Read wanga OKHURULA 7 Bible Online

OKHURULA 7 - wanga bible

OKHURULA 7

¹Mana OMWAMI Nyasaye naboolela Musa ari, “Isie ndalakhukhola obe shinga Nyasaye khumuruchi wa Misiri, naye omusiani wenywe Haroni alaba omulakusiwo.

²Olaboola koosi aka ndalakhulaka. Naye omusiani wenywe Haroni alaboolela omuruchi okhulekhuula abandu ba Isiraeli okhurula mushialoshie.

³Nebutswa ndalakhola omwoyo kwomuruchi okhuba omutinyu, ne kata olwa ndalameeta okhukhola ebilolelo nende akamakana kanje mushialo shia Misiri,

⁴Omuruchi shialakhuhulila iwe ta. Mana ndalareera eshinyasio khubandu ba Misiri nende okhurusia emikanda chiabandu banje, abaana ba Isiraeli okhurula Misiri. Ndalabarusiayo khulwa okhuhelesia Abamisiri eshinyasio eshikhongo.

⁵Ne olwa ndalanyiila omukhono kwanje nekhupa Abamisiri, mana erusie Abaisiraeli mushialo shia Abamisiri, nolwa balamanya mbu, nisie OMWAMI Nyasaye.”

⁶Mana Musa nende Haroni nibakhola shinga olwa OMWAMI Nyasaye yabalaka okhukhola.

⁷Olwa Musa nende Haroni baboola nende omuruchi, Musa yali nemiyika amakhumi munane naye Haroni yali nemiyika amakhumi munane nende chitaru.

⁸Mana OMWAMI Nyasaye naboolela Musa nende Haroni ari,

⁹“Olwa omuruchi wa Misiri alamuboolela ari, ‘Manyiekhwo khulwa okhukhola akamakana toto nimuba nimurumilwe nende OMWAMI Nyasaye,’ iwe Musa oboolele Haroni ori, ‘Bukula indabushiyo mana ochifuube imbeli womuruchi ikalukhane ikwe inzokha.’ ”

¹⁰Kho Musa nende Haroni nibatsia ewomuruchi wa Misiri, ne nibakhola shinga olwa OMWAMI Nyasaye yali nabalachilisiye mbu bakhole. Haroni nafuuba indabushiye hasi imbeli womuruchi halala nabakhongobe. Mana indabushi eyo niyikwa inzokha.

¹¹Naye omuruchi wa Misiri yesi nalanga abalakusibe bobuchesi nende abafumube. Nabo boosi nibekhoonyela obuchesi bwabwe bwamaasiliisi nibakhola amakhuwa malala ako.

¹²Mana boosi nibafuuba tsindabushi tsiabwe hasi, natsio nitsikwa tsinzokha. Nebutswa indabushi ya Haroni, eyali niyikwile okuyokha eyo yamila tsindabushi tsia Abamisiri, etsiali nitsikwile tsinzokha etsio tsiosi.

¹³Kata kario omwoyo kwomuruchi wa Misiri kwatong'a nikushitinyile butswa, nalahulila shinga olwa OMWAMI Nyasaye yali naboolile tawe. Amaatsi kekhola amatsayi

¹⁴Mana OMWAMI Nyasaye naboolela Musa ari, “Omwoyo kwomuruchi wa Misiri kushitinyile, shichila alobile okhulekhuula abandu ba Isiraeli mbu barule batsie.

¹⁵Khulweshio tsia khumuruchi wa Misiri mumabwibwi, olwa alaba nakholomokhanga mumwalo kwa Naili. Omulindile khumwalo okwo, ne obukule indabushi yabeele niyikwile okuyokha eyo ochitiile mumakhonoko.

¹⁶Mana omuboolele ori, ‘OMWAMI Nyasaye, Nyasaye wa Abaisiraeli yarumile khwiwe mbu, ekhuboolele mbu, oleshe abandube batsie mushitsiimi bamwinamile, nebutswa okhuula bulano, iwe oshili okhuhulila.

¹⁷Khulweshio OMWAMI Nyasaye aboola mbu, ndalakhupa amaatsi komwalo kwa Naili nende indabushi eyili mumukhono kwanje yino, mana amaatsi ako kalakwa amatsayi, nolwa olamanya mbu, ye niye OMWAMI Nyasaye.

¹⁸Ne tsinyeni etsili mumwalo kwa Naili tsilafwa, nakwo omwalo okwo kulahunya obubi muno mbu kata Abamisiri shibalanywakhwo amaatsi kakwo tawe.’ ”

¹⁹Mana OMWAMI Nyasaye naboolela Musa khandi ari, “Boolela Haroni abukule indabushiye mana anyiile omukhonokwe khwikulu khwamaatsi akali mushialo shia Misiri shiosi, okhuchaachila khumialo, khumitaro, khumayabo nende khumaatsi akalikhwo habundu hosi hosi mushialo shia Misiri kata nende akali mutsisiongo etsiakaasibwa okhurula khutsimbao nende okhurula khwitoyi, ne amaatsi ako koosi kalakwa amatsayi.”

²⁰Kho Musa nende Haroni nibakhola shinga olwa OMWAMI Nyasaye yali nabalachilisiye. Haroni yanyiila omukhonokwe nachinguula indabushiye, nakhupa khumwalo kwa Naili omuruchi wa Misiri halala nabakhongobe nibalolanga. Nako amaatsi ako nikakalukhana nikakwa amatsayi.

²¹Ne tsinyeni etsiali mumwalo okwo nitsifwa tsiosi. Okhumeetakhwo, omwalo kwa Naili kwachaaka okhuhunya obubi okhuula olwa Abamisiri bakhaywa okhunywa amaatsi komumwalo okwo. Khandi amatsayi nikaba buli habundu mushialo shia Misiri.

²²Nebutswa abafumu ba Misiri boosi khandi bakhola butswa shinga olwa Haroni yali nakholile, nibekhoonyela amachesi kabwe kamaasiliisi. Khulweshio omwoyo kwomuruchi wa Misiri kwatsiililila okhuba omutinyu, ne nalahulakhwo aka Musa nende Haroni bamuboolela tawe.

²³Habula omuruchi wa Misiri oyo yashiukhana nakalukha munzuwe ne nalayililisiakhwo khumakhuwa ako mumwoyokwe tawe.

²⁴Mana Abamisiri boosi nibayaba amayabo khumwalo kwa Naili kwosi kho mbu banyoole amaatsi kokhunywa, shichila shibanyalilwa okhunywa amaatsi komumwalo kwa Naili okwo tawe.

²⁵Omwalo kwa Naili kwatsiililila okhuba namaatsi kamatsayi khulwa tsinyanga musaafu.