Read wanga OKHURULA 5 Bible Online

OKHURULA 5 - wanga bible

OKHURULA 5

¹Olunyuma lwamakhuwa ako, Musa nende Haroni batsia khumuruchi wa Misiri nibamuboolela bari, “OMWAMI Nyasaye wa Isiraeli aboola ari, ‘Lekha abandu banje batsie kho mbu bakholele lisabo mushitsiimi khulwa okhumbelesia oluyali.’ ”

²Nebutswa omuruchi wa Misiri yabareeba ari, “OMWAMI Nyasaye naye niye wiina owa ekhoyile okhuhulila likhuwalie kho mbu, endekhuule Abaisiraeli batsie? Shiemanyile OMWAMI Nyasaye ta, ne khandi shindalekha Abaisiraeli mbu batsie bamukholele lisabo mushitsiimi tawe.”

³Mana Musa nende Haroni nibamukalusia bari, “Nyasaye wa Abaheburania yayelolesiye omwene kwifwe. Khukhusaaya mbu, okhuleshe khutsiekhwo oluchendo lwetsinyanga tsitaru mushitsiimi, mana khukholele OMWAMI Nyasaye wefwe omusango. Nikhulakhola khurio ta, yetsukhana yakhwira khulwobulwale nende lihe.”

⁴Nebutswa omuruchi wa Misiri yabareeba ari, “Mbushiina nimwenya okhurusia abandu khumilimo chiabwe? Kalusie abasumba bano khumilimo chiabwe.”

⁵Khandi nababoolela ari, “Lole, abandu beshialo shienywe nabanji, ne bulaano khandi mwenya mbu, bahulushe!”

⁶Inyanga yeneyo omuruchi wa Misiri yalachilisia abasinjilili bemilimo ba Abaisiraeli nende abakhongo babwe ari,

⁷“Okhurula bulaano, shimulahesiekhwo Abaisiraeli obunyasi bwokhukaasilia amatifwari shinga olwa mwakholilenje ta. Habula muleshe abeene batsie bakhaabe obunyasi.

⁸Nebutswa muleshe bakaasie amatifwari akahela butswa nende aka bakaasiyenje. Shimulakatutuyiekhwo ta, okhuba babula eshiabakhola, nishio eshichilanga nibeyiniakana nibaboola bari, ‘Leshe khutsie khukholele Nyasaye wefwe omusango.’

⁹Muleshe abandu abo bahebwe emilimo emisiro muno bakhole kho mbu, bachikhole namaani mana baleshe okhuboola amakhuwa kobubeeyi ako.”

¹⁰Kho abasinjilili nende abakhongo babandu ba Isiraeli nibarula ewa omuruchi wa Misiri yali, nibatsia khu Abaisiraeli nibababoolela bari, “Omuruchi wa Misiri aboolile ari, ‘Shikhulamuhelesia obunyasi bwokhukaasia amatifwari tawe.

¹¹Abeene mutsie mukhaabe obunyasi bwokhukaasia amatifwari ewa munyala okhubunyoola. Emilimo chienywe shichilatutuyibwakhwo kata nahatutu tawe.’ ”

¹²Kho abandu nibasalaana buli habundu mushialo shia Misiri, nibatobelesinjia obunyasi bwokhukaasia amatifwari.

¹³Khandi abasinjilili Abamisiri babanichilisia okhukaasia amatifwari akahela nende aka bakaasinjia nibaheelwe obunyasi, nibababoolela bari, “Male emilimo chieinyanga shinga olwa mwakholilenje obunyasi nibuliho.”

¹⁴Khandi abakhongo ba Abaisiraeli, abali nibarebwaho okhuhenga abaashiabwe nibakholila emilimo, babakhupa nibabareeba bari, “Mbushiina nimulakaasia amatifwari okhuula khushichelo shia mwakasiyenje?”

¹⁵Kho abakhongo ba Abaisiraeli nibatsia nibeyiniakanila omuruchi wa Misiri, nibamureeba bari “Mbushiina nosandia abakholibo orio?

¹⁶Shikhuhebungwa obunyasi bwokhukaasia amatifwari ta, nebutswa khuboolelungwa butswa mbu, ‘Kaasie amatifwari!’ Khandi khupungwa ne shikhuhebwa obunyasi bwokhukaasia amatifwari ta. Nebutswa eshikha shishili eshiefwe ta, shili khubandubo.”

¹⁷Habula omuruchi wa Misiri yababoolela ari, “Mwikhalanga butswa, ne shimukholanga emilimo ta, nishio eshichila nimuboola muri, ‘Khuleshe khutsie khumalile OMWAMI Nyasaye omusango.’

¹⁸Bulaano tsie ne obunyasi bwokhukaasia amatifwari bwa mwahebungwa shibuliho ta, habula okhuula muusie eshichelo shiamatifwari shia mukasinjia buli nyanga.”

¹⁹Abakhongo abo bamanya mbu, bali mumatinyu olwa baboolelwa mbu, shibalahebwa obunyasi bwokhukaasia amatifwari ta, ne baboolelungwa mbu okhuula bakaasie eshichelo shiamatifwari eshihela nende eshia bakaasinjia.

²⁰Olwa bali nibashirulanga butswa womuruchi wa Misiri, babukaana nende Musa nende Haroni nibabalindile.

²¹Mana abandu ba Isiraeli nibaboolela Musa nende Haroni bari, “OMWAMI Nyasaye akhoya yamulola khandi yamukhalachila eshiina, okhuba mukhukholile okhuba abafunachi bamalako imbeli womuruchi wa Misiri, halala nende abakhongobe. Khandi mubahelesiye eshifune eshichila bakhwire ifwe.”

²²Mana Musa khandi nashiukhana nahenga ewa Nyasaye yali ne niyeyiniakana ari, “Iwe OMWAMI Nyasaye, mbushiina nokholela abandu bano akobumayanu? Ne mbushiina niuruma isie?

²³Okhuba okhurula olwa ndeetsa khumuruchi wa Misiri okhuboola muliiralio, omuruchi akholelanga abandubo akobumayanu, nawe oshili okhukholakhwo eshindu shiosi okhubanunula kata nahatutu tawe.”