Read wanga OKHURULA 8 Bible Online

OKHURULA 8 - wanga bible

OKHURULA 8

¹Mana OMWAMI Nyasaye naboolela Musa ari, “Tsia khumuruchi wa Misiri mana omuboolele mbu, OMWAMI Nyasaye aboola ari, ‘Lekha abandu banje batsie kho mbu, banzinamile.

²Nebutswa noloba okhubalekhuula, ndalareera amashele amanji mushialo shiosi.

³Amashele kalaselasela nikarumachila okhurula mumwalo kwa Naili niketsa munzu tsienywe. Kalenjila mubikoro bienywe biokhwiyalisiamwo okhuula khubitali bienywe. Amashele ako kalenjila okhuula kata munzu tsiabakholi benywe nende abandu benywe boosi. Akandi kalatsia mumayika ka muteshelangamwo. Ne akandi nikenjila mubindu bia munyoobelangamwo obusie.

⁴Akandi kalarumachila nikasinjila khwiwe nende khubandubo boosi nende khubakhongobo boosi.’ ”

⁵Mana OMWAMI Nyasaye naboolela Musa ari, “Boolela Haroni anyiile omukhono kulimwo indabushiye ikulu wemialo, emitaro nende amayabo, okhole amashele karulemwo ketse khwiloba lieshialo shia Misiri.”

⁶Kho Haroni nachinguula khwikulu wamaatsi ka Misiri indabushi ya Musa yamuhelesia. Mana amashele nikarula mumaatsi niketsula mushialo shia Misiri shiosi.

⁷Nebutswa abafumu bekhoonyela obuchesi bwabwe nibakhola shinga olwa Haroni yali nakholile mana amashele niketsula khushialo shia Misiri shiosi.

⁸Mana omuruchi wa Misiri nalanga Musa nende Haroni nababoolela ari, “Nimuchama saayekhwo OMWAMI Nyasaye wenywe yayiniekhwo amashele kano khandi akayinie khubandu banje. Ne ndalalekhuula abandubo batsie bamalile OMWAMI Nyasaye omusango.”

⁹Naye Musa namureeba ari, “Omwene wahule ebise bia wenya mbu, ekhusaayile iwe nende abandubo mana OMWAMI Nyasaye wanje arusieho amashele kali khushialo shiosi katoonye butswa akali mumwalo kwa Naili konyene.”

¹⁰Omuruchi wa Misiri namukalusia ari, “Nochama okhusaayile mukamba.” Musa namukalusia ari, “Olwa nekhusaayile mukamba nilwo olwa nomanye mbu, Nyasaye undi shialikhwoho shinga OMWAMI Nyasaye OMWAMI Nyasaye wefwe tawe.

¹¹Amashele koosi kalarula munzuyo kata nende munzu tsiabakholibo nende etsiabandubo boosi. Kalatong'a butswa akali mumwalo kwa Naili konyene.”

¹²Mana Musa nende Haroni nibenyokha nibarula munzu yomuruchi wa Misiri. Ne Musa nasaaya khu OMWAMI Nyasaye mbu, arusieho amashele ako, katonye butswa akali mumwalo kwa Naili konyene shinga olwa yali nafuchilisaniye nende omuruchi wa Misiri.

¹³OMWAMI Nyasaye nakhola shinga olwa Musa yamusaaya, mana amashele nikafwa koosi okhuchaachila khukali mutsinzu, nende munzu tsiabayaalilangamwo ebiina kata nende mumikunda.

¹⁴Olwa kali nikafwile, Abamisiri bakabunjikha ebituuli ne nikachaaka okhuhunya obubolo mushialo shiosi.

¹⁵Nebutswa lwomuruchi wa Misiri yalola mbu, amashele kafwile, khandi yamala alobe okhulekhuula abandu ba Isiraeli okhwinyokha shinga olwa OMWAMI Nyasaye yali naboolile.

¹⁶Mana OMWAMI Nyasaye naboolela Musa ari, “Boolela Haroni achinguule indabushiye mana achikhupe khulufu lweliloba, ne olufu olwo lulekhola ebiroboto[6] mushialo shia Misiri shiosi.”

¹⁷Kho Musa nende Haroni nibakhola shinga olwa baboolelwa. Haroni nachinguula omukhono kwalimwo indabushi ya Musa nakhupa khulufu. Mana olufu olwo lwosi nilwikhola ebiroboto mushialo shia Misiri.

