Read wanga AYUBU 15 Bible Online

AYUBU 15 - wanga bible

AYUBU 15

¹Mana Elifasi, Omutemani, nakalusia Ayubu namureeba ari:

²Omundu omuchesi anyala okhuboola amakhuwa keshiyingwa noho? Omundu shinga oyo yetsula amakhuwa amakhaya noho?

³Anyala okhuyingana namakhuwa akalakhoya, noho okhuboola amakhuwa akabula inganga noho?

⁴Nebutswa iwe oukhayanga okhuria Nyasaye, niwikalila obwihaani khu Nyasaye.

⁵Aka oboolanga karulanga khubumayanubwo, khandi wahulanga okhuboola shinga omupele.

⁶Amakhuwako omwene niko akakhukhalachilanga eshiina, shiendi isie ta. Aka oboolanga niko akakhufukulanga.

⁷Opaaranga mbu niwe omundu wambeli okhwibulwa? Opaaranga mbu waliho ebikulu nibishili okhulongwa?

⁸Wahulila aka Nyasaye yali niyalosia okhukhola mumasilisi noho? Niwe owahebwa obuchesi wenyene noho?

⁹Nishiina shiomanyile eshia nefu khulamanyile ta? Nishiina eshia wamanyilisia eshia nefu khulamanyilisia ta?

¹⁰Mwifwe balimwo abakofu bobuchesi, abakofu muno okhushila papawo.

¹¹Aka Nyasaye akhuhotselesinjia ninako shikakhuhelanga? Ne amakhuwake kokhukhutembelesia shikali eshindu khwiwe ta?

¹²Mbushiina iwe otilungwa neliruma bwangu, nende okhuyiinduula tsimoni tsioburuma,

¹³nikachila nosinyishila Nyasaye, noboola amakhuwa amabi khuye?

¹⁴Omundu namundu onyala okhuba omusiiyikhu tooto? Omundu yesi yakhaba omulunjishi imbeli wa Nyasaye?

¹⁵Nikali mbu Nyasaye shiasuubilanga kata abamalaikabe ta, kata ebilonje biomwikulu shibili ebisiyiikhu mumonitsie ta;

¹⁶Kho yakhaba arie omundu oulibutswa eshisinyo khandi ouli omwonooni, omundu ounywetsanga abumayanu shinga amaatsi?

¹⁷Urecheresie nasi ndalakhwechesia, ndalakhuboolela aka ndaluutsi.

¹⁸Ndalakhuboolela amechesio kabobuchesi baboola, ne abakuuka babwe shibakabisa ta.

¹⁹Nyasaye yabahelesia eshialo eshio bonyene, ne shiyaliho omucheni owabira hakari wabwe ta.

²⁰Abamayanu balanyakhana mubutsunwi tsinyanga etsiobulamu bwabwe tsiosi, balanyakhana emiyika chiosi echia abobubi barecheshelwa.

²¹Obuyoka bwamarisia bulahulilikha mumarwi kabwe, olwa bapaara mbu bali mumulembe, omunuuli alabaseera.

²²Abamayanu shibalikhwo nobunayi bwokhurula mushiilima ta, ne obumalilishi bwabwe nokhwirwa nolukanga.

²³Bachendachendanga nibakhabilisia eshiokhulia, nibareeba bari, “Shili hena?” Bamanyile mbu inyanga yeshilima yulile.

²⁴Amatinyu nobutsunwi bibarisiye, bibaseera shinga omuruchi owirecheshe okhulwana.

²⁵Khulwa okhubela banyiila amakhono kabwe okhufukula Nyasaye, nibateema okhulechelesia OMWAMI Nyasaye,

²⁶mushileka belukha nibatsia okhumuseera, batsia nibali netsingabo tsisiro.

²⁷Kata mumoni mwabwe nimwakhomela, Khandi nibakhomela mubishienje,

²⁸balamenya mumatookho akasikala amakhaya, khandi mutsinzu tsiabandu balamenyamwo ta, tsinzu etsikhoyele okhuba amakunda.

²⁹Abandu abo shibalibakhwo abayinda ta, khandi emiandu chiabwe shichilayindila mushialo ta. Kata bo abeene shibalaralila khushialo ta.

³⁰Shibalahonokokha okhurula khushilima eshiokhufwa ta, khandi tsimemu tsiomulilo tsilasamba amasaka kabwe, nabio ebimuli biabwe bilayilwa nomuyeka.

³¹Baleshe okhwisika obuyingwa nende okhwikaatia abeene ta, okhuba obuyingwa obwo nibwo obwakhabe omurungo kwabwe.

³²Balarungwa omurungo mubwitsulu nibashiliho mwoyo, nabo abolwibulo lwabwe shibalatsiililila okhubaho ta.

³³Balaba shinga omutsabibu okubungulusia tsinzabibu tsiakwo nitsishili okhwenga, kata shinga omuseituni okubungulusia eshimuli shiakwo.

³⁴Okhuba abalamuritsanga Nyasaye ta babula olwibulo, nakwo omulilo kulasamba tsinzu etsia abachama okhubukula ebiomufusi.

³⁵Barechekhanga obubeeyi nende okhukhola amabi, emioyo chiabwe chietsulamwo obukaati.