Read wanga OKHURULA 32 Bible Online

OKHURULA 32 - wanga bible

OKHURULA 32

¹Ne olwa abandu balola Musa nashindile okhukholomokha okhurula khushikulu natoonyileyo oluhono olurambi, bekhung'asia halala nibaboolela Haroni bari, “Chama okhukaasilie omunyasaye bwangu oulakhwimilila injila. Shichila omusaatsa mbu Musa, owakhwimililenje injila okhurula Misiri, shikhumanyile eshiamwikholeshe khwo tawe.”

²Kho Haroni nabakalusia ari, “Nakharusie ebitili ebia itsahabu biomumarwi kabakhasi benywe nende ebiabasiani nabakhaana benywe munderere.”

³Mana abandu boosi nibabukula tsingaka tsieitsahabu etsiali khubirwi biabwe ne nibayilila Haroni.

⁴Mana Haroni natsibukula natsisalula mana nakaasia eshimoosi shieitsahabu. Mana abandu nibaboola bari, “Abandu ba Isiraeli, uno niye omunyasaye wefwe owakhurusia mushialo shia Misiri.”

⁵Kho Haroni niyombakha eshimalilo shiemisango imbeli weshimoosi shieitsahabu eshio nende okhuboolela abandu ari, “Mukamba nakhube nende lisabo liokhwinamila elia OMWAMI Nyasaye.”

⁶Inyanga yalondakhwo mumabwibwi, barera emiruko chisambwe shinga omusango omusambe nabo abandi nibarera echindi mbu chilibwe shinga omusango khwokhwikhoya. Ne abandu bandi bekhala hasi okhulia nokhunywa, ne nabo abandi nibachaaka okhushina nokhwilasia nibaheya.

⁷OMWAMI Nyasaye naboolela Musa ari, “Kalukha bwangu hasi weshikulu abandu ba wemilila nobarusia Misiri bachachile okhwonoona khandi banzikanile.

⁸Bamalile okhurula khunjila ya ndabalaka okhulondangakhwo. Bakaasiye eshifwanani shieshimoosi shisaaluulwe okhurula khutsahabu mana bashinamiile nibashikholela emisango nibaboola bari, ‘Uno niye omunyasaye wefwe owakhurusia Misiri.’

⁹Emanyile mbu abandu bano mabamakosi amoomu.

¹⁰Lekha butswa ebasishie shichila esinyishe khulwa amakhuwa ka bakholile ne ndalakaasia lihanga lindi likhongo okhurulila mubandu bolwibulolwo.”

¹¹Nebutswa Musa yalilila OMWAMI Nyasaye Nyasayewe namusaaya ari, “OMWAMI Nyasaye mbushiina notiilwa noburuma obukhongo burio khubandubo bawarusiye Misiri nobakholele ebikhole biamakana khandi ebiobunyali?

¹²Nishiina eshichila niwenya mbu Abamisiri beyitsiale nibaboola bari warusia abandubo Misiri okhubayila mubikulu okhutsia okhubamululila elala mushitsiimi. Wihotselesie omwoyo shiolaba noburuma tawe. Kalukhasia tsinganakanitsio, ne shiolamulula abandubo tawe.

¹³Yililisiakhwo ebitsubo bia wetsubila abasumbabo Aburahamu, Isaka nende Yakobo. ‘Wabetsubila ori olinjiyia olwibulo lwabwe lube olunji shinga tsing'ining'ini tsiomwikulu khandi walaka okhubahelesia eshialo shiosi eshiawabalaka mbu shibe eshiabandu bolwibulo lwabwe emiyika chiosi.’ ”

¹⁴Kho OMWAMI Nyasaye nakalukhasia tsinganakanitsie nalarerera abandube obumululi shinga olwa yali nachoomile okhukhola tawe.

¹⁵Kho Musa nashiukhana nakholomokha okhurula khushikulu nachinjile amachina kabili kali nikahandikwekhwo amalako khutsimbeka tsiosi tsibili etsia buli lichina.

¹⁶Nyasaye mwene niye owali nakaasiye amachina ako ne nakahandikakhwo amalako nomukhonokwe kwene.

¹⁷Olwa Yoshwa yahulila abandu nibakholanga oluyoka, naboolela Musa ari, “Embulilanga olukhu lwelihe mukambi wabandu bali nibali.”

¹⁸Musa namukalusia ari, “Olukhu olwo shilulikhwo lwabandu bahulile lihe noho abahulilwe tawe. Okhwenokhwo nokhwimba okhwokhwikhoya.”

¹⁹Olwa Musa yoola hasi weshikulu ahambi nande ikambi yabandu bali nibalimwo, nalola abandu nibashinanga nibabotokhana eshifwanani shieshimoosi, yasinyikha muno. Yasukuna amachina kabili kali nikahandiikwekhwo amalako mana amachina ako nikatikha.

²⁰Kho nabukula eshifwanani shieshimoosi shia bali nibakasiye nashisalula nomulilo, nashisia nishikwa obusie obunyushe mana natsokasie mumaatsi. Mana nanywesia abandu ba Isiraeli boosi.

²¹Khandi nareeba Haroni ari “Abandu bano bakhakhukholele shiina eshichilile nobafuchilila okhukhola obwonooni obukhngo buno?”

²²Naye Haroni namukalusia ari, “Shiolasinyishila tawe shichila omanyile eshinani shiabandu bano bali ninashio khulwa okhukhola obwonooni.

²³Bamboolele bari, ‘Khukaasile eshifwanani shieshimoosi shikhwimilile injila shichila shikhumanyile eshikholeshe khu Musa wakhurusiye Misiri ta.’

²⁴Kho emalile nibaboolela mbu bandeerere tsingaka tsieitsahabu tsiabwe. Olwa banderere, ebisaluule mumulilo nengasiamwo eshifwanani shieshimoosi!”

²⁵Musa namanyilisia mbu abandu abo befwolile nibefimbia emirwe mubasuku babwe.

²⁶Kho yeema mushilibwa shieikambi naboola ari, “Omundu yesi yesi ouli elubeka olwa OMWAMI Nyasaye asite ebuleka luno.” Kho abandu beinzu ya Lawi boosi nibebunjikha aha yali.

²⁷Mana khandi nababoolela ari, “OMWAMI Nyasaye wa Isiraeli alachilisia mbu, buli mundu yemanule olukangalwe khushikhukunyu mana musalaane mukambi okhurula khushilibwa shino okhuula khushindi shilia nimwira abasiani benywe, abetsa benywe nende abamenyanwa benywe.”

²⁸Kho Abalawi nibahulila lilako lia Musa elo mana nibeera abandu ahambi ebikhumila bitaru.

²⁹Kho Musa naboolela Abalawi abo ari, “Inbyanga yino, mwiyemeshe okhuba shinga abesaaliisi bemilimo echia OMWAMI Nyasaye khulwa okhwira abaana benywe, abasiani benywe, kho OMWAMI Nyasaye amuhelesiye tsikhabi.”

³⁰Inyanga yalondakhwo Musa yaboolela abandu ba Isiraeli ari, mwakholile eshionoono eshibi eshikhongo muno. Nebutswa ndalakalukha khandi ewa OMWAMI Nyasaye. Ahundi Nyasaye abamubeela obwonooni bwenywe buno.

³¹Kho Musa natikulukha khushikulu ewa OMWAMI Nyasaye yali namuboolela ari, “Abandu bano bakholile eshionoono eshibi muno. Bekasiliye omunyasaye okhurula khutsahabu mana nibamwinamila.

³²Chama baleshele obwonooni bwabwe. Nebutswa noba nolabaleshela obwonooni bwabwe tawe, orusie eliira lianje mushitabu shia wahandikamwo ameera kabandubo.”

³³OMWAMI Nyasaye namukalusia ari, “Owonoonile yenyene niye owa ndarusia eliiralie mushitabu shianje.

³⁴Bulaano, tsia mana wimilile abandu banje okhutsia habundu ha ndakhuboolelakhwo halia. Omumalaika wanje alakhwimilila injila, nebutswa inyanga yindi enzia okhubahelesia eshinyasio khulwa eshionoono shiabakholile shino.”

³⁵Kho OMWAMI Nyasaye yabarumila olumbe shichila bachila Haroni nakaasia eshifwanani shieshimoosi shieitsahabu.