¹⁸Olwa abafumu bomuruchi wa Misiri boosi bateema okhwikhoonyela obuchesi bwabwe bwomumasiliisi mbu, olufu lwikhole ebiroboto, bakhaywa. Mana ebiroboto ebiali nibirulile khulufu nibiama khubandu nende khumiruko chiosi.

¹⁹Kho abafumu bomuruchi wa Misiri nibamuboolela bari, “Kano kakholilwe nobunyali bwa Nyasaye.” Nebutswa omwoyo kwomuruchi wa Misiri kwatsiililila butswa okhutinya, ne shinga OMWAMI Nyasaye yali naboolile, omuruchi shiyahulila amakhuwa kabwe tawe.

²⁰Mana MWAMI naboolela Musa ari, “Mukamba obuushe mumabwibwi osinjile imbeli womuruchi wa Misiri natsitsanga khumwalo kwa Naili mana omuboolele mbu OMWAMI Nyasaye aboola ari, ‘Olekhuule abandu banje kho mbu banzinamile.

²¹Ne nolalekha abandu banje batsia ta, ndalakhureerera tsiisi tsinyinji shinga olucheka lweifula tsiyeele khwiwe, khubemilisibo boosi halala nende khubandubo boosi. Tsiisi etsio tsiletsula munzu tsienywe tsiosi nende khwiloba liosi liamusenangakhwo.

²²Habula shindalareera tsiisi etsio mushialo shia Gosheni, ewa abandu banje bamenya tawe. Kho likhuwa lino limukhole okhumanya mbu, nisie OMWAMI Nyasaye khandi nisie oukholanga amakhuwa ako mushialo.

²³Ndalaraho obwahukhani hakari wabandu banje nende abandubo. Olwa eshialo bushia mukamba, namunyoole eshilolelo shiamakana shino nishiliho.’ ”

²⁴Kho OMWAMI Nyasaye naruma olucheka lwa tsiisi olukhongo, nitsiitsula munzu eyomuruchi nende mutsinzu tsiabakhongobe. Eshialo shia Misiri shiosi nishisasibwa netsiisi etsio.

²⁵Mana omuruchi wa Misiri nalanga Musa nende Haroni nababoolela ari, “Tsie mumalile Nyasaye wenywe omusango, nebutswa mukhole nimuli mushialo shia Misiri shino.”

²⁶Musa nakalusia ari, “Tawe, shinobulayi okhukhola khurio ta, shichila emisango chiakhulakholela OMWAMI Nyasaye wefwe chilasinyisia Abamisiri. Abamisiri nibalola nikhukholanga emisango chieshisinyo khubo echio, shibalakhulasa amachina noho?

²⁷Okhuula khuchende oluchendo lwetsinyanga tsitaru mushitsiimi okhumumalila OMWAMI Nyasaye, Nyasaye wefwe omusango shinga olwa alakhulaka ifwe mbu khukhole.”

²⁸Kho omuruchi wa Misiri nakalusia naboola ari, “Ndalalekha mutsie mushitsiimi mumalile Nyasaye wenywe omusango. Ne shimulatsia ehale muno tawe. Habula nimushili okhutsia, musaaye Nyasaye arusieho tsiisi tsino.”

²⁹Mana Musa namukalusia ari, “Olwa erula butswa hano, ndalasaaya Nyasaye ne mukamba alarusiaho tsiisi munzuwo, nende munzu tsibakhongobo, halala nende mutsinzu tsia Abamisiri boosi, habula shiolakhubeeyakhwo khandi niwikalila abandu okhutsia okhukholela OMWAMI Nyasaye omusango tawe.”

³⁰Kho olwa Musa yarula munzu yomuruchi, yasaaya OMWAMI Nyasaye,

³¹naye OMWAMI Nyasaye nakhola shinga olwa Musa yali namureebile, narusia tsiisi munzu yomuruchi wa Misiri nende munzu tsiabakhongo halala nende mutsiabandu ba Misiri tsiosi. Shiyatong'akhomwo kata isi ndala yonyene tawe.

³²Nebutswa olwa tsiisi etsio tsiali nitsirulile, omwoyo kwomuruchi wa Misiri kwatsiililila okhuba omutinyu ne naloba okhulekhuula abandu ba Isiraeli okhutsia.