Read wanga OKHURULA 6 Bible Online

OKHURULA 6 - wanga bible

OKHURULA 6

¹Nebutswa OMWAMI Nyasaye yaboolela Musa Ari, “Bulaano olalola eshia ndalakholela omuruchi oyo. Ndalamunichilisia okhulekhuula abandu banje okhutsia, khandi ndalamunichilisia okhubalonda okhurula mushialoshie.”

²Khandi Nyasaye naboolela Musa ari, “Nisie OMWAMI Nyasaye.

³Isie ndaloleshela Aburahamu, Isaka nende Yakobo shinga Nyasaye Owobunyali Bwosi. Nebutswa shindabebuulila eliira lianje litakatifu mbu, nisie OMWAMI Nyasaye tawe.

⁴Khandi ndakhola indakano yanje ninabo mbu, ndilibahelesia eshialo shia Kanani, eshia bali nibamenyamwo shinga abacheni.

⁵Okhumeetakhwo, ndahuliile okhwiyiniakana khwabandu ba Isiraeli, aba Abamisiri bara mubunyakhani, ne ndetsuliile indakano yanje.

⁶Khulweshio, boolela abandu ba Isiraeli ori, ‘Nisie OMWAMI Nyasaye, khandi ndalamurusia inywe mukhusandibwa khwa Abamisiri, khandi ndalamuhonia inywe okhurula mumbohe mwabamura. Ndalanyiila omukhono kwanje kwamaani okhubahonokosia nebareerera Abamisiri eshinyasio shiokhuriisia ne ndalamununula inywe.

⁷Ne ndalamukhola okhuba abandu banje beene, nasi ndaba Nyasaye wenywe. Nolwa mulamanya mbu, nisie OMWAMI Nyasaye wenywe, oumuyiniye okhurula mubusandibwi bwa Abamisiri.

⁸Khandi ndalamuyila mushialo shiandetsuba okhuhelesia Aburahamu, Isaka nende Yakobo. Ndalamuhelesia inywe shibe eshienywe. Nisie OMWAMI Nyasaye.’ ”

⁹Musa yamala aboolele abandu ba Isiraeli ario, nebutswa shibarecheresia aka yababoolela nikasuubila ta, shichila bali nibafwile emioyo chiabwe khulwa okhusandibwa khwa mumbohe.

¹⁰Kho OMWAMI Nyasaye naboolela Musa khandi ari,

¹¹“Tsia, oboolele omuruchi wa Misiri aleshe abandu ba Isiraeli barule mushialoshie.”

¹²Nebutswa Musa yakalusia OMWAMI Nyasaye ari, “Lola, abandu ba Isiraeli shibarecheresiye akebabooleele ta, kho omuruchi naye niyarecheresie arie? Isie endi omundu oulamanyile okhuboola obulayi tawe.”

¹³Nebutswa OMWAMI Nyasaye yalachilisia Musa nende Haroni naboola ari, “Muboolele abandu ba Isiraeli nende omuruchi wa Misiri mbu, nisie oulachilisiye inywe okhwimilila Abaisiraeli okhurula mushialo shia Misiri.”

¹⁴Omwana wa Yakobo wambeli yali Rubeni, ne yali nabaana abasiani bane. Ameera kabwe kali mbu, Hanoki, Palu, Hezironi nende Karami. Abo nibo abolwibulo lwa Rubeni.

¹⁵Nabo abaana ba Simioni bali, Yemweli, Yamini, Ohadi, Yakini, Zohari nende Shauli omusiani womukhasi Omukanani. Abaana abo nabo nibo aboluyia lwa Simioni.

¹⁶Abasiani ba Lawi nabo okhulondana shinga olwa bebulungwa bali, Gerishoni, Kohatsi, naye Merari namalilikha. Ne Lawi mwene yamenya khushialo emiyika eshikhumila shilala namakhumi kataru namusaafu.

¹⁷Nabo abasiani ba Gerishoni bali, Libuni nende Shimeyi. Abetsinzibulo tsiabwe barumbulwa ameera kabwe.

¹⁸Kohatsi yali nabasiani bane. Abeene mbabano mbu, Amurani, Izihari, Heburoni nende Uzieli. Kohatsi mwene yamenya emiyika eshikhumila shilala namakhumi kataru nachitaru.

¹⁹Abasiani ba Merari bali Mahili nende Mushi. Abo boosi nibo abali abolwibulo lwa Abalawi okhulondana nende tsinzibulo tsiabwe shinga olwa tsiali.

²⁰Amuramu yateeshia Yochebedi, owali nyakhusenjenyene. Mana Yochebedi niyebulila Amuramu abaana abasiani babili, nibo Musa nende Haroni. Amuramu mwene yamenya emiyika eshikhumila shilala nende amakhumi kataru namusaafu.

²¹Nabo abasiani ba Izihari bali Kora, Nefegi nende Zichiri.

²²Abasiani ba Uzieli bali Mishaeli, Elizafani nende Sitsiri.

²³Haroni yateeshia Elisheba omukhaana wabwe Nahashoni, ne Elisheba yali omukhaana wa Aminadabu. Kho Elisheba niyebulila Haroni Nababu, Eliazari nende Itsamari.

²⁴Nabo abasiani ba Kora bali Asiri, Elikana nende Abiyasafu. Abo nibo abali abolwibulo lwa Abakora.

²⁵Eliazari omusiani wa Haroni, yateeshia omukhaana wa Putieli, mana omukhaana oyo niyebulila Eliazari omwana mbu Finehasi. Abeene abo nibo abali abemilisi betsimbia tsiaboluyia lwa Abalawi.

²⁶Ni Haroni nende Musa tsana aba Nyasaye yaruma naboola ari, “Mutsie murusie abandu ba Isiraeli mushialo shia Misiri.”

²⁷Musa nende Haroni tsana abo nibo ababoolela omuruchi wa Misiri amakhuwa kokhurusia Abaisiraeli Misiri okhutsia Kanani.

²⁸Olwa OMWAMI Nyasaye yaboola nende Musa mushialo shia Misiri,

²⁹yamuboolela ari, “Isie nisie OMWAMI Nyasaye. Boolela omuruchi wa Misiri amakhuwa koosi akenzia okhukhuboolela.”

³⁰Nebutswa Musa yamukalusia naboola ari, “OMWAMI Nyasaye wanje, isie shindamanya okhuboola obulayi ta, mana omuruchi wa Misiri niyambulile?”