Read wanga AYUBU 10 Bible Online

AYUBU 10 - wanga bible

AYUBU 10

¹“Esinyishile obulamu bwanje, shibulaho eshilanzikalila okhwiyiniakana. Ndalaboola nobutsuni mumwoyo kwanje.

²Ndalaboolela Nyasaye mbu, shiolakhalachila eshiina ta. Mboolela, eshiofunananga ninasi?

³Mana kali habwene iwe okhusandia orio? Okhunjaaya isie owa iwe omwene walonga namakhonoko, ne nochamisibwa nende amakhuwa kabandu abamayanu barechekha?

⁴Oli netsimoni shinga tsiomundu noho? Ne ololanga ebindu shinga lwomundu abilolanga noho?

⁵Ne obulamubwo bukhali obwimbichiti shinga bwomundu noho? Ne emiyika chiobulamubwo chikhali emimbichiti shinga echiomundu noho?

⁶Kho eshichilanga norunilisia obwonooni bwanje, nende okhukhabilisia obumayanu bwanje nishiina?

⁷Iwe OMWAMI Nyasaye omanyile mbu isie embula eshikha, khandi abulaho ounyala okhumbonia okhurula khwiwe.

⁸Amakhonoko niko akangasia nikanonga, ne bulano wenya okhungalukhanakhwo okhuusasia.

⁹Witsulile mbu walonga okhurula khwitoyi ne bulano wenya okhundubula niungalusia khulufu.

¹⁰Shiali niwe owaronyia munda ya mama wanje shinga amaatsi? Mana nokhola ebiungo biomubili kwanje okhuchaaka okhukhula?

¹¹Shiali niwe owalonga omubili kwanje nende amakumba nende emisi, mana nofimba amakumba kanje neinyama nende eshikhoba?

¹²Wambelesia obulamu nende obuheeli oburalilu, nabwo obulindibwo bukholile okhubaho mwoyo.

¹³Nebutswa bulano emanyile mbu mubise ebio biosi, iwe werechekhanga masilisi okhusaalisia.

¹⁴Iwe wahenjelesinjia okhulola nimba nindonoona, kho mbu oleshe okhumbeela.

¹⁵Olwa ekholangakhwo butswa obwonooni, amatinyu kangwilanga! Nebutswa nekhola aka habwene, abulaho ounzitsoominjia ta, Ndihunamilanga nefwimbibwa omurwe, olwa endolanga amanyakhano kanje.

¹⁶Ninyoolakhwo amalayi koosi, iwe uyimanga shinga ouyima italanyi, kata okholanga akamakana khulwa okhuusalisia isie.

¹⁷Buli lwosi undereranga abaloleleli abayia abokhufukula, nalio lirumalio khwisie limeetekhanga buli lwosi. Buli lwosi wirechekhanga okhuseera namakhuwa amayia.

¹⁸Kho Nyasaye eshiachila niukhola isie okhwibulwa nishiina? Bwakhabele obulayi ndafwa omundu yesi nashili okhundolakhwo.

¹⁹Ndakharulile butswa munda nende okhuyabilwa mushilindwa, kho ndakhabele butswa shinga omundu oulamenyakhwo ta.

²⁰Tsinyanga tsiobulamu bwanje nitsindutu, ndekha ndisangasiekhwo eshise shitiiti,

²¹neshili okhutsia ewa ndilanyala okhuchelela ta, mushialo eshimali khandi eshieshibeela,

²²eshialo eshieshilima, eshieshiinikha khandi eshikoyanu, eshialo shiobulafu bwashio buli butswa eshilima.”