Read wanga OKHURULA 4 Bible Online

OKHURULA 4 - wanga bible

OKHURULA 4

¹Mana Musa nakalusia OMWAMI Nyasaye ari, “Ne Abaisiraeli nibaba nibaloba okhusuubila noho okhurecheresia akebaboolela, ndalakhola shiina nibaba nibamboolela mbu, iwe shiwandolesheele ta?”

²OMWAMI Nyasaye namureeba Musa ari, “Nishiina eshiotiilile mumukhonokwo?” Naye Musa nakalusia ari, “Endiilile indabushi.”

³OMWAMI Nyasaye namuboolela ari, “Chifuubekhwo hasi.” Mana Musa nachifuuba hasi, nayo niyikwa inzokha, naye Musa niyelukha narula khunzokha eyo.

⁴Nebutswa, Nyasaye yaboolela Musa ari, “Nyiila omukhonokwo mana ochibukule notiilile omushila kwayo.” Kho Musa nanyiila omukhonokwe nachibukula nayo inzokha niyikalukhana niyikwa indabushi khandi mumukhonokwe.

⁵OMWAMI Nyasaye naboola ari, “Okhole ori, kho mbu Abaisiraeli basuubile mbu, OMWAMI Nyasaye, Nyasaye wabakuuka babwe, Nyasaye wa Aburahamu, owa Isaka, nende owa Yakobo akhulolesheele iwe.”

⁶Khandi, OMWAMI Nyasaye yaboolela Musa ari, “Injisia omukhonokwo mukanzuyo otiile khushilifushio.” Naye Musa niyenjisia omukhonokwe mukanzuye natiila khushilifushie. Ne olwa yakurusiakhwo, kwali nobuchele obulafu tswe, shinga amachina keifula.

⁷Khandi Nyasaye namuboolela ari, “Kalusia omukhonokwo khushilifu.” Ne Musa nakukalusiakhwo. Ne olwa yakurusia, lola, kwali nikuukaluushe habwene.

⁸Khandi Nyasaye naboola ari, “Nibaba nibalahulila nende okhusuubila mushilolelo shiambeli eshio ta, banyala okhusuubila mushiakhabili.

⁹Nibalasuubila mushilolelo shiambeli kata eshiakhabili ta, obukule amaatsi okhurula mumwalo kwa Naili, osundule khwiloba eliumu. Nako amaatsi akolaba norusiye mumwalo nosundula khwiloba eliumu, kalekhola amatsaayi.”

¹⁰Nebutswa Musa naboolela Nyasaye ari, “Iwe OMWAMI Nyasaye, shiolaruma ta, shichila isie endi oweshilimi okhurula mubwana bwanje okhuula khubise bino.”

¹¹Naye Nyasaye namureeba ari, “Niwiina owalonga omunwa kwomundu? Niwiina oumukholanga okhulekha okhuboola, noho okhulekha okhulomaloma, noho okhulekha okhuhulil, noho okhulola, noho okhubofula? Shiendi isie OMWAMI Nyasaye owalonga abo boosi?

¹²Khulweshio iwe tsia! Nasi ndalakhukhoonya okhuboola khandi ndalakhwechesia akolaboola.”

¹³Naye Musa nakalusia ari, “Iwe OMWAMI Nyasaye, ekhusaaya mbu, orumekhwo omundu undi.”

¹⁴Mana Nyasaye nasinyishila Musa ne namureeba ari, “Haroni omusiani wenywe Omulawi shialiyo? Emanyile mbu, anyala okhuboola obulayi. Khandi yetsa okhukhwakaanila ne olwa alakhulola, alasaangaala mumwoyokwe.

¹⁵Ne osungane ninaye nomuboolela kalaboola. Nasi ndalamukhoonya okhuboola, khandi ndalamwechesia inywe eshiamulakhola.

¹⁶Alaba omubooliwo khandi alaboola nende Abaisiraeli mushilenjeshio, nawe olaba khuye shinga Nyasaye, olamuboolelanga eshia akhoyile okhuboola.

¹⁷Bukula indabushi yino ochende ninayo mumukhonokwo, shichila niyo yolakholelanga akamakana.”

¹⁸Mana Musa nakalukha khu Yetsiro nyakhufialanyene ne namuboolela ari, “Ekhusaaya mbu, nochama engalushe Misiri endole abekho banje nibaba nibashili mwoyo.” Naye Yetsiro namuboolela ari, “Tsia nomulembe.”

¹⁹Ne olwa Musa yali nashili Midiani, Nyasaye yamuboolela ari, “Kalukha Misiri, shichila abandu boosi abakhaabanga okhukhwira bafwa.”

²⁰Kho Musa nabukula omukhasiwe nende abaana nabekhasia khusishili ne narula nachaaka oluchendo okhukalukha Misiri. Ne yali natiilile indabushi mumukhonokwe, eya Nyasaye yali namubooleele mbu abukule.

²¹Mana OMWAMI Nyasaye naboolela Musa khandi ari, “Nokalukha Misiri, okhuula okhole akamakana koosi aka ndakhuhelesiye obunyali okhukhola imbeli womuruchi. Nebutswa ndalatinyia omwoyokwe ne shialalekhuula abandu okhutsia tawe.

²²Khandi okhuula oboolele omuruchi wa Misiri mbu, OMWAMI Nyasaye aboola ari, ‘Isiraeli niye omwana wanje wambeli.

²³Kho ekhuboolela mbu, lekha omwana wanje atsie yanzinamile. Nikaba mbu shiomufuchilila tawe kho ndaleera omwanawo omusiani omwikulanda.’ ”

²⁴Olwa Musa yali nashikonile habundu ahabacheni okhuhulushila, nali khuluchendo lwokhukalukha Misiri, OMWAMI Nyasaye yamuloleshela ne nateema okhumwira.

²⁵Mana omukhasiwe Zipora nabukula lichina limemu, nasheba lifunga liomusianiwe ne nalibisia khubilenje bia Musa khulwa eshiima shieshishebo naboola ari, “Toto iwe oli omusatsa wanje wobwatoto.”

²⁶Kho Nyasaye nalekha Musa nabaho mwoyo.

²⁷OMWAMI Nyasaye naboolela Haroni ari, “Tsia mushitsiimi waakaanile Musa.” Kho Haroni natsia mushitsiimi okhwakaanila Musa khushikulu eshitakatifu. Ne olwa babukaana, Haroni yafumbeelela Musa.

²⁸Naye Musa naboolela Haroni koosi aka OMWAMI Nyasaye yali namubooleele olwa yamulaka okhukalukha Misiri, khandi namuboolela khukamakana koosi aka OMWAMI Nyasaye yali namulachile okhukhola.

²⁹Mana Musa nende Haroni nibatsia nibakhung'asia halala abakhulundu ba Isiraeli boosi.

³⁰Kho Haroni nababoolela amakhuwa koosi aka Nyasaye yali nabooleele Musa. Musa naye nakhola imbeli wabandu akamakana aka Nyasaye yali namulachile okhukhola.

³¹Nabo Abaisiraeli nibasuubila amakhuwa kabali nibabooleelwe. Ne olwa bahulila mbu, OMWAMI Nyasaye yali nabahendelanga khandi nalolanga amanyakhano kabwe, benamia emirwe chiabwe hasi ne nibenamila Nyasaye.