Read wanga OKHURULA 9 Bible Online

OKHURULA 9 - wanga bible

OKHURULA 9

¹Mana OMWAMI Nyasaye naboolela Musa ari, “Tsia oboolele omuruchi wa Misiri mbu, isie OMWAMI Nyasaye, Nyasaye wa Abaheburania emboola endi, ‘Lekhuula abandu banje batsie banzinamile.

²Noba noloba okhubalekhuula, ne notsiililila okhubatinyakhwo,

³ndakhuhelesia eshinyasio khulwa okhukhureerera obulwale obubi khumirukochio, khutsifarasitsio, khutsisishili, khutsingamia, khutsing'ombe nende khutsimbusi nende khumakondiko.

⁴Habula ndalaraho olwakho hakari wemiruko echia Abaisiraeli nende echia Abamisiri, kho mbu, emiruko chia Abaisiraeli chileshe okhufwa.

⁵Isie OMWAMI Nyasaye, nisie omwene oukaasiye mbu, amakhuwa ako kekholeshe mukamba.’ ”

⁶Olwa bwashia inyanga yalondakhwo, OMWAMI Nyasaye yakhola shinga olwa yali naboolile. Mana emiruko chia Abamisiri nichifwa chiosi. Nebutswa emiruko echia Abaisiraeli shichiafwakhwo kata mulala tawe.

⁷Omuruchi nareebelesia okhumanya nikaba mbu, emiruko chia Abaisiraeli chiali nichifwilekhwo. Ne nanyoola mbu, kata mulala kwonyene shikwali nikufwilekhwo tawe. Ne kata olwa yalola ako koosi omwoyokwe kwatsiililila okhuba omutinyu, nalafuchilila okhulekhuula abandu ba Isiraeli okhutsia tawe.

⁸Mana OMWAMI Nyasaye naboolela Musa nende Haroni ari, “Tsie mubukule likoshe mumikhono chienywe okhurula mushibero, mana Musa alisukune ikulu nasinjiile imbeli womuruchi wa Misiri.

⁹Likoshe elo lilatuumuukha shinga olufu olunyushe, ne lilasalaana mushialo shia Misiri shiosi. Ne hosi hosi aha likoshe elo lilaba, nende eshialikwakhwo shiosi shiosi, khubandu noho khumiruko, noho khushindu shiosi shiosi, shilanyalukhanga amabure amakhongo.”

¹⁰Kho Musa nende Haroni nibabukula likoshe okhurula mushibero, ne nibatsia nibasinjila imbeli womuruchi wa Misiri. Musa nafuuba likoshe elo ikulu ne nilituumuulukha niliikhola amabure okhunyalukha khubandu ba Misiri boosi halala nende khumiruko chiabwe.

¹¹Abafumu ba Misiri bakhaywa okhwitsa imbeli wa Musa shichila amabure kali nikabakhayile shinga olwa kali nikakhayile Abamisiri bandi.

¹²Nebutswa OMWAMI Nyasaye yakhola omwoyo kwomuruchi wa Misiri okhuba omutinyu shinga olwa yali nabooleele Musa. Khandi omuruchi wa Misiri yakhaya okhuhulila amakhuwa ka Musa nende Haroni.

¹³Mana OMWAMI Nyasaye naboolela Musa ari, “Mukamba mumabwibwi, otsie womuruchi wa Misiri osinjile imbeliwe mana omuboolele mbu, OMWAMI Nyasaye, Nyasaye wa Abaheburania aboola ari, ‘Lekhuula abandu banje kho mbu batsie banzinamile.

¹⁴Shichila leelo luno ndalaruma ebinyasio bianje biosi okhuchaachila khwiwe mwene, okhuula khubemilisibo nende abandubo boosi. Eliene lino lilachila omanye mbu, shialikhwoho Nyasaye undi mushialo shino shinga isie tawe.

¹⁵Emba nindanyiilile omukhono kwanje okhukhurakhwo obulwale iwe halala nende abandubo, khane mwesi muba mwamalile okhufwa okhurula khushialo.

¹⁶Nebutswa eshichilile nindalakhwira iwe halala nende abandubo ta, ndienyile mbu, ekhumanyie shinga lwobunyali bwanje buli, khandi mbu ifuma yanje yisalaane mushialo shiosi.

¹⁷Nawe wichinjimisinjia noloba okhulekhuula abandu banje okhutsia.

¹⁸Ne lola, mukamba, khubise shinga bino, ndalakwisia ifula yamachina ikhongo muno. Ifula yamachina shinga eyo yishili okhukwakhwo mushialo shia Misiri okhurula khukhulongwa khweshialo tawe.

¹⁹Kho bulaano, olachilisie mbu emiruko chiosi echili mushiayo halala nende abandu balimwo nende buli shindu shiosi shiosi eshili elwanyi, bireebwe habundu halayi ahokhwiyikama ifula, shichila olwa amachina ako kalakwa, kaleera emiruko chiosi nende abandu boosi abaleyikaame tawe.’ ”

²⁰Abandi khubakhongo bomuruchi wa Misiri bali noburi olwa bahulila likhuwa elia OMWAMI Nyasaye yali naboolile elo, mana nibareera abasumba babwe nende emiruko chiabwe, nibalachilisia mbu emiruko chiabwe echio, halala nende abaayi babwe abo bachelesibwe okhurula mushiayo, betse beyikame ifula.

²¹Nebutswa abalechelesia aka OMWAMI Nyasaye yali naboolile ako, balekha abasumba babwe nende emiruko chiabwe mushiayo.

²²Mana OMWAMI Nyasaye naboolela Musa ari, “Nyiila omukhonokwo kuhenje mwikulu, ne ifula yamachina ilakwa khushialo shia Misiri shiosi, khubandu, khumiruko chiabwe chiosi, nende khubiraache biomumikunda chiabwe biosi.”

²³Mana Musa nachinguula indabushiye mwikulu ne OMWAMI Nyasaye nakwisia ifula yokhwatulukha nende eyamachina, natsio tsimbenu nitsihenukha khushialo. OMWAMI Nyasaye nakwisia ifula yamachina inyinji khushialo shia Misiri.

²⁴OMWAMI Nyasaye yakwisia ifula yamachina inyinji, khandi yeimbumbuyeka, niyilumililila okhukhola tsimbenu okhurula eyi nende eyi. Yali imbumbuyeka ikhongo muno, eyali niyishili okhukwakhwo mushialo shia Misiri okhurula nishilongwa tawe.

²⁵Amachina ako kakhupa buli shindu shiosi eshiali elwanyi, okhuchaachila khubandu okhuula khumiruko chiali mushiayo, halala nende abandu abaliyo nende emiruko echio. Amachina ako kakhupa nikabungululila hasi emimela chiosi nende okhufuunaka emisaala chiosi echiali nichiaraakwa mumikunda chiabandu ba Misiri chiosi.

²⁶Habula ifula yamachina eyo, shiyakwakhwo mushialo shia Gosheni tawe.

²⁷Mana omuruchi wa Misiri naruma likhuwa mbu Musa nende Haroni balangwe. Ne olwa betsa, omuruchi yababoolela ari, “Inyanga yino, isie ekholile obwonooni. OMWAMI Nyasaye ali habwene, nebutswa isie nende abandu banje shikhuli habwene tawe.

²⁸Saaya OMWAMI Nyasaye, okhuba ifula yamachina yino ni inyinji muno! Emusuubisia mbu, ndalamulekhuula mutsie, shimulatsiililila okhumenya hano khandi tawe.”

²⁹Musa naye namukalusia ari, “Olwa ndalarula mwitookho muno, ndalachinguula amakhono kanje mwikulu nesaaya OMWAMI Nyasaye, ne ifula yino ilakatukha, kho mbu mumanye mbu eshialo neshia OMWAMI Nyasaye.

³⁰Nebutswa emanyile mbu iwe nende abakhongobo, shimumumanyile OMWAMI Nyasaye tawe.”

³¹Ebiraache bieikitani nende bieishayiri biasasibwa khandi nibibungulukha hasi, shichila ishairi yali niyenjile niyulile eyokhucheswa, nayo ikitani yali niyirunguluule.

³²Nebutswa ingano shiyasasikha ta shichila yalabanga olunyuma lweikitani nende ishayiri.

³³Kho Musa narula elwanyi welitookho natsia. Ebweneyo yachinguula emikhonochie nasaaya OMWAMI Nyasaye. Mana ifula yokhwatulukha nende eyamachina eyo niyikatukha.

³⁴Ne olwa Omuruchi wa Misiri yalola mbu, ifula amachina nende eyokhwatulukha eyo ikatuushe, yatsiililila okhwonoona khandi, ye nende abakhongobe nibakhola emioyo chiabwe okhuba emitinyu.

³⁵Mana shinga olwa OMWAMI Nyasaye yali nabooleele Musa, omuruchi shiyafuchilila okhulekhuula Abaisiraeli okhutsia tawe.