Read wanga AYUBU 17 Bible Online

AYUBU 17 - wanga bible

AYUBU 17

¹“Emalile okhufwa omwoyo, tsinyanga tsiobulamu bwanje tsihwele ing'ani yanje yindiirechesheele.

²Toto mwene abokhunzekha bambotokhane, tsimoni tsianje tsilolanga shinga banzeshelelanga.

³Iwe Nyasaye, obe omukobosheli wanje imbeliwo omwene, okhuba abulaho oundi ounyala okhukoboshela akemboolanga.

⁴Wikaliile amapaaro kabwe okhumanyilisia eshisina, kho shiolabafuchilila akhuhula isie tawe.

⁵Oyo oukhoba abetsabe kho mbu anyoole omurungo, abaanabe balasanda mubulamu.

⁶Ekholilwe okhuba inzekho mubandu, engwile omundu owokhunyilikhwakhwo amare.

⁷Tsimoni tsianje tsiakhaanye khulwa eshibeela, nabio ebiungo bianje biosi bitorire bili butswa shinga eshiinini.

⁸Abalunjishi besundushe, nabo ababula eshikha bafukulanga omundu awabapaaranga mbu shiahelesinjia Nyasaye oluyali ta.

⁹Kata kario abo abali abalunjishi batsiilililanga mubulunjishi bario, nabo abakholanga amalayi batsiilililanga okhuba abamaani.

¹⁰Nebutswa yitse inywe mwesi khandi! Shindalanyoolakhwo omuchesi kata mulala khwinywe ta.

¹¹Tsinyanga tsianje tsihwele, aka ndeenyanga okhukhola shikalekholekha ta, khandi aka ndekombanga okhukhola shikalekholekha ta.

¹²Abetsa banje bano balolanga eshilo okhuba eshiteere, baboolanga mbu obulafu buli ahambi, nebutswa isie emanyile mbu eshili butswa mushiilima.

¹³Obunaayi obwa endi ninabwo bwonyene nokhutsia emakombe, ewa enzia okhukona tsindoolo mushiilima.

¹⁴Niyo ewa ndiliboolela ing'ani endi, ‘Niwe papa wanje,’ natsio tsinyende endi, ‘Ninywe mama wanje khandi omukhaana wefwe.’

¹⁵Kho obunaayi bwanje buli heena? Niwiina ounyala okhulolakhwo obunaayi bwanje obwo?

¹⁶Kho ndaleekha nobunayi bwanje obwo emakombe noho? Khulakholomokha bosi okhuula mulufu?”