Read wanga AYUBU 12 Bible Online

AYUBU 12 - wanga bible

AYUBU 12

¹Mana Ayubu nakalusia naboola ari:

²“Toto, inywe muli abandu bobuchesi, ne olwa mulifwa obuchesi bwenywe bwosi khandi bulifwa.

³Nebutswa siesi khandi endi nobumanyilisi shinga obwenywe, shiendi omutiiti khwinywe tawe. Koosi akemumboolele abandu bakamanya.

⁴Abetsa banje banzeshelelanga, banzeshelelanga kata olwa endi omundu omulunjishi khandi oubula eshikha. Isie ousaayanga Nyasaye, naye nahulila amasaayo kanje.

⁵Omundu ouli mumulembe atseshelelanga oyo ouli mumatinyu, khuye amatinyu kakwilanga abo abesichirala.

⁶Amataala kabanuuli kali nomulembe, abo abanyekanga Nyasaye bamenyanga mumulembe, abo aba omunyasaye wabwe ali butswa amaani kabwe.

⁷Nebutswa oreebe tsisolo natsio tsilakhwechesia, kata oreebe amanyonyi nako kalakhuboolela.

⁸Noho oreebe ebiraache biokhwiloba, nabio bilakhwechesia kata oreebe tsinyeni tsiomunyanza natsio tsilakhuboolela.

⁹Neshileena khubindu ebio biosi, eshilamanyile mbu OMWAMI Nyasaye niye owakhola ako?

¹⁰Obulamu bwa buli eshilonje buli mumakhonoke, kata obulamu bwabandu boosi buli mubunyalibwe.

¹¹Shiluli olulimi olutsanzamanga eshiokhulia, ne shishili eshirwi eshihulilanga amakhuwa?

¹²Obuchesi shibuli nabakofu, nabwo obumanyilisi shibuli khuyabo abali nemiyika eminji?

¹³Nebutswa Nyasaye ali nobuchesi nende obunyali, khandi ali nobwibaali nende obumanyilisi.

¹⁴Nyasaye naba nalikulila abulaho owakhombakha obuyiakha, ne naba niyekalila omundu mukari, abulaho ounyala okhumwikulila.

¹⁵Nyasaye natinya khu ifula, ne eshimiyu shibaho, ne nakwisia ifula, omuyembo kwamatsi kubaho khushialo.

¹⁶Nyasaye nowamaani, khandi owobuchesi. Oukaatinjia nende oukaatibungwa boosi bali mumakhonoke.

¹⁷Akholanga abebaali okhubula obuchesi, mana akhola abayaasi okhuba abayingwa.

¹⁸Arusinjia abaruchi khuburuchi, mana abakhola ababohe.

¹⁹Akholanga abesaaliisi okhubula obunyali, mana akwisia hasi abamaani.

²⁰Aholelesinjia abo aba abandu besiikanga, nanuula abakofu obuchesi.

²¹Afimbinjia omurwe abo abobunyali, niyakamia obunyali bwabaruchi.

²²Afimbulanga amakhuwa akebisa mushiilima, nareera obulafu mushiilima eshimali ti.

²³Akaliyinjia amahanga, mana khandi akamulula. Abambuulanga amahanga mana khandi akarusiaho.

²⁴Akholanga abemilisi babandu okhuba abayingwa, mana abakhola okhutimatima habundu ahabulaho injila.

²⁵Abakholanga okhuhabasia mushiilima eshibulamwo obulafu, nibahutumana shinga abamelile idivai.