Read wanga AYUBU 16 Bible Online

AYUBU 16 - wanga bible

AYUBU 16

¹Mana Ayubu nakalusia naboola ari,

²Ndahulila amakhuwa amanji shinga ako, inywe mwesi muli abahotselesi bakhunjonyia muno.

³Eshiakamo eshia amakhuwa kenywe amakhaya kano niliina? Eshimuyakulanga kho mbu okhuula mungalusie nishiina?

⁴Inywe nimwakhabeele isie, nasi ndaba inywe, siesi ndakhaboolile shinga inywe olwa muboolanga, ndakhakasiye amakhuwa akokhumwikana khandi ndakhamuyuyiile omurwe.

⁵Ndakhamutinyilisiye omwoyo namakhuwa kanje, khandi amakhuwa kanje kobuhotselesi kakhamureereere obuhulushi.

⁶Ne kata nimboola, obutsunwi bwanje shibuholeelanga ta, kata neholeela tsi, obutsunwi bwanje shibundekha ta.

⁷Toto mwene iwe Nyasaye unjonyiye po, khandi omulule abeinzu yanje boosi.

⁸Ung'ayiyie isie, ne obwo nibwo obuloli, ndatora mana ndasikala butswa amakumba. Abandu balolanga okhung'aha khwanje okhuba eshilolelo mbu endi omwonooni.

⁹Nyasaye muburumabwe yarandulemwo ebitonye khandi yasila; Yalumaasiliyekhwo ameenoke, khandi yamemiliiyekhwo tsimonitsie.

¹⁰Abandu banzeshelelanga, bakhung'ananga nibambotokhana nibakhupa tsikhofi mumoni.

¹¹Nyasaye yahaana mumakhono kabandu abamayanu, khandi yasukuna mumakhono kabonooni.

¹²Ndali nimenyanga mumulembe, nebutswa Nyasaye yandila mwikosi mana niyanzaramwo ebitonye khandi niyandubula. Yakhola isie okhuba eshindu shiokhuchoomiakhwo ebiselebie.

¹³Khandi yandasanga nobuyingo tsimbeka tsiosi, yarandule tsifuko tsianje nalambelelelakhwo ta, mana natsukha induswe yanje hasi.

¹⁴Akhandi akhanji yasalisinjia, yaseeranga shinga omulwani owoburuma butilile.

¹⁵Ndikhuulanga nindifwala tsingubo tsiamakunia, ndikhalanga hasi mulufu nehulilwe.

¹⁶Tsimoni tsianje tsiakhanye khulwa okwikhuula, ebisiche bianje bifimbile khandi biiliime ti.

¹⁷Nebutswa shiendikhwo neshikha shiosi ta, ne amasaayo kanje khu Nyasaye nakatoto.

¹⁸Iwe eshialo, olafunikha eshitsayi shianje eshiatatsibwa ta, okhuhaaba khwanje khulaholelesibwa tawe.

¹⁹Endi nobwatoto mbu omuloli wanje ali mwikulu, oyo owokhunderera ali ikulu.

²⁰Abetsa banje banzeshelelanga, tsimoni tsianje tsirulanga amasika nendilila Nyasaye.

²¹Ndikombanga omundu wokhunderera imbeli wa Nyasaye, shinga lwomundu aterereranga omwitsawe.

²²Toto emiyika chianje chitonyile mititi, nasi enzitsanga aha ndalanyala okhuchelela ta.