Read wanga OKHURULA 37 Bible Online

OKHURULA 37 - wanga bible

OKHURULA 37

¹Bezaleli yakaasia lisanduku liamalako okhurula khumusaala kwomupeli. Oburambi bwalio bwali tsisendimita eshikhumi shilala nende ekhumi, ne obuchiikha bwali tsisendimita amakhumi kasasaba nende tsisasaba, nabwo oburambi bwosi bwali tsisendimita amakhumi kasasaba nende tsisasaba

²Yalifuunikha nende itsahabu inzeleleshe liosi ikulu nende mukari, mana khululika lwalio khandi narakhwo itsahabu.

³Mana nakaasia tsingara tsine etsieitsahabu etsiokhuchinjilanga lisanduku elo ne nara buli ndala khubuli likulu. Nara tsingara etsio khumakulu kelisanduku elo koosi kane. Mana tsibili nitsiba elubeka undi natsio tsibili nitsiba elubeka undi.

⁴Mana nakaasia tsinyanzo tsine etsiokhulichinga, yatsikaasia okhurula khumusaala okwomupeli, ne natsifuunikha nende itsahabu,

⁵mana niyenjisia buli lulala mutsingara etsiali mumbafu welisanduku khulwa okhulichinga.

⁶Nakaasia eshifuunikho shieitsahabu inzeleleshe, eshioburambi obuhela tsisendimita eshikhumi shilala nende ekhumi nende obuchikha tsisendimita amakhumi kasasaba nende tsisasaba.

⁷Nakaasia ebilonje bietsimbaha okhurula khutsahabu eyiraanyilwe,

⁸eshilonje shilala nishireebwa khundulo nashio eshindi khundulo undi.

⁹Ebilonje bietsimbaha ebio biabambula tsimbaha khwisanduku liosi nibihengaane.

¹⁰Bezaleli yakhoma imeesa okhurula khumbao tsiomusaala kwomupeli, eyihela oburambi tsisendimita amakhumi munane namunane. Obuchika amakhumi kane nende tsine. Nabwo oburambi bwali amakhumi kasasaba nende tsisasaba.

¹¹Yachifuunikha nende itsahabu ne nafuunikha olulika lwayo nende itsahabu.

¹²Yachikaasilia olulika lwobubambalifu obuhela tsisendimita amakhumi musaafu nende tsirano okhuchibotokhana.

¹³Nachikaasilie tsingara tsine buli ndala khukona webilenje biali.

¹⁴Tsingara tsiokhusakakwo tsinyanzo tsiokhuchinga tsiarebwa ahambi nende olulika lweimesa.

¹⁵Yakaasia tsinyanzo okhurula khumusaala kwomupeli khulwokhuchinga imeesa ne nabakhakhwo itsahabu.

¹⁶Yakaasia ebikaye ebitiiti ebieitsahabu inzeleleshe biokhumeesa khandi nakaasia ebikaye ebikhongo, ebikombe, tsinjaki nende ebikaye ebiokhwikhoonyelwa khulwa okhunywa idivai.

¹⁷Bezaleli yakaasia eshichibi shieitaha okhurula khutsahabu inzeleleshe eyiraanyilwe. Nashitakho washio nende omukhono kwashio biakaasibwa okhurula khutshabu eyiraanyilwe. Ebimuli biashio biokhushing'ona halala nende ebikombe biashio nende emikhono chiashio biali eshindu shilala biosi.

¹⁸Eshichibi eshio shiali nende amasaka kasasaba, kataru katsomokhwa khulubeka lulala, ne kataru khulubeka lundi.

¹⁹Buli lisaka khumasaka kasasaba ako liali nende ebimuli bitaru ebifwana shinga olusi lumuliishe.

²⁰Omukhono kweshichibi shieitaha kwalikhwo ebikombe bine ebifwana shinga ebimuli ebimuliishe shinga eshimuli shia alumondi.

²¹Khwali nende eshimuli shilala khubuli hasi wamasaka kasasaba ako.

²²Ebimuli bieitaha ebio biali nibiakaasibwa okhurula khutsahabu inzeleleshe eyeraanywa.

²³Yakaasia tsitaha musaafu, khandi nakaasia amahana katsio nende ebikaye biatsio musaafu okhurula khutsaabu inzeleleshe.

²⁴Yekhoonyela tsikilo amakhumi kataru natsirano tsieitsahabu inzeleleshe okhukaasia ebichibi musaafu nende ebindu bietsitaha biosi halala.

²⁵Bezaleli khandi yabaatsa eshimalilo shiemisango shiokhusambilangakhwo obubane. Obuchikha bwashio bwali tsisendimita amakhumi kane natsirano khandi obubambalifu bwosi burio. Oburambi nabwo bwali tsisendimita amakhumi shienda. Shialikhwo tsinzika tsine buli khukona.

²⁶Yashibakhakhwo itsahabu inzeleleshe mana narakhwo olulika lweitsahabu.

²⁷Yakaasia tsingara tsine tsiokhuchinga ne natsira mumbafu tsibili tsieshimalilo shiemisango eshio, khulwa okhutiila tsinyanzo tsieshimalilo shiemisango eshio.

²⁸Yakaasia tsinyanzo tsiemusaala kwomupeli mana nabakhakhwo itsahabu.

²⁹Khandi Bezaleli yakaasia amafura amatakatifu kokhutsushilila khandi nakaasia obubane bweshiuya eshilayi nishitsokaasibwemwo eshing'ari.