Read wanga AYUBU 1 Bible Online

AYUBU 1 - wanga bible

AYUBU 1

¹Yaliho omundu undi owalangwa mbu Ayubu, owali niyamenya mushialo shia Uzi. Yenamilanga Nyasaye khandi yali omwisiikwa muno. Yali omundu omulunjishi khandi yehanyanga okhurula khubwonooni.

²Yali nabaana abasiani musafu nende abakhaana bataru.

³Yali niyaruka amakondi ebikhumila musafu (7,000), tsingamia ebikhumila bitaru (3,000), tsiheyi tsiokhulima eshikhumila shilala (1,000) nende tsisishili tsikhasi ebikhumi birano (500). Khandi yali nabakholi abanji muno. Ayubu yali omuyinda muno okhushilakhwo abandu bandi boosi abebukwe.

⁴Abasianibe baliilanga lisabo munzu ya buli mulala khubo, ne balanganga abakhaana babwe bataru abo okhwitsa okhulia nende okhunywa halala ninabo.

⁵Olwa tsinyanga tsielisabo tsialinji nitsihwele, Ayubu yabukhanga mumabwibwi inyanga yiloondakhwo okhumala emisango emisambe khulwa buli omwanawe khulwa okhubasiiya. Yakholanga ario buli lwosi, shichila yapaaranga mbu, haundi mulala khubo anyala okhuba niyetsukhane niyonoonile mumwoyokwe khulwa okhunyeka Nyasaye.

⁶Inyanga yindi, abamalaika ba Nyasaye beetsa okhwilolesia imbeli wa OMWAMI Nyasaye, ne Setani niyetsa halala ninabo.

⁷OMWAMI Nyasaye nareeba Setani ari, “Orula heena?” Naye Setani namukalusia ari, “Ndakhalambuulanga eshialo, nenjendachendakhwo eyi nende eyi.”

⁸OMWAMI Nyasaye namureeba ari, “Okhuula obe noluutsi omukhalabani wanje Ayubu? Abulaho khushialo omwisiikwa khwisie khandi omulunjishi shinga ye. Yambelesinjia oluyali khandi yehanyanga okhurula khubwonooni.”

⁹Mana Setani nareeba OMWAMI Nyasaye ari, “Opaaranga mbu, Ayubu akhwinamilanga butswa eshikhaya noho?

¹⁰Iwe buli lwosi omulindanga ye nende abeinzuye halala nebindu biosi ebia ali ninabio. Wamuhelesia ikhabi mubuli liakhola khandi wamuhelesia emiandu eminji mushialo.

¹¹Nebutswa bulano noba nomurusiakhwo ebindu ebia ali ninabio biosi, alakhunyeka iwe habulafu.”

¹²Mana OMWAMI Nyasaye naboolela Setani ari, “Lola, biosi ebia ali ninabio bili mubunyalibwo, onyala okhubisasia biosi. Nebutswa olamusalisia Ayubu mwene tawe.” Mana Setani narula imbeli ewa OMWAMI Nyasaye.

¹³Inyanga yindi abaana ba Ayubu abasiani nende abakhaana batsia okhulia nende okhunywa idivai munzu yomusiani wabwe omukhulundu.

¹⁴Olwa bali nibaliitsanga omurume yetsa tsimbilo ewa Ayubu yali, ne namuboolela ari, “Khubeele nikhulimanga netsing'ombe, natsio tsisishili nitsiayanga ahambi ninatsio,

¹⁵mana mubwangu omukanda kwa Abasebea nikwitsa nikukhuseera nikubukula tsisishili etsio tsiosi. Khandi nikwiira abakhalabanibo boosi, nisie sienyene ouhonokooshe okhwitsa okhukhuboolela.”

¹⁶Olwa yali nashiboolanga, omurume undi niyetsa naboola ari, “Omulilo kwelikulu kusambile amakondiko koosi halala nabaayi boosi, nisie sienyene ouhonokooshe okhwitsa okhukhuboolela.”

¹⁷Olwa yali nashiboolanga, omurume undi yetsa naboola ari, “Emikanda chitaru chia Abakalidayo chitsile nichikhuseera nichibukula tsingamia tsiosi khandi nichiira abakhalabanibo boosi, nisie sienyene ouhonokooshe okhwitsa okhukhuboolela.”

¹⁸Olwa yali nashiboolanga, omurume undi yetsa naboola ari, “Abaanabo abasiani nende abakhaana babeele nibaliitsanga nende okhunywa idivai munzu yomusiani wabwe omukhulundu,

¹⁹ne lola, imbumbuyeka yomushitsiimi yihutsile, ne niyikwisia inzu eyo, niyikwila abaanabo, boosi nibafwa, nisie sienyene ouhonokooshe okhwitsa okhukhuboolela.”

²⁰Mana Ayubu nasinjila narandula tsingubotsie mushibeela, nabeka omurwekwe, nakwa hasi mafumama niyenamila OMWAMI Nyasaye.

²¹Naboola ari, “Ndebulwa okhurula munda ya mama wanje eshiechenye khandi ndakharule mushialo eshiechenye. OMWAMI Nyasaye niye owambelesia khandi OMWAMI Nyasaye niye oubukule. Eliiralie litsoomibwe!”

²²Mumakhuwa akekholekha ako koosi, Ayubu shiyayonoonakhwo kata okhutula Nyasaye tawe.