Read wanga AYUBU 13 Bible Online

AYUBU 13 - wanga bible

AYUBU 13

¹“Lola, ndamala akhulola ako koosi, khandi ndamala okhukahulila mana ndakamanyilisia.

²Aka mumanyile siesi khandi ekamanyile, shibulaho eshiamushilila.

³Nebutswa isie enzenya akhuboola nende oyo Owobunyali Bwosi, ndikomba okhuyingana nende Nyasaye mwene.

⁴Inywe mufunikhanga amakhuwa akamulamanyile ta nobubeeyi, muli shinga abasilishi abalanyala okhuhonia omundu yesi ta.

⁵Nimwakhaholelile tsi, omundu yakhapaarire mbu muli nobuchesi.

⁶Kho recheresie okhuyililisia khwanje, murecheresie olwa nditerera.

⁷Mupaaranga mbu mukhoonyanga Nyasaye khulwa okhuboola obubeeyi noho? Mupaaranga mbu obubatsa bwenywe nobweinganga khu Nyasaye noho?

⁸Mutereranga Nyasaye noho? Mulamukoboshela mushina noho?

⁹Nyasaye namukhabilisia anyala okhunyoola amalayi koosi mwinywe noho? Noho munyala okhumukaatia shinga olwa mukaatinjia abandu.

¹⁰Alamuhalabila toto mwene nimuba nimukhola aka ebiela mumasilisi.

¹¹Obunyalibwe bulamwitsusiamwo aburi, khandi amarisiake kalamwitsakhwo.

¹²Tsinjelo tsienywe netsikhaya butswa shinga likoshe nako amayingane kenywe namakhaya butswa shinga litoyi.

¹³Inywe muholele tsi, muleshe isie emboole, mana akakhangwila kangwile.

¹⁴Ndalara obulamu bwanje mumasila, ndalabura mumakhono kanje omwene.

¹⁵Nyasaye niyenya yanzire, embula eshia engosia, nebutswa ndalaterera tsinjila tsianje imbeliwe.

¹⁶Toto mwene elilambonia ndielino mbu; omundu omumayanu shianyala okhutsaaliikha okhutsia imbeliwe tawe.

¹⁷Murecheresie amakhuwa kanje obulayi, mana amarwi kenywe kahulile aka embooola.

¹⁸Lole, emalile okhurechekha amayingane kanje, ne emanyile mbu, isie embula eshikha,

¹⁹Aliho ounyala okhunzinjilila itookho? Naliho, ndalaholeela tsi, mana efwe.

²⁰Nyasaye chama ukholele butswa amakhuwa kabili kano, nasi shindalebisa okhurula khwiwe tawe;

²¹Mbu, oleshe okhumbelesia eshinyasio, oleshe okhuurisia namarisiako.

²²Unanje nasi ndalakhukalusia, noho oleshe emboole nawe ungalusie.

²³Namabi nende obwonooni shiina obwa ndakhola? Umanyiekhwo amabi kanje nende obwonooni bwanje.

²⁴Mbushiina wifisanga okhurula khwisie? Mbushiina umbukulanga isie okhuba omusukuwo?

²⁵Ne wakharisia lisaafu eliyilwa nomuyeka? Kata wakhalondachila khushitonye shia likata eliumu?

²⁶Unzinjililanga namakhuwa amalulu akokhufukula, nende okhundukha obwonooni bwa ndakhola neshili omuraaka.

²⁷Obohanga ebilenje bianje neminyololo, ungoneshelanga mutsinjila tsianje tsiosi, khandi ohenjelesinjia buli aha ebilenje bianje biseena.

²⁸Khulweshio efunikhangamwo ebitonye shinga omusaala okwabola, khandi shinga ingubo eya amatsilili kalia.”