Read wanga OKHURULA 35 Bible Online

OKHURULA 35 - wanga bible

OKHURULA 35

¹Musa yalanga aboluyia lwa Isiraeli boosi, ne nababoolela ari, “Kano niko aka OMWAMI Nyasaye yalachilisia mbu mukhole.

²Mukholenje emilimo tsinyanga tsisasaba. Nebutswa inyanga yomusaafu, neinyanga indakatifu eyahulilwa OMWAMI Nyasaye. Omundu yesi yesi oukhola omulimo kwosi kwosi khunyanga eyo okhuula yerwe.

³Shimulabwanekhwo omulilo mutsinzu tsienywe khunyanga ya Isabato tawe.”

⁴Musa naboolela abandu ba Isiraeli abali nibakhung'anile halala ari, “Kano niko aka OMWAMI Nyasaye alachilisiye mbu,

⁵omundu yesi yesi owomwoyokwe kwihulila okhuhaanila eshihaanwa, areere itsahabu, ifetsa, noho omukasa,

⁶tsingubo tsieikitani, obwoya bwobukondo bwa buluu, obweisambarao nende obwakhanyu, nende ingubo eyikaasibwe okhurula khubwoya bweimbusi.

⁷Liselo lielikondi eliabakhwa iranji inzakhanyu. Liseelo lieimbusi linyushe, tsimbao tsiomupeli,

⁸amafura keitaha, amalesi akokhukaasia amafura kokhutsushilila nende obubane bweshing'ari eshilayi.

⁹Amachina akobukusi nende amachina kandi akokhurebwa khufodi, nende ingubo yokhushilifu shiomwisaaliisi mukhulundu.”

¹⁰“Abandu abasitsa boosi abali mwinywe bakhoyile okhwihaana bakaasie buli shindu eshia OMWAMI Nyasaye alalaka.

¹¹Liheema, eshifuunikho shialio ebitiili, ebitiisi, tsisheti, tsisiilo, nende bichibi bialio.

¹²Lisanduku liamalako, tsinyanzo tsialio, eshifuunikho shialio nende ingubo ishinga yokhushinga habundu hatakatifu.

¹³Imeesa nende tsinyanzo tsiayo nende ebindu biayo biosi nende emikaate chiokhuhaanila OMWAMI Nyasaye.

¹⁴Eshichibi shieitaha nende tsindambi tsiayo, tsitaha nende amafura katsio,

¹⁵eshimalilo shiemisango shiokhusambilakhwo obubane nende tsinyanzo tsiashio, amafura kokhutsushilila, obubane bweshing'ari eshilayi nende ingubo ishinga yomumuliango kwokhwinjila mwiheema elia OMWAMI Nyasaye.

¹⁶Eshimalilo shiemisango shiokhusambilakhwo emisango emisambe, nende eshitalatalilo shiomukasa shiashio nishiliimaasiibwekhwo, tsinyanzo tsiashio, nende ebindu biashio biosi. Eshikaye shiashio shiokhusaaba, halala nend eshichi shiashio.

¹⁷Tsingubo tsishinga tsiomuliango kwomulwanyi, tsisiilo tsiatsio, ebichibi biatsio, nende ingubo ishinga yomumuliango kwokhwinjila mulwanyi lweliheema.

¹⁸Ebibambo bieliheema nende ebiolukaka lwokhubotokhana liheema halala nende emikoye chiabio,

¹⁹nende tsingubo tsindayi tsiabesaaliisi bakhoyile okhwufwala olwa baba nibeetsa okhukhalabana emilimo habundu hanje hatakatifu. Tsingubo etsio netsia Haroni nende abaanabe.”

²⁰Abandu bali nibakhung'anile bamala nibasalaana okhurula ewa Musa yali nibenyokha.

²¹Mana buli mundu owehulila okhuhaana eshindu yareerera OMWAMI Nyasaye eshihaanwa khulwa okhukaasia liheema liokhubaho okhwa OMWAMI Nyasaye. Mana nibareera buli shindu eshiali nishienyilwe khulwa okhwikhoonyelwa mukhwinamila Nyasaye okhunaba nende khulwa tsingubo tsiobwisaaliisi.

²²Abandu boosi abehulila okhuhaanila OMWAMI Nyasaye eshihaanwa, abasaatsa halala nende abakhasi, bareera bikwasi, ebitaati, tsinyolo tsiomwikosi nende buli shindu eshiakaasibwa okhurula khutsahabu nibahaanila OMWAMI Nyasaye.

²³Omundu yesi owalikhwo neingubo yeikitani inyushe, obwoya bwobukondo bwa buluu, noho obweisambarao noho obwakhanyu, kata owalikhwo nende ingubo yakaasibwa okhurula khubwoya bweimbusi, liseelo lielikondi eliabakhwakhwo iranji inzakhanyu, noho liseelo linyushe, babireera biosi.

²⁴Buli mundu owalikhwo neifetsa, omukasa yabireera shinga eshihaanwa khu OMWAMI Nyasaye. Kata abali netsimbao tsiomusaala kwomupeli etsiakhanyalile okhwikhoonyelwa batsireera.

²⁵Nabo abakhasi abasitsa bokhunaba tsingubo bareera obuusi bweikitani, nende obuusi obwabaswa okhurula khubwoya bwabuluu, obwakhanyu, obweisambarao, nende bwakhanyu, obwa bali nibabasa.

²⁶Khandi abakhasi abasitsa bokhunaba abo babasa obuusi okhurula khu bwoya bwetsimbusi.

²⁷Abemilisi nabo bareera amachina keishohamu nende amachina kokhurebwa khufodi nende akokhurebwa khungubo yokhushilifu,

²⁸nende amalesi keshing'ari eshilayi, amafura ketsitaha, amafura kokhutsushilila nende amafura khulwobubane bweshing'ari eshilayi.

²⁹Abandu ba Isiraeli boosi abehulila okhuhaana eshindu, bareera ebindu biosi ebia Musa yali nabalachile okhureera.

³⁰Mana Musa naboolela abandu ba Isiraeli ari, “OMWAMI Nyasaye yahuule Bezaleli omusiani wa Uri, omwitsukhulu wa Huri, owomuluyia lwa Yuda.

³¹Nyasaye yara mu Bezaleli Rohowe, khandi yamuhelesia obusitsa, obumanyilisi bwobubaatsi bwebindu biosi.

³²Khandi yamuhelesia obusitsa bwokhuyaba itsahabu, ifetsa nende omukasa.

³³Yamuhelesia obusitsa bwokhubaatsa amachina akokhurebwa khushindu shiosi shiosi, okhubaatsa emisaala, nende okhukhola emilimo chiobusitsa echiahukhaane.

³⁴Khandi OMWAMI Nyasaye yahelesia Bezaleli nende Oholiabu omwana wa Alisamaki owoluyia lwa Dani omwoyo kwokhwechesia abashiabwe bandi obubaatsi bwobusitsa.

³⁵OMWAMI Nyasaye yahelesi abandu babili abo obusitsa bwokhukhola emilimo chiobubaatsi, obulushi, obunabi bwamang'ole ketsingubo tsia isambarao, etsia buluu, tsinzakhanyu nende obunabi bweingubo yindi yoosi yosi.