Read wanga OKHURULA 36 Bible Online

OKHURULA 36 - wanga bible

OKHURULA 36

¹“Bezaleli, Oholiabu nende abakholi bandi, aba Nyasaye ahelesiye obusitsa nende obuchesi bwokhukaasia buli shindu eshienyekha khulwokhukaasia liheema, bakhoyile okhukaasia buli shindu shinga olwa OMWAMI Nyasaye yabalaka.”

²Kho Musa nalanga Bezaleli, Oholiabu nende ababaatsi bandi aba OMWAMI Nyasaye yali nahelesiye obuchesi nende abandi abali nibehuliile okhukhoonya ne nababoolela okhuchaaka okhukhola emilimo.

³Musa yabahelesia ebihaanwa biabandu ba Isiraeli bali nibamuhelesiye biosi khulwa okhumbakha liheema litakatifu.

⁴Buli nyanga mumabwibwi abandu ba Isiraeli batsiililila okhureera ebihaanwa kho abombashi abali nibatsia okhumbakha

⁵nibatsia nibaboolela Musa bari, “Abandu bareerire ebindu biobubaatsi ebishila kata ebia OMWAMI Nyasaye yalaka mbu khureere.”

⁶Mana Musa naruma lilako khubandu boosi abali mukambi naboola ari, “Omundu yesi yesi, abe omusaatsa noho omukhasi shialareerakhwo ebihaanwa ebiokhumbakha liheema litakatifu lia Nyasaye ta, ebireerirwe bihelile.” Mana abandu nibakaywa okhureera ebihaanwa.

⁷Ebindu biali nibireerirwe biali ebinji okhushila kata ebiali nibienyesha khulwa emilimo echio.

⁸Abombashi bali nibamanya okhumbakha obulayi okhushila abombashi bandi bombashila tsingubo ekhumi tsieikitani inyushe, etsiabulu, etsieisambarao, tsinzakhanyu khandi nibakaasia abilonje bietsimbaha.

⁹Oburambi bwa buli ndala khungubo etsio bwali tsimita ekhumi natsibili, nabwo obuchikha bwa buli ndala bwali tsimita tsibili.

¹⁰Bongasia halala tsingubo tsirano khandi nibongasia ebuleka undi tsingubo tsirano.

¹¹Mana nibakaasia ebifulwa biabuluu khungubo yeikitani yamalilikha okhunabwa khutsindi. Khandi nakhola ario khungubo tsiakhabili tsiali nitsinabilwe nitsungasibwa.

¹²Bakaasia ebifulwa amakhumi karano khungubo yambeli, khandi nibakaasia ebifulwa bindi amakhumi karano khungubo yindi eya bali nibanabile niboongasia.

¹³Bamala nibakaasia tsisako tsieitsahabu amakhumi karano tsiokhuliimaasia ebitonye bietsingubo bibili ebio halala nibiikhola ingubo ndala.

¹⁴Banaba halala tsingubo ekhumi nandala etsiobwoya bwetsimbusi khulwokhufuunikha liheema.

¹⁵Oburambi bwa buli ndala bwali tsimita ekhumi natsitaru nende tsimita tsibili obuchikha.

¹⁶Banaba tsingubo tsishinga tsirano ebileka ndala ne tsisasaba ebuleka undi.

¹⁷Bara khubuli ebuleka ebifulwa amakhumi karano.

¹⁸Khandi nibarakhwo tsisako amakhumi karano etsiomukasa etsiokhungasia tsimbeka tisosi tsibili kho mbu tsibe eshifuunikho shilala.

¹⁹Bakaasia khandi eshifuunikho shiomukari okhurula khwiseelo lielikondi, eliabakhwa iranji inzakhanyu khandi nibakaasia eshifuunikho shindi shielwanyi okhurula khwiseelo linyushe lielikondi.

²⁰Bakaasia emikuulo chieliheema, okhurula khumbao tsiomupeli

²¹Buli omukuulo kwali noburambi obuhela tsimita tsibili nabwo obuchikha bwashio bwali obuhela tsisendimita amakhumi kasasaba.

²²Buli omukuulo mulala kwali namasaka kabili akokhuliimaasia emikuulo echio halala.

²³Eluleka wemulambo, bakaasia ebitiisi amakhumi kabili.

²⁴Bakaasilinjia buli eshitiisi ebichibi bibili. Biosi halala biali ebichibi amakhumi kane.

²⁵Bakaasia khulubeka lwemasaba ebitiisi amakhumi kabili

²⁶ne nibakaasia ebichibi amakhumi kane okhurula khufetsa, buli omukuulo mulala kwekhanga khubichibi bibili.

²⁷Nalwo olubeka lwa Mumbo, olwali olwanamukuru bakaasiayo emikuulo chisasaba.

²⁸Bakaasia emikuulo chibibili echiomukona enamukuru weliheema.

²⁹Emikuulo chiomukona chibili echio chiarula hasi ne nichiliimaasibwa okhuula mushisuli shieliheema.

³⁰Khweshio emikuulo echiliho chiali munane nende ebichibi biakaasibwa okhula khuifetsa ekhumi nabisasaba. Buli ebichibi bibili khumukuulo mulala.

³¹Khandi bakaasia tsisheti ekhumi natsirano okhurula khumusaala kwomupeli ebuleka ndala, nibakaasia

³²tsisheti tsirano ebuleka undi, nende tsisheti tsirano namukuru halala nende tsisheti tsirano emulambo weliheema elo.

³³Mana nibakhola olusheti lulala okhubira hakari okhurula khundulo eyi okhuula khundulo eyi.

³⁴Ne nibafuunikha emikuulo echio nende itsahabu khandi nibarakhwo tsingaka etsiakaasiabwa okhurula khu tsahabu, okhuliimaasia tsisheti tsia bali nibafuuniishekhwo nende itsahabu etsio tsiosi.

³⁵Mana nibakaasia ingubo ishinga okhurula khukitani inzeleleshe niyinabilwe halala nobuusi bwa buluu obweisambarao nende obwakhanyu ne nibachirakhwo ebilonje bietsimbaha bibili.

³⁶Bakaasia tsisiilo tsine okhurula khumusaala kwomupeli ne nibatsifuunikha nende itsahabu, ebichibi biatsio biosi biali ebieitsahabu,

³⁷Kho nibakaasia omuliango kweliheema kweingubo ishinga nende ingubo niyinabilwe nobuusi bweikitani, obwa buluu obweisambarao nende obwakhanyu.

³⁸Bakaasilia ebitiisi birano ebio ingubo ishinga nibarakhwo tsingaka tsirano. Bareresia ebisuli biabio neitsahabu, nabio ebichibi biabio birano ebio biali ebiomukasa.