Read wanga AYUBU 11 Bible Online

AYUBU 11 - wanga bible

AYUBU 11

¹Mana Zofari owokhurula Naamatsi nakalusia Ayubu naboola ari,

²“Amakhuwa amanji kano koosi shikakalusibwakhwo likalusio ta? Kho okhuboolakwo okhunji khuno khukhukhola okhuba omulunjishi noho?

³Noho opaara mbu amakhuwako akokhutseshelela kano kanyala okhuchila ifwe khuholele tsi? Noho opaara mbu abulaho oulakhufimbia omurwe?

⁴Iwe boolanga mbu aka oboolanga nakatoto, khandi oboolanga mbu oli omweleleshe mumoni tsia Nyasaye.

⁵Ndakhekombile mukano Nyasaye abe ye ouboola, abe ye oukhukalusia.

⁶Yakhakhuboolele amabiso kobuchesi, okhuba tsinjila tsiobuchesi nitsinyinji, omanye lino mbu, Nyasaye akhuhelesinjia eshinyasio eshileemu khubwonoonibwo.

⁷Onyala okhumanyilisia obwiyinikhu bwamakhuwa ka Nyasaye? Kata onyala okhukhaaba wanyoola oburambi bwa oyo Owobunyali Bwosi noho?

⁸Oburambibwe bubira likulu, kho nawe nokhole shiina? Obwiyinikhubwe bubira emakombe, kho nawe nomanye orie?

⁹Obukhongo bwa Nyasaye nobubambukhu okhushila eshialo, khandi nobubambukhu okhushila inyanza.

¹⁰Nyasaye nakhutiila mana akhureere mushina okhuyaasibwa, niwiina ounyala okhumwikalila?

¹¹Nyasaye amanyile abandu ababutswa, khandi alolanga amabi kabwe koosi.

¹²Omundu omuyingwa alanyoola obuchesi, olwa isishili yomubulimo yiliibula omundu.

¹³Noba niwihaana nomwoyokwo kwosi khuye, ne nochinguula amakhonoko khuye nomusaaya,

¹⁴mana oleshe obunayanu obuli mumakhonoko khandi oleshe okhufuchilila obumayanu bwosi okhuba mumaheemako,

¹⁵olachinguula tsimonitsio nolafimbwa omurwe ta, khandi olasinjila noraliile nolalikhwo noburi bwosi ta.

¹⁶Olebilila amanyakhanoko koosi, shinga olwa wibilila omukhula kwa amaatsi akamalile okhubira.

¹⁷Obulamubwo bulaakha okhushila eliuba mushiteere hakari, ne eshilima shiabwo shilaba shinga obulafu obwo mumabwibwi.

¹⁸Olamenya mumulembe noli nobunayi, naye Nyasaye alakhulinda khandi alakhuhelesia obuhulushi.

¹⁹Shiolaba noburi khubasukubo ta, khandi abandu abanji baletsa khwiwe nibenya obukhonyi.

²⁰Nebutswa abamayanu balahenga tsimbeka tsiosi nibahenda omwoyo, ne shibalanyoola habundu hosi ahokhwilushila tawe. Obunaayi bwabwe buli butswa mbu okhuula bafwe.”