Read wanga OKHURULA 39 Bible Online

OKHURULA 39 - wanga bible

OKHURULA 39

¹Banaba tsingubo tsindayi, etsia iranji ya buluu, eyeisambarao, nende okhurula khubwoya obwakhanyu, khulwa abesaaliisi okhwifwala nibakhalabana habundu atakatifu. Banabila Haroni tsingubo tsiobwisaaliisi okhulondana nende amalako aka OMWAMI Nyasaye yalaka Musa.

²Banaba ifodi okhurula khubuusi bweikitani inyushe, obwabuluu, obwakhanyu nende obuusi obweiranji yeitsahabu.

³Beraanya orubaati orunyelele rweifetsa, nibarwarasiamwo shinga obuusi.

⁴Bakaasia ebitonye bibili ebiokhumabeka, nibabiliimaasia halala. Bongasilia ebitonye ebio bibili khutsimbeka tsibili tsiosi kho mbu, binyale okhweleela.

⁵Khandi omushipi okwali nikwabaswa obulayi, nikwakaasibwa okhurula khubuusi tsana obwo, kwali nikwongaasibwa khufodi eyo kho mbu, kwikhole eshindu shilala nende ifodi tsana, shinga olwa OMWAMI Nyasaye yali niyalachilisia Musa.

⁶Bakaasia amachina kobukusi akali nikahandikwakhwo ameera kabaana ba Yakobo, akali nikakanyilwa khundulo wamabaati akakaasibwa okhurula khutsahabu.

⁷Bara amachina ako khumikoye chiokhumabeka echieifodi khulwa okhusinjilila tsimbia ekhumi natsibili tsia Isiraeli.

⁸Khandi abanabi abo banaba ingubo yokhushilifu shinga olwa bali nibanabile ifodi. Ifoti eyo yali eyeingubo yeikitani inyushe, yeiranji yeitsahabu, eya buluu, yeisambarao nende inzakhanyu.

⁹Ilolooti eyo yali niyihelana tsimbeka tsiosi. Yali eyihela tsisendimita amakhumi kabili khutsimbeka tsiosi, ne khandi yali niyifumbilwemwo akhandi khabili.

¹⁰Bara khungubo eyo emikhoosi chine, echiamachina kobukusi. Okwambeli kwalikhwo amachina ka otemu, aka ipiteta nende aka ibaraketsi.

¹¹Omukhoosi kwakhabili kwalikhwo imopekinende isapiri yamachina kobukusi.

¹²Omukhoosi kwakhataru nakwo kwalimwo ileshemu, amachina ketsilulu nende ikhalama.

¹³Ne nakwo omukhoosi kwakhane kwalimwo itarashishi ishohamu nende yashepe. Amachina ako munyanzo katsio kali nikafumbilwa mutsahabu.

¹⁴Amachina ako kasaarwakhwo ameera ekhumi nakabili, buli lichina eliira liomusiani wa Yakobo, khulwa tsimbia ekhumi natsibili tsia Isiraeli.

¹⁵Ne khungubo yene yokhushilifu eyo barakhwo tsinyolo etsiasiirwa obulayi neitsahabu inzeleleshe.

¹⁶Bakaasia tsingaka tsibili etsieitsahabu mana nibatsira hekulu khutsikona tsieingubo eyo.

¹⁷Baboha tsinyolo tsibili etsio khungaka tsibili etsio ne nibatsiboha khungubo yokhushilifu, mukari mwayo niyilondokhana okhuula khukona ya hekulu.

¹⁸Mana nibaboha tsindulo tsindi tsibili tsiolunyolo lweitsahabu olwo, imbeli khumikoye chibili echieifodi eyo.

¹⁹Nibakaasia tsingaka tsibili okhurula khutsahabu nibatsiliimaasia khutsikona tsiemwalo weifodi yokhushilifu eyo, khundulo mukari hambi nende ifodi eyo.

²⁰Nibakaasia tsingaka tsindi tsieitsahabu tsibili nitsiliimaasibwa hamwalo wobunjilo bwayo hamukulu khumushipi kweifodi.

²¹Baboha ilolooti yokhushilifu eyo khungaka tsieifodi shinga olwa Musa yali nabalachilisiye, ne nibaboha omukoye kweshitambaya shieifodi khungubo yokhushilifu nende ingubo ya buluu kho niyelela ahambi khumushipi nikulanyala okhutendeya tawe.

²²Omukoye kwaburiranga hasi weifodi kwali nikwakaasibwa khubuusi bwa buluu obwo.

²³Likosi liali nilianabwa obulayi elilanyala okhurandukha tawe.

²⁴Bamala nibabotokhasia lichemo liosi nende amakomamanga kobuusi bwa buluu, obweisambarao nende obwakhanyu nende obweikitani inyushe eyasiirwa.

²⁵Khandi bakaasia ebikhuli bieitsahabu inzeleleshe, nibara ebikhuli hakari wamakomamanga okhubotokhasia khundulo weikanzu, hakari wamakomamanga ako.

²⁶Babohanga eshikhuli nende likomamanga, eshikhuli nende likomamanga khundulo weikanzu okhuchibotakhasia yosi, shinga OMWAMI Nyasaye yali nalachile.

²⁷Bamala bakaasilie Haroni nende abasianibe, amakoti akanabwa okhurula khungubo yeikitani inyushe,

²⁸khandi nibabanabila ebilemba okhurula khungubo yeikitani inyushe, tsikofia okhurula khungubo yeikitani inyushe nende ebinyasa bieikitani inyushe eyalukhwa obulayi,

²⁹nende emishipi eschibasilwe obulayi echieikitani, echieiranji ya buluu, eyeisambarao, nende okhurula khubuusi obwakhanyu shinga olwa OMWAMI Nyasaye yali nalachile Musa.

³⁰Bakaasia eshimuli eshipapale okhurula khutsahabu inzeleleshe, nebahandikakhwo bari, “Eshiahule khu OMWAMI Nyasaye.”

³¹Mana nibashiboha khubweni hambeli weshilemba shinga olwa OMWAMI Nyasaye yali niyalaka Musa.

³²Mana emilimo chiokhukaasia liheema Litakatifu chiamala nichihelelesibwa shinga olwa OMWAMI Nyasaye yali niyalaka Musa mbu, chikholwe.

³³Kho nibareerera Musa liheema elo halala nende abindu bialio biosi, tsisako, ebitiili, ebitiisi, tsisheti, tsisiilo nende ebichibi biatsio biosi.

³⁴Khandi nibamureerera eshifuunikho shieliseelo linyushilwe liamakondi, elibashilwekhwo irangi inzakhanyu halala nende eshifuunikho shiamaseelo kandi nende ingubo ishinga.

³⁵Bareera kata lisanduku liamalako halala nende amachina kabili ako nende ebitiisi bialio ebio.

³⁶Bareera khandi imeesa nende ebindu ebiakaasilibwakhwo biosi halala nende omukaate okwahaanwa khulwokwokhukholela Nyasaye omusango.

³⁷Bareera eshichibi shieitsahabu inzeleleshe, tsitaha tsiayo, nende ebimanulwa biayo biosi halala nende amafura kokhwashia mutaha.

³⁸Bareera eshimalilo shiemisango shieitsahabu, amafura kokhutsushilila nende obubani bweshing'ari eshilayi. Bareera ingubo ishinga yomuliango kweliheema.

³⁹Bareera eshimalilo shiemisango shiemukasa, ebitiisi biashio ebimanulwa biashio biosi nende eshikaye shiokhusaabilamwo nende eshichibi shiashio.

⁴⁰Bareera tsingubo tsishinga, tsisiilo tsiatsio, nende ingubo ishinga yeshiliibwa shielwanyi nende emikoye chiabio nende ebibambo biabio halala nende buli shindu shiokhwikhoonyelwa okhukhola emilimo mwiheema liokhubaho okhwa OMWAMI Nyasaye.

⁴¹Khandi bareera ebifwalo ebilayi, ebiali nibianabilwa abesaaliisi olwa baba nibakhola emilimo habundu hatakatifu aha OMWAMI Nyasaye. Ebifwalo ebitakatifu ebio nebia Haroni nende abaanabe.

⁴²Abandu ba Isiraeli bakola biosi ebia OMWAMI Nyasaye yali nalachile Musa okhukhola.

⁴³Musa yahenga ne nanyoola mbu, bali nibakholile buli shindu shinga olwa OMWAMI Nyasaye yali nalachile, ne nabilaamila tsikhabi.