Read wanga AYUBU 14 Bible Online

AYUBU 14 - wanga bible

AYUBU 14

¹“Omundu namundu, owa omukhasi yebula, nowetsinyanga tsindutu khandi nowamanyakhano amanji.

²Amulikhanga shinga eshimuli, khandi aniala bwangu. Abwetsangaho bwangu shinga eshiinini nalabaho khandi ta.

³Iwe Nyasaye, wakhateeba okhuhenga khumundu shinga uno? Kata okhumurera imbeliwo khulwa okhumuyasia?

⁴Ali heena ounyala okhurusia eshindu eshisiiyikhu mushindu eshieshifwabi? Shialiho tawe.

⁵Tsinyanga tsiomundu tsili neshiakamo, wamala okhumubasilia emiesichie mana waraho eshiakamo shiobulamubwe, eshia alanyala okhubiraho ta.

⁶Kho omuleshe butswa kata olamuhengakhwo ta, okhuula olwa asangalila tsinyangatsie shinga omukholi womurungo.

⁷Okhuba omusaala kuli nobunayi bwokhumenya, mbu nikuba nikuremwa kulasebukha khandi, ne emirombo chiakwo shichilakama okhusebukha ta.

⁸Emisi chiakwo chinyala okhukofulila mwiloba, nashio eshisina nishifwila mwiloba,

⁹nebutswa nikuba nikunyoola amaatsi kuba kulasebukha shinga omusaala omutoro.

¹⁰Nebutswa omundu afwitsanga, ne eshio nishio eshihesishie. Akwisia omwoyo, ne eshio nishio eshiakamoshie.

¹¹Shinga olwa amaatsi akemichela kalekhanga okhubira, khandi shinga amaatsi akeinyanza kakhamanga,

¹²nolwa abandu bafwitsanga nibalabuukha khandi ta, shibanyala okhubuukha oluhoono lwa likulu lishiliho tawe. Shibalisisimukha, kata okhubuusibwa okhurula mundoolo tawe.

¹³Bwakhabele obulayi niwakhafisile isie mushialo shiemakombe, niwakhafisileyo okhuula lwoburumabwo buba nibuhwele, mana oreho inyanga eyokhunzitsulila.

¹⁴Omundu nafwa, anyala okhulamukha khandi noho? Nebutswa ndalalindilila tsinyanga tsindayi, okhuula khunyanga eya amanyakhano kanje nikabe nikahwele.

¹⁵Nilwo olwa naunanje nasi nefuchila, ne nosangalila isie eshilonjeshio.

¹⁶Mana olahenjelesia injenda yanje, nebutswa shinohenjelesie obwonooni bwanje tawe.

¹⁷Naundeshele obwonooni bwanje, ne noburusia khwisie. Khandi naweye obwonooni bwosi obwa ndakhola.

¹⁸Nebutswa shinga olwa eshikulu shihwelelelanga nishikwa, khandi shinga olwo olwanda lurusibungwa mubukono bwalwo,

¹⁹khandi shinga olwa amaatsi kahwelelesinjia amachina nachio emikhula nichikholomosia liloba, nolwa iwe osasinjia obunaayi bwomundu.

²⁰Iwe omuhulanga omundu obushia nobushia mana omurusiaho inziayo, okalukhasinjia mumonimwe olwa aba nafwile.

²¹Abaanabe olwa banyoola oluyali shiamanyangakhwo ta, khandi nibeshibwa hasi ye shiaboolelungwa ta.

²²Ye ahulilanga butswa obutsunwi bwomubilikwe bwonyene, mana yebeelelela butswa omwene.”