe, inyanga eyo neyokhuhuluukha, khandi indakatifu. Omundu yesi oukhola emilimo khunyanga eyo, okhuula yerwe.

¹⁶Khulweshio, abandu ba Isiraeli okhuula balinde inyanga ya Sabato eyo shinga eshilolelo shieindakano yanje ninabo, emiyika chiosi.

¹⁷Inyanga yino, neshilolelo shilahwaho tawe hakari wabandu ba Isiraeli ninasi shichila Isie OMWAMI Nyasaye ndalonga likulu nende eshialo munyanga tsisasaba, ne khunyanga yomusaafu nihulukha okhukhola emilimo.”

¹⁸Olwa Nyasaye yali namalile okhuboola nende Musa khushikulu shia Zayuni, yamala nahelesia Musa amachina amabatse kabili aka yali nahandiichekhwo amalako nomukhonokwe omwene.