Read wanga OKHURULA 40 Bible Online

OKHURULA 40 - wanga bible

OKHURULA 40

¹OMWAMI Nyasaye yaboolela Musa ari,

²“Khunyanga yambeli yomwesi kwambeli, osinjisie liheema.

³Mana ore mwiheema omwo lisanduku liamalako mana olishinje nende ingubo ishinga.

⁴Olosiekhwo imeesa norakhwo ebindu biayo. Oreere ebichibi mana orekhwo tsitaha tsiabio.

⁵Orecheshe eshimalilo shiemisango shieitsahabu shiokhusambilakhwo obubane imbeli welisanduku liamalako, mana olishinje nende ingubo ishinga hamuliango weliheema Litakatifu.

⁶Orenjeshe liheema imbeli weshimalilo shiemisango khulwa okhusambilakhwo ebihaanwa.

⁷Orenjeshe eshikaye shiokhusaaba hakari weliheema nende eshimalilo shiemisango mana otsushemwo amaatsi.

⁸Osire liheema khulwa okhusimikha tsisilo mana ore ingubo ishinga hamuliango walio.

⁹“Mana waahule liheema elo khulwa okhulitsushililakhwo amafura amatakatifu. Ne liheema elo lilaba litakatifu.

¹⁰Khandi, waahule eshimalilo shiemisango shiokhusambilakhwo emisango emisambe nende ebimanulwa biashio biosi khulwa okhutsushililakhwo amafura. Kho eshimalilo shiemisango eshio shilaba eshitakatifu.

¹¹Khandi waahule eshikaye shiokhusaabilakhwo munjila ndala yene eyo.

¹²“Mana oreere Haroni nende abaanabe hamuliango weliheema Litakatifu mana obasinje khulwa okhubasiiya.

¹³Niwakhamala okhubasinga, ofwale Haroni ingubo yobwisaaliisi, mana omutsushililekhwo amafura nomwahula mana yakhalabanile isie shinga omwisaaliisi.

¹⁴Oreere abaanabe mana obafwale tsingubo.

¹⁵Khandi olunyuma obatsushililekhwo amafura nobaahula shinga lwoba niwaahuule sabwe. Okhutsushilila okhwa olaba notsushiliilekhwo amafura okhwo, khulabakhola okhuba abesaaliisi, khandi abandu bolwibulo lwabwe balaba abesaaliisi khulwemiyika chiosi.”

¹⁶Kho Musa nakhola buli shindu shinga olwa OMWAMI Nyasaye yali namulachile okhukhola.

¹⁷Kho mumwesi kwambeli kwomumuyika kwakhabili, okwa abandu ba Isiraeli barulilakhwo Misiri, nukuli lulala, Liheema Litakatifu liasinjisibwa.

¹⁸Musa yasimikha omuse kweliheema Litakatifu nende okhusimikha ebitiisi, ne narakhwo tsisheti mana nasimikha tsisiilo tsieliheema elo.

¹⁹Nafwimba ingubo yeliheema khumisaala chia yali nakaasiye. Khandi nafwimbakhwo ingubo yokhufuunikhakhwo shinga OMWAMI Nyasaye yali nalachile.

²⁰Mana nabukula amachina kabili, akali nikahandikwakhwo amalako, nakarenjekha mwisanduku liamalako. Yamala nara tsinyanzo khwisanduku ne nafuunikhakhwo eshifuunikho.

²¹Kho narenjekha lisanduku liamalako elo mwiheema nende okhulifwimba nende ingubo ishinga. Yakhola ario okhushinga lisanduku shinga olwa OMWAMI Nyasaye yali nalachile.

²²Yarenjekha imeesa mwiheema elubeka wemasaba, elwanyi weingubo ishinga,

²³Kho narenjekha khumeesa eyo emikaate chiokhuhaanila Nyasaye eshihanwa shinga olwa OMWAMI Nyasaye yali nalachile.

²⁴Khandi Musa nareera eshichibi shietsitaha mwiheema elubeka wemulambo, nishihengana nende imeesa,

²⁵ne habwene yaho nahafiliaho tsitaha shinga olwa OMWAMI Nyasaye yali nalachile.

²⁶Musa narenjekha eshimalilo shiemisango shieitsahabu mwiheema imbeli weingubo ishinga eyo,

²⁷Kho nasamba obubane bweshing'ari eshilayi shinga olwa OMWAMI Nyasaye yali nalachile.

²⁸Kho niyelesia ingubo ishinga eyo hamuliango weliheema.

²⁹Yara hamuliango weliheema litakatifu yaho imbeli weingubo ishinga eshimalilo shiemisango shiokhusambilakhwo emisango. Ne khubwenokhwo nikhwo okhwa yasambila emisango emisambe nende echieimele shinga olwa OMWAMI Nyasaye yali nalachile.

³⁰Mana nara olukaraya lwokhusaabilakhwo hakari weliheema nende eshimalilo shiemisango ne natsukhakhwo amaatsi.

³¹Kho Musa, Haroni nende abaana ba Haroni nibeyosiamwo amakhono nende ebilenje biabwe.

³²Buli lwosi olwa benjilanga mwiheema noho okhutsia hashimalilo shiemisango, beyosinjia ebilenje nende amakhono shinga olwa OMWAMI Nyasaye yali niyalaka.

³³Musa yamala nasira liheema nende tsisiilo, olwanyi lwosi okhubotokhana liheema nende eshimalilo shiemisango ne nafuunikha ingubo ishinga niyifuunikha eshiliibwa shielwanyi. Kho naba niyakhamala emilimo chiosi.

³⁴Mana lileesi liamala nilifuunikha liheema liokhubaho okhwa OMWAMI Nyasaye, nabwo obulafu bwokhumanyia mbu OMWAMI Nyasaye aliho nibwitsula mwiheema elo.

³⁵Obulafu obwo bwachila Musa nakhaywa okhwinjila mwiheema elo.

³⁶Mana olwa lileesi elo liarusibungwaho, abandu ba Isiraeli batsiilililanga nende oluchendo lwokhutsia Kanani.

³⁷Nebutswa lileesi niliatong'angaho, abandu ba Isiraeli shibatsiilililanga noluchendo lwabwe tawe.

³⁸Ebise biosi ebia bamala mushitsiimi nibachendachendanga, balolelanga okhubaho okhwa OMWAMI Nyasaye mwileesi elo nilili hekulu weliheema. Ne nishili eshilo balolanga omulilo nikututuchila hekulu weliheema okhuula shinga olwa boola Kanani